Read Konyak Naga JEREMIA 23 Bible Online

JEREMIA 23 - Konyak Naga bible

JEREMIA 23

¹“Aowe ü-heeijong mepu nyee mahtam hüyange yanne tamyapeih tüolan nyeeyompalan jingne onyukei!” she Youngwanpawe inang.

²Tüokhei, Israel Kahwang Youngwanpawe aoyinne ü-kahtalante paowetük nang tüolan nyeeyompalan te inang: “Numan-e ü-nyeelan yanne tamteki, hüyange iman jange teiteki, hüyange numan-e imante yepao. Leihuyah, numan-e ünu lingpu jingne Taowe numante yeleilak she, Youngwanpawe inang.

³Tüophei me Taowe ümeken me iman yanne tam, tüolan kahmük mepu jetohapu kahtalan (nyeelan) Taowe shaijemlak, hüyange Taowe iman-a imanjing nyupuh kahmükte yah yelak. Iman me hayimlan üngang ngohlak hüyange shangtoi jalunlak.

⁴Imante paowetüklak jingne Taowe Nyeeyompa le-ngailak. Ü-kahtalan shaaji nyampu yenanglak yejema-a fajümlihpu hango yenanglak, hüyange Taowe imante nishe shaoshiyatengne yejema-a sheja nehoi mahne yetamlak. Tao, Youngwanpawe ngaoyangki.”

⁵Youngwanpawe inang, “Hipak ja peiküki aope üjaopa David nokli mepu ja ahngpa ne Taowe lelak. Tüopa ahngpawe kentamongtingpu phei wanglam lamlak hüyange ütingpa hüyange khakshupu kahmük nopu me linglak.

⁶Aope I ahngne menglakei, Judah kahtalan yinlak, hüyange Israel kahtalan chingmei me nyoilak. Ite ‘Teman Yinyetampa Youngwanpa’ she nyiklak.

⁷“Tüokhei hipak-a peiküki,” Youngwanpawe inang, “Aope kahtalan-e shaaji üte aowe-o Israel kahtalan Egypt kahtok mepu woipeipu üyin Kahwang she jiengpu yengohlak.

⁸Tüonanleiye iman-e aowe Israel kahtalan apye kahmüklan hüyange ülao kahmüklan khongkümpu me ümekenlan me Taowe iman yanne tam; yah yepu üyin Kahwang she jienglak. Tüophei me iman imanjing yoi kahmük me nyoilak.”

⁹Hipalan jeng me: Ümongjanga paimengteki, hüyange tao ninnang. Youngwanpa jingne, I jing üjao ngaolan jingne, taowa ao yu joknang tüopa kahta kih-e, kahta ja ao loishe wuwüngti yingyangki tüokih-e.

¹⁰Kahmük-a phwngngampalan-e maa ngohnang; phoiwümpu jingne kahmük shapyoong nang, hüyange wanwüngjeng heeijong wanmah. Hipalan lamnyu yeshu, hüyange iman wong khakshuwe yejepe jon.

¹¹Youngwanpawe inang, “Hipalan hüyange ngengpalan moini me Kahwang yenang; Ü-khümjing me nehoi iman-e nushakpu Taowe phoyangki.

¹²Tüokhei iman kemhümpu yalam-a nyeleh-e hüyange wangnyak me; Taowe iman-a yashah hüowe yeine tamlak: Taowe iman tangme mahtamlakpa yahpeilak; imante shaoshiyatenge tamlak hipak peiküki. Tao Youngwanpawe ngaoyangki.

¹³Samaria hipalan ünu Taowe ngeyangki: iman-e Baal min me ngao hüyange ü-kahtalan ünyongyete woine tam.

¹⁴Hüpoi Jerusalem hipalan-e tüopa phei nehoi shemeng she lingpu Taowe ngeyangki: iman-e phwngngampu jon hüyange tahleih i; iman-e kahtalante yeshupu linglak jingne jam, tüokaiye aowe hanghepa ünu ling tüopa lingpu mepu yelak. Ü-sheshao me iman khongküm Sodom hüyange Gomorrah mengpu shinne mengteki.”

¹⁵“Tüojingne Tao, Ütahpa Youngwanpawe, Jerusalem hipalan jeng inang: “Taowe imante hahlak jingne üphao ükhah hüyange yinglak jingne soihüng yeng phalak; hangjingne Jerusalem hipalan mepu kahmük üshei yekao me Kahwangte yenyampu ngaoyanteki.”

¹⁶Ütahpa Youngwanpawe Jerusalem kahtalante inang, “Hipalan-e hanghe i tüopate tahjai; iman-e numan-a tahleih monghümpuwe shokke tamnang. Iman-e numante Taowe hanghe iyangki tüopa yeje hüpoi iman-e hanghe teih-peiyapei inang.

¹⁷Taowe hanghe iyangki tüopa minjai she ipu kahtalante, iman phei khongkümpu meiye tai eija she iman-e yelakpe ngaotam nang. Hüyange aoyin üngeine meng imante mahtampupawe aope-o Ite minlet tamja she iman-e moilante i tamnang.”

¹⁸“Tüolan hipalan aowe-o Youngwanpa juteih ülupa aope-o shinge yenang. Iman yo me aowe-o aope-o yejai yejema-a I ngaolan shinge ye-ok, yejema-a aope-o jaiye yelei yejema-a Iye hanghe i tüopate mong yepha.

¹⁹Leihuyah, Youngwanpa, I mongshih-a waishihwangkhah ja yüpnyeih wangyang hangheye ümenglan shangme shokke tamlak,

²⁰hüyange Iye lingne teihpu sheminlamphe manling shope tüopa-a yelaklak. Ngoikülak hipak me Ijing kahtalan-e tüopa-a meimei-e shinge yahlak.”

²¹Youngwanpawe inang; “Tüolan hipalan Taowe yeshon, tüoyangpoi iman tai. Taowe imante ngaolan hango yepha, tüoyangpoi yelakpe iman-e ümin me ngaonang.

²²Iman-e Taowe ümongpa me teihpulan shingshihma-a, hüma-a iman-e ü-kahtalante ü-ngaolan pongtam hahshepu hüyange iman ünupa üyin me nyoipu iman-e tüohne linge tamhah shepu hüyange iman-e lingpu ünu ümeng tüohne tamhah shepu.”

²³“Taowa ü-o me hei ngohpu Kahwang ja, hüyange üjai me yengohpu Kahwang a? she Youngwanpawe inang.

²⁴Taowe I ye-nge oklak ne aowe-o ümeken me-o lo ne ye-ok. Tao üken phe me wangdang me hüyange kahtoknyu me ngohnang she numan-e yeshing a? she Youngwanpawe inang.

²⁵Tüolan hipalan aoyinne hanghe ngao hüyange ümin me tahleih ngao hüyange iman mang me Taowe imante ü-ngaolan phaküja she i Taowe shingnang.

²⁶Hangshin laowe tüolan hipalan-e iman-e tüowe okpu ngaoleih phei ü-kahtalan ünyong yete woilak?

²⁷Iman payimlan-e Tao pemeiyange Baal pheite taipu meimei kih-e, iman-e ü-kahtalante ipu iman mange ü-kahtalan-e Tao pemeikülak she iman-e teihnang.

²⁸Hipa aowe mangmangyalakei, hatüowa shinmang hei üja she ilak yang, hüpoi hipa aowe ü-ngaolan jaiyapeih Iye tüopa ngaolan ütinglakpu phei pongtamlak yang. Tahlick phei tahphan phinlaka hanghe me meipu ngohnang shi?

²⁹Ü-ngaolan-a vün kih-e hüyange longnyu khoih-e tampu yanmee kih-e ngohnang, she Youngwanpawe inang.

³⁰Aoyinne eihajing ngaolan teiyahyange tüolan-a ü-ngaolan üja she pongtam nang tüolan hipalan phei Tao tüinang.

³¹Tao üne-o hipalan aoyinne iman-e teihpu ngao ngaoyange tüolan-a Youngwanpa mepu peipu üja she iyapeih tüolan phei-o tüinang.

³²Tao, Youngwanpawe hanghe i jaiyah! Hipalan aoyinne tahleih shahawe mapu iman shinmang iyapeih tüolan phei Tao tüinang. Iman-e tüolan shinmang inang hüyange iman ngaoleih hüyange iman otapu me ü-kahtalan ünyong yete woinang. Taowe iman yeshontam yejema-a tailak jingne ngao yepha, hüyange iman-a kahtalan jingne jampu hango yenang. Tao, Youngwanpawe ngaoyangki.”

³³“Aope ü-kahtalan ütamme yejema-a hipa jawe yejema-a ngengpa jawe nangte, ‘Youngwanpa hangkiyih hanghe shi?’ she tonglakei, nange Ite ilak yang, ‘Nanga Youngwanpate hangkiyih, hüyange Iye nanga winne tamlak.’

³⁴Ü-kahtalan yo mepu shejawe yejema-a hipa jawe yejema-a ngengpa jawe ‘Youngwanpa hangkiyih’ shepu ngao nehoi jonma-a, Taowe I hüyange Inok noksate shaoshipu peine tamlak.

³⁵Tüoleima-a, moilanne yoi shümpalante hüyange yoi pheipulante, ‘Youngwanpawe hanghe janpu phapu shi?’ ‘Youngwanpawe hanghe ipu shi?’ she tonglak yang.

³⁶Hümme nakshih iman-e ‘Youngwanpa hangkiyih’ she ipu ngao shaaji yejonlak, hangjingne ütamjawe hüke ngaoma-a, Taowe ü-ngaolan-a ütingpa hangkiyih ne Ite linge tamlak. Kahtalan-e iman Kahwang, Ütahpa Youngwanpa, üyin Kahwang ngaolan püoh-e jonyangki.

³⁷Hipalante tongtüoh, ‘Youngwanpawe numante hanghe janpu pha ei? Youngwanpawe hanghe i ei?’

³⁸Hüyange iman-e ü-ngaokeng yejai hüyange ‘Youngwanpa hangkiyih’ shepu ngaolan jonpu ne mengma-a, hüma-a imante itüoh,

³⁹Taowe ütingpa me iman toonne yahlak, hüyange iman hüyange Taowe imanjing pajeiyonglan te phapu chingnyu mepu, ü-mepu shejai she iman shüppe winlak.

⁴⁰Taowe iman tangme üküm yenangpu wüotüopu hüyange aope-o yepe oklak mongmeng yah peilak.”