Read Konyak Naga JEREMIA 21 Bible Online

JEREMIA 21 - Konyak Naga bible

JEREMIA 21

¹Judah ahngpa Zedekiahwe Malchiah üha Pashhur hei Maaseiah üha ngengpa Zephania tüopa ngao phei ü-tangte shon;

²“Chingmei lamlinge toman jingne Youngwanpa phei ngaopha, hangjingne Babilon Ahngpa Nebuchadnezzar hüyange Ijing nyahponglan-e chingnyuwa tukteki. Aoweshing Youngwanpawe toman jingne yoijing yashanyali ja lingne ok hüyange Nebuchadnezzar shinne yelakpa kangne ok.”

³Hüwante Youngwanpawe üte ngao, hüyange aoyin ü-tangte shon tüolan kahtate Zedekiahte ngaotamlak jingne taowe i,

⁴hüke Youngwanpa Israel Kahwange ngaoyangki, “Zedekiah, nangjing nyahponglan-e Babilon ahngpa hüyange Ijing nyahponglan phei hokpuwa Taowe yenaotamlak. Nangjing wetaipalan yonglah-a chingnyu hotan me moiye shaijemne tamlak.

⁵Taowe nang phei tüi-e ü-mong kümme, ü-mongshih kümme, ü-mongshih ngaipu hüyange ümengshipu kümme ngaiye nang phei hoklak.

⁶Tüopa chingnyu me nyoipu moilan Taowe toilak; kahtalan hüyange yinmok moini fajümlihpu daktin phei lilak.

⁷Hüpoi nangjingne, nang shaoshanpalan, hüyange aoyin kahta wehokme, seanyao yengle, hüyange daktin me yinyangki tüolan jingnepa-a aoyinne numan toihuwe teihyapeih, tüolan Ahngpa Nebuchadnezzar hüyange numanjing wepalante Taowe numan khongkümpu pho ne tamlak. Nebuchadnezzarwe numan-a li ne tamlak. Iye numan sheja nehoi yetüohlak yejema-a shüpshe yehüolak yejema-a numan ao te-o yayenge yeteihlak. Tao, Youngwanpawe ngaoyangki.”

⁸Tüophei me Youngwanpawe üte kahtalante ngaowe tamlak jingne i, “Jaihuyah! Tao Youngwanpawe üyinlamte woipu tailam hüyange lilakte woipu tailam she tüonipa me numan-e mongpu ja lelak jingne phanang.

⁹Ao ne menglakei mengyapoi chingnyu me ngohma-a yanglow-e yejema-a seanyao yenglepuwe yejema-a daktin-e toilak. Hüpoi aoyin ngaiye taiye, sha-a chingnyute shümnangpu Babilonlan phangte onglakeih, iman-a yetoilak. I yoi üyinpa-a yinpu oklak.

¹⁰Tüopa chingnyu yinne ye anglak, hüpoi menge winlak jingne Taowe ü-mongjang me tümyangki. Tüopa-a Babilon ahngpate phawe tamlak hüyange Iye tüopa-a kahtok ne menge jakke tamlak. Tao, Youngwanpawe ngaoyangki.”

¹¹Youngwanpawe üte, David huhayimlan Judah ahngnokte tüopa ngaolan phalak jingne i:

¹²“Tao, Youngwanpawe hanghe inang jaihuyah. Nyihjeih she ngaotingpa-a linge jonya leitüoh. Aote wümme naowe tamnang tüopa kahta Ite wümmenaowe tampu kahta mepu yintamtüoh. Numan-e hüke yelingma-a, numan-e lingpu ünuwe ü-mongshihpu-meine ye-okpu vün kih-e loonge tamlak.

¹³Nang Jerusalem, kahjee tok me lüowe ngaipu longnyu kih-e, üjeelan üshei tangme nanga shotyange ngohnang. Hüpoi Taowe nang phei hoklak. Aowe-o nangte shümpu ye-oklak yejema-a meipe latyangpu nang lüowe ngaipu ye-oklak she nange inang.

¹⁴Hüpoi nange hanghe lingyangki tüopa jingne Taowe nangte shaoshi ne tamlak. Taowe nangjing ahngnok-a vün me jakke tamlak, hüyange tüopa neikonpu sheminlamphe vünne hahshulak. Tao, Youngwanpawe ngaoyangki.”