Read Konyak Naga JEREMIA 24 Bible Online

JEREMIA 24 - Konyak Naga bible

JEREMIA 24

¹Youngwanpawe üte phuklick doo ni khümjing nokshao me angyange hüo. Hatüowa Babilon Ahngpa Nebuchadnezzarwe Jehoiakim üha, Judah Ahngpa Jehoiachin phowe Judah woipalan, aijonpalan, hüyange okkeshange toilinge okpalan Iphei jamme Babilon te teiyang phei me.

²Üwangpa doo me phuklick ümeilan, üwangne yümpulan ngohyangki; hüpoi japa doo ma-a phuklick ümeng shaha, hahne jamloi yemeipu shaha ngohyangki.

³Hüwante Youngwanpawe üte i, “Jeremia, nange hanghe ngenangki?” Taowe jan, “Phuklick ümeilan-a yeonge mei, hüyange ümenglan-a yeonge yemei, hahlak jingne jamloi menge ngenangki.”

⁴Hüwante Youngwanpawe üte i,

⁵“Tao, Israel Kahwang, Youngwanpawe kahtalan aoyin Babilonte yah teinang tüolan-a phuklick ümeilan kih-e linglak, hüyange Taowe iman-a yayeng shüpshe phei jonpailak.

⁶Taowe iman yomlak hüyange tüopa kahmükte iman yahyelak. Taowe iman linge ngailak hüyange menge yewinlak; Taowe iman shomme tamlak hüyange bheiye yewinlak.

⁷Taowa Youngwanpa she shinge yahlak lahnyiklak mongjang Taowe imante phalak. Hüwante iman-a ü-kahtane menglak, hüyange Taowa iman Kahwangne menglak, hangjingne ima-a iman mongjang üsheiye iman ü-tangte lüppe yekülak.”

⁸“Tüoyangpoi Judah Ahngpa Zedekiah, I neikonne ngohpu konheingaopalan hüyange Jerusalem me ngohpu ülao kahtalan aoyin tüopa kahmük me ngohyangki yejema-a Egypt te yayongyangki tüolan jingnepa-a, Tao, Youngwanpawe tüolan phuklick hahlak ne jamloi yemeipu kih-e iman khongkümpute linge tamlak.

⁹Kahtoknyu jatlan khongkümpuwe fajümlih-e ninlak ne iman tangme Taowe hükihpu mahtampupa yahpeilak. Kahtalan-e imante phoilak, imante nyinnyenglak, imante nyiyaitamlak, hüyange ükenphe me Taowe iman yanne tampu me iman min-a phoiwümpu ja ne jonlak.

¹⁰Taowe imante hüyange imanjing pajeiyonglante phapu kahmük mepu iman sheja nehoi yetope mantüoh mantüoh, Taowe iman tangme wehok, seanyaoyengle, hüyange daktin peitamlak.”