Read Konyak Naga JEREMIA 26 Bible Online

JEREMIA 26 - Konyak Naga bible

JEREMIA 26

¹Josiah üha Jehoiakim Judah me ahngne menge wangpu phei jamshe, Youngwanpa mepu tüopa ngao pei.

²Youngwanpawe hüke inang, “Khümjing ghonyoi me yongtüoh hüyange aoyin Judah jilalan mepu tüoken me yoppe khümlak jingne peinang tüolan kahta khongkümpute Youngwanpawe nangte ngaokeng phapu khongkümpu pongtamtüoh. Ülam ja nehoi tahtüoh.

³Aoweshing, kahtalan-e jaine ok hüyange iman ünupa lam tüohne ok. Iman-e ngaojaima-a, iman ümengpa lingyangpu jingne taowe iman tangme mahtamlakpa yahpeine tümyangpu juteih mepu Taowe jeilei ne ok.”

⁴Kahtalante ngaowe tamlak jingne Youngwanpawe üte i, “Tao, Youngwanpawe ngaoyangki, hüke Taowe numante phapu nyüowe tampu pheite woiye numan-e ü-ngao jailak yang,

⁵hüyange ü-shaoshanpalan hipalan, aoyin Taowe numante yelakpe shontamnang tüolan ngao jaiye mongphawe ü-ngao jailak yang. Iman-e hanghe ngaoyangki numan-e aope-o yejai.

⁶Numan yelakpe muh ngao yejaipe ngohma-a, hüma-a Taowe Shilohte hanghe ling, Taowe tüopa khümjingte linglak, hüyange kahtoknyu jatlan khongkümpuwe tüopa chingnyu min-a phoiwümpu ja ne jonlak.”

⁷Ngengpalan, hipalan, hüyange kahtalan liliye khümjing me tüolan ngaolan Jeremia ipu jaiyangki,

⁸hüpoi Youngwanpawe Jeremiate ngaowe tamlak jingne ngaokeng phapu khongküm ngaowe shopu phei jam she, iman-e I pho hüyange üngwün, “Tüopa jingne nanga toilak!

⁹Hangne nange Youngwanpa minme tüopa khümjinga Shiloh kih-e shonlak hüyange tüopa chingnyu-a mengwinlak hüyange tüopa me ao-o yenyoi oklak she ngaopu?” Tüophei me kahtalan Jeremia neikonne üngang jem.

¹⁰Aope Judah woipalan-e hanghe ngai tüopa jaiyapeih, iman ahngnok mepu yeonge mamme Youngwanpa khümjingte pei hüyange Ülapa Peten Youngwanpa khümjing me iman yoi yoi nyoijing yah-e yong.

¹¹Hüwante ngengpalan hüyange hipalan-e woipalan hüyange kahtalante i, “Hatüo kahta liye tamlak jingne khak shuwe wangnang hangjingne Iye teman chingnyu phei tüi-e ngaoyangki. Numan-e numan nawe I mepu jaiyangki.”

¹²Hüwante Jeremia-e i, “Tüopa khümjing phei tüi-e hüyange tüopa chingnyu phei tüi-e numan-e ü-mepu jaipu khongküm pongetamlak jingne Youngwanpawe tao shonyangki.

¹³Sha-a numan nyoipu wanglam hüyange numan-e linghümpu toishao mepu numan jeileilak yang, hüyange numan Kahwang Youngwanpa ngao jailak yang. Numan-e hüke lingma-a, mahtamlakpa Iye numan tangme yah peilak she ngaoyangpu juteih Iye jeileilak.

¹⁴Üjingnepa-a, taowa numan wong phangme numan phei ngohnang! Numan-e hanghe meinang hüyange shunang she teih üte lingtüoh.

¹⁵Hüyangpoi tüopa shingyah: numan-e tao toima-a, numan hüyange tüopa chingnyu mepu kahtalan-e ümeng yenangpu kahta ja toipuwa püohpune ngohkülak, hangjingne numante tüopa deingao phalak jingne tao shonne tampupa-a Youngwanpa ngohnang.”

¹⁶Hüwante woipalan hüyange kahtalan-e ngengpalan hüyange hipalante i, “Tüopa kahtawe tomante teman Kahwang Youngwanpa min me ngaoyangki; I-a li ne tamlak ne wange yenang.”

¹⁷Tüophei me, lwngmeilan ütam yong hüyange kahtalan aoyin jemme ngoh imante i,

¹⁸“Aope Judah me Hezekia ahngne ngoh, Moresheth hipa Maika-e kahta khongküm pute Ütahpa Youngwanpawe hüke i she i: “ ‘Zion-a kah kih-e lüohtamlak, Jerusalem-a heamme jealak, hüyange khümjing kahmüoh-a phaone menglak.’

¹⁹Ahngpa Hezekia hüyange Judah kahtalan-e Maika li ne yetam. Tüo nanlei, Hezekiawe Youngwanpate nyam hüyange I monghah tamlak jingne ngang. Hüyange Youngwanpawe iman tangme Iye mahtamlakpa peitamlak she Iye ngaoyangpu mepu I juteih jeilei. Sha-a teman nying nyingke teman tangme fajümlihpu phei mahlakpa peine oteiye ngohnang.”

²⁰Üne-o ülao kahta ja ngoh, Kiriath Jearim mepu Shemaiah üha Uriah, aowe Youngwanpa min me tüopa chingnyu hüyange jat phei tüi-e Jeremiawe ngaopu kih-e muh ngao.

²¹Aope Ahngpa Jehoiakim hüyange Ijing wetaipalan hüyange üyonglan-e Uriahwe hanghe i tüopa jai, ahngpawe I yah-e toilak jingne ngang. Hüpoi Uriah-e tüopa jeng jai; tüokhei nyampu phei I phette tai hüyange Egypt me yinne ngoh.

²²Tüoyangpoi, Ahngpa Jehoiakimwe Acbor üha Elnathan hüyange ülao kahtalan ütam Uriah yahlak jingne Egypt te shon.

²³Iman-e Ahngpa Jehoiakim tangte I yahye, aowe I yahyange toi hüyange I manga bangnyuha mangjongme shüppe tüoh.

²⁴Hüyangpoi Shaphan üha Ahikam-e Jeremiate jampu ngohpu jingne, I-a toilak jingne kahtalante phünne yepha tam.