Read Konyak Naga JEREMIA 22 Bible Online

JEREMIA 22 - Konyak Naga bible

JEREMIA 22

¹Youngwanpawe üte hüke i, “Judah ahngnokte laitüoh, hüyange tüoken me tüopa ngao ngaotüoh, hüyange itüoh;

²O Judah Ahngpa, ao David ahngshotjing me shotnang, nang, hüyange nang kahta aoyin tüopa petente ongnang, Youngwanpa ngao jaiyah:

³Tao, Youngwanpawe nangte hanghepa üting hüyange shunang tüopa linglak jingne ngaokeng pha nang. Ao kahtate aowe lowelam nang tüopa lowelampa mepu I jongwan tamtüoh. Yinpalante, khah-halante, yejema-a wamnyulante yemeipe tahling yejema-a shaoshi ne tahtam; hüyange tüopa üjao nyoi me hang ümengo yenangpu kahtalan iy tahshai.

⁴Taowe ngaokeng phapu kih-e nange üting me lingma-a, hüwante David huhayimlan ahngne muh menge yelakpe ngohlak. Hüyange iman, imanjing woipalan, hüyange kahtalan phei jamme, pongtongtoi hüyange koiponglan me shotyange tüopa ahngnok petenlan me yelakpe onge peilak.

⁵Hüpoi nange ü-ngaokenglan yejaima-a, Taowe nangte jienge ngaonang, tüopa ahngnok-a heamme toitalak. Tao, Youngwanpawe ngaoyangki.

⁶“Ü-sheshao me Judah ahngnok-a Gilead kahmük hüyange Lebanon kahmüklan shinne, shemeiyaoma nang; hüpoi tüopa-a Taowe ümeken me ao-o yenyoi tüopa nyoi kih-e ükengne menge tamlak.

⁷Tüopa menge wintamlak jingne Taowe nang phei tüi-e kahtalan shonnang. Iman khongkümpuwe imanjing wa yah peilak, shemeiyaomapu cedar shongnyulan mette winlak, hüyange tüolan-a vünte shüplak.”

⁸“Phei me ülao jatlan üngang tüopa linne tailak hüyange shejawe shejate teitonglak, hangne Tao, Youngwanpawe hükihpu toi tüopa chingnyu üyongte linge tampu?”

⁹Hüwante iman-e janlak, “Hangjingne ima-a iman-e iman Kahwang Youngwanpa phei jiengjeppu winne tüoh, hüyange ülao kahwanglante yoppekhüm hüyange iman shaoshan.”

¹⁰Judah kahtalan, Josiah Ahngpa jingne tahshap; I lipute mang tahshap. Hüpoi, Iha Joahaz jingne khah-e shaptüoh; aope-o leih yeyelak jingne, iman-e I-a yah-e teinang; ümeken me I puhyapeih shaaji nishe tüopa kahmük ye-ngelak ne teinang.

¹¹Josiah üha Shallum, aowe yoipa nanleiye Judah ahngpa ne meng, tüopa jingne Youngwanpawe inang, “Shaaji leih yeyelakne, I tüomepu taimahteki.

¹²I-a ümeken me iman-e I yahtei, tüopa kahmük me lilak, hüyange Iye shaaji aope-o nishe tüopa kahtok ye-ngelak.”

¹³Aowe ngaoting ye-ipuwe yoi nok welakei, hüyange tüopate paowe welak jingne lüppe lowe yahlakei, tüopa kahta-a mahlak; aowe yoi pheipu chingshao kahtalan hangne-o üjepute toi lingne tam, hüyange iman nanmee yepha mahlak.

¹⁴Aowe “Taowe ü-nying nyingke ütangpa nyoi me tungnoong (tüpsa üngang) pheipu nok üyong welakei,” she inang tüopa kahta-a mahlak. Tüokhei Iye cedar phei lingyangphei tawolan yoi nokme sha, hüyange tüopate ütakke pho.

¹⁵Ülao eihalan phei shemei she nange cedar phei nok wepuwe nanga eiha phei shemeipupa ahngne mengnang kü a? Nangpa-a üyin khakwange ngoh yangki. I-a hipak phe me ngaoting hüyange meimawe, hüyange Iye lingpu sheminlamphe me jalunne ngohyangki.

¹⁶Iye toinanpalante meijange ngaophün, hüyange Iphei khongkümpu meiye tai. Tao shingpute leppuwa tüokihpute inang she Youngwanpawe inang.

¹⁷Hüpoi nange nang nying nyingke hahnyakpu shaha nge nang ümengo yenangpalan nange toi, hüyange yakphei lükke nangjing kahtalante shangne tam. Youngwanpawe ngaoyangki.

¹⁸Tüojingne, Josiah üha Jehoiakim, Judah ahngpa jeng Youngwanpawe inang, “I lipute aowe-o mang yeshaplak yejema-a, ‘hangshin fajümlihlakpa, ü-shümpa, hangshin fajümlihlakpa!’ she ye-ilak. I jingne aowe-o yeshaplak yejema-a ‘Ü-nokpu! Ü-ahngpa!’ she üng yewünlak.

¹⁹Yihnoonpu gado ja mang lünge teipu kih-e, I-a shuwe yahteilak hüyange Jerusalem petenlan ü-at yeme shüppe winlak.”

²⁰Jerusalem kahtalan, Lebanonte taitüoh hüyange üngwün tüoh, Bashan kahmükte taitüoh hüyange wentüoh; Abarim mepu nyik-e ngaitüoh, hangjingne nang phei taonyu phonglampalan khongküm naowe tamteki.

²¹Aope nang jalunne ngohyapeih Youngwanpawe nang phei ngao, hüpoi nange minjai she lan. Nang üyin jin kümme nange lingyangpuwa tüohei ngohnang; nange aope-o Youngwanpate yejai.

²²Nangjing woipalan-a wangyange puwe teilak, nangphei taonyu phonglampalan-a wehok me phowe teikümlak, nang mongmenglak hüyange wüotüone tamlak, hangjingne ima-a nange lingyangpu ümenglan khongkümpu jingne.

²³Nang, ao Lebanon mepu yahpeipu cedar yo me toloimei; hüpoi aope nangte shangpupa peingoilakei, nang hangshin shüpshelakpa ne ngohlak, moipaiwante sheko ja shangpu kihpu shangpupa!

²⁴Judah Ahngpa Jehoiakim üha Ahngpa Jehoiachin te Youngwanpawe inang, “Tao üyin Kahwang ütingpa ne menge, nanga ü-yakjah ye me ümin nyanyangpu shüptet ne mengyapoi, Taowe nanga bheiye yahlak;

²⁵hüyange kahtalan aoyinne nang toihuwe teih, hüyange aoyinte nang nyam tüolante nang phalak. Taowe nanga Babilon Ahngpa Nebuchadnezzar hüyange I wetaipalante phalak.

²⁶Taowe nang hüyange nangnyu phowe teilak jingne kanglak. Nangni ao-o yepuhpu kahmük ja te nangni tailak, hüyange nangni moini tüome lilak.

²⁷Nange tüopa kahmük nishe ngehuwe teihlak, hüpoi nang aope-o nishe leih yeyelak.”

²⁸Taowe i, “Jehoiachin Ahngpa-a paitüoh-e winpu hüyange aowe-o yeyah hupu tükmei (kümptük) ja ne mengpu a? Hatüowa hangne I hüyange I hayimlan iman-e aope-o shinge yengohpu kahmük jate phowe teipu?”

²⁹O kahmük, kahmük, kahmük! Youngwanpawe hanghe I jaitüoh:

³⁰“Hatüo kahta-a Iha mahtamlak, hüyange aope-o okpu ye-ngetampu kahta ja ne winteki. David nanleipa ne Judah me wanglam lamlak jingne Ime huhayimlan yenanglak. Tao, Youngwanpawe, ngaoyangki.”