Read Konyak Naga JEREMIA 25 Bible Online

JEREMIA 25 - Konyak Naga bible

JEREMIA 25

¹Josiah üha Jehoiakim, Judah ahngne mengpu wangpeng peli shepupa me. Judah kahtalan khongkümpu jeng me Jeremiawe Youngwanpa mepu ngaolan tüoyangki. Hatüowa Babilon ahngpa ne Nebuchadnezzar mengpu üwangpa wangpeng ne ngohyangki.

²Tüokhei Jeremiawe Judah hüyange Jerusalem kahtalan khongkümpute i.

³“Amon üha Josiah Judah ahngne mengpu wangpeng penmelüm mepu tüopa nyih ngoiye, wangpeng da me lüm mongme, Youngwanpawe ü-phei ngaoyangki; hüyange Iye hanghe ngaoyangki taowe aope-o numante ye-i-pe yengoh. Hüpoi numan-e mong yepha.

⁴Youngwanpawe numante yoi shaoshanpa hipalan yelakpe shonyapoi, numan-e yejai hüyange mong yepha.

⁵Iman-e numante ümengpa lamme kempu numan üyin hüyange numan-e lingpu ünu toishao mepu lüppe yelak jingne i, hümme nakshih Youngwanpawe numante hüyange numan pajeiyonglante jinte anglak moth ne phapu kahmük me numan nyoipu oklak.

⁶Ülao kahwanglan shao yeshanlak hüyange numan-e lingpu peshaolante yoppe khümpuwe Youngwanpa mongshih ngaine yetamlak jingne ngaowe tam. Numan-e Youngwanpa ngao jaishihma-a, hüma-a Iye numante shaoshi yateng ne yetamhah shepu.

⁷Hüpoi Youngwanpa Iye iyangki numan-e I ngao minjai she lan. Tüonanleiye numan-e numan jing peshaolan-e I mongshih ngaine tam hüyange numan nying nyingke I mepu shaoshi yatengpu yahpei.

⁸“Tüojingne, numan-e Ite yejai okpu jingne Ütahpa Youngwanpawe inang,

⁹‘Apyekao mepu kahtalan lili hüyange ü-shaoshanpa Babilon Ahngpa Nebuchadnezzar yahlak jingne Taowe shonlak. Taowe iman-a Judah phei tüi-e hüyange tüome nyoipu kahtalan phei tüi-e hüyange yupichingshüm jatlan khongkümpu phei tüi-e hoklak jingne yahpeilak. Taowe tüopa jat hüyange tüopa neikonpu yupipalan menge winlak hüyange jintepu jingne heamme tüohlak, fajümlihpu hüyange mokhlak nyoine menglak! Tao, Youngwanpawe ngaoyangki.

¹⁰Tüo tokte, Taowe iman mepu mongongpu hüyange hoongli mongongpu ngaowüng, nyemnya ngaowüng hüyange nyemthepa ngaowüng, hüyange shamshupu wüng hüyange vüntük ütee yahteilak.

¹¹Tüopa kahmük nopu heamteiye tüohlak hüyange mokhpu nyoi ja ne menglak, hüyange neikonpu jatlan-e Babilon ahngpa wangpeng denyit jingne shaoshanlak.

¹²Tüophei me wangpeng denyit lin phei me, Babilon hüyange tüopa mepu ahngpate iman ünu jingne Taowe shaoshi ne tamlak. Taowe tüopa kahmük-a lanshe menge winlak hüyange jintepu jingne tüopa-a heamteiye tüohlak.

¹³Jeremia kaiye shangepongpu khongküm jatlan tangme yah peilak Taowe nyamshaowe ngao tüopa laitep me nyanne angpu shangepongpu üshei phei shaoshiyatengne tamlak.

¹⁴Babilonlan-e iman-e hanghe lingyangki tüopa taowe imante leih phalak, hüyange jatlan maapuwe hüyange ahng üyonglan-e iman rha ne linge tamlak.’ ”

¹⁵Israel Kahwang, Youngwanpawe üte i, “Ümong shihpuwe maayange hatüo me wuwüngti wan ja ngohnang. Aoyin tangte Taowe nang shonyapeih tüolan jatlan üshei tangte tüopa yah taitüoh, hüyange tüopa mepuwe iman ying ne tamtüoh.

¹⁶Aope iman-e tüopa mepu yinglakei, iman paalalak hüyange Taowe iman tangte shontampu wehok kaiye iman kenmong yenangpe mahlak.”

¹⁷Tüokhei Youngwanpa yak mepu wan taowe yah, aoyin tangte Youngwanpawe tao shontam tüolan jatlan üsheite tüopa pha, hüyange imante tüopa mepu yingne tam.

¹⁸Jerusalem hüyange Judah jilalan üsheite, ahngpalan hüyange woipalan moilan jamme tüopa mepu yingne tam, tüokaiye iman jeamjing ne menge tamlak, fajümlihpu hei mokhtampu ja ne, tüokaiye kahtalan-e iman min-a iman-e sha-a linge ngohpu kih-e phoiwümpu min ja ne jonlak.

¹⁹Ülaolan khongkümpu aoyinne tüopa wan mepu yinglak ne ngoh tüolan min hatüo me: Egypt ahngpa Pharaoh, I jing shaoshanpalan hüyange woipalan;

²⁰Egyptlan khongkümpu hüyange Egypt me ngohpu yinpalan khongküm; Uz kahmük mepu ahngpalan khongküm; Philistia chingnyulan Ashkelon, Gaza, Ekron, hüyange Ashdod me jetohapu tüomepu ahnglan;

²¹Edom, Moab, hüyange Ammon kahtalan khongküm;

²²Tyre hüyange Sidon ahngpalan khongküm; Mediterranean kahmüklan mepu ahnglan khongküm;

²³Dedan, Tema, hüyange Buz chingnyulan;

²⁴hüyange aoyinne iman shang shoh-e linyapeih tüolan kahtalan khongküm; Arabia ahngpalan khongküm; wanwüngjeng jatlan ahngpa khongküm!

²⁵Zimri, Elam, hüyange Media ahngpalan khongküm;

²⁶Apyekao, üjai hüyange ü-o mepu, ja phei me ja she ahngpalan khongküm peilak. Kahtoknyu tangme ngohpu jatlan liliye tüopa mepu yingne ngailak. Ükümpa me Babilon ahngpawe tüopa mepu yinglak.

²⁷Hüwante Youngwanpawe üte i, “Kahtalante hüke Tao, Israel Kahwang, Ütahpa Youngwanpawe imante jokyange manfai manfai, iman toitayange lüowe ye-okpe manngai manngai she, hangjingne ima-a iman yome Taowe shonpu wehok jingne, iman-e yinglak Taowe ngaokeng phanang she itüoh.

²⁸Hüyange iman-e nangyak mepu wan yahyange hüyange tüopa mepu min ying she lanma-a, hüma-a imante itamtüoh hüke Ütahpa Youngwanpawe iyangki, numan-e yinglak wongpong.

²⁹Taowe mengetampu toishao-a üjing chingnyu me ükong wanglak. Iman-e imante shaoshiyateng yephape linlak she teihpu a? Yeje, imante shaoshiyateng phalak, hangjingne ima-a kahtoknyu kahtalan nopute Taowe wehok shonlak. Tao, Ütahpa Youngwanpawe ngaoyangki.

³⁰“Jeremia, Taowe ngaoyangpu lili nange pongetamlak wongpong. Tüolan kahtalante nange ilakyang, “ ‘Youngwanpawe wangdang mepu waolak hüyange wang ütangpa mepu wangkhonglak. Iye yoi kahtalan khongküm phei tüi-e waolak; Iye kahta jawe wuwünglick, phitwantepu kih üngwünlak. Kahtoknyu me ngohpu moilanne Iye wenpu jailak.

³¹Hüyange üwünga kahtoknyu üküm ngoiye lüngjanlak. Youngwanpawe jatlan phei tüi-e ngao ngohnang. Iye kahta lili ngaophün jing me ngaophün ne yahpeilak; hüyange ümenglan-a li ne tamlak, Youngwanpawe ngaoyangki.’ ”

³²Youngwanpawe inang ümengpa-a jat ja phei me jat ja tang me peiküki, hüyange wangyang üyonga kahtoknyu ükümpa üjaiye mepu jemküki.

³³Tüopa nyih me aoyin Youngwanpawe toiyangki tüolan püm-a kahtoknyu üshuk ja ye mepu jaye üshuk ngoiye tee-shaiye ngohlak. Aowe-o iman jingne mangshappu yengohlak, hüyange iman-a yah yeteilak hüyange muwe yetamlak. Iman-a kahtok me jant kih-e phongyange ngohlak.

³⁴Shaptüoh, numan ü-kahtalan yompu nyeeyompalan, üngwünne shaptüoh! Mangshappe kahmak me lüptüoh. Numan lange toilak hipak ngoi peiteki, hüyange numan-a nyeepong toiye tampu kih-e toilak.

³⁵Nyeeyompalan jingne lojing towe yengohlak, nyee ükhong nokpulan jingne tai oklak ken yenanglak.

³⁶Numan shaphuleih tüoh hüyange mongmeng puphei üngwünne shaptüoh, hangjingne I mongshih ngaipuwe Youngwanpawe numan jat mahtamnang,

³⁷Youngwanpa ümengpa me mongshihpuwe chingmei me ngohpu numan kahmük-a heamteiye winne tüoh nang.

³⁸Yengkong mailange longsa tüohpu kih-e Youngwanpawe yoi kahtalan winteki. Yawinmongpailak wehok hüyange Youngwanpawe nyam nyamshepu mongshih ngaipuwe kahmük-a wanwüngjeng ne leihkeih tamteki.