Read Konyak Naga JEREMIA 27 Bible Online

JEREMIA 27 - Konyak Naga bible

JEREMIA 27

¹Josiah üha Zedekiah Judah ahngne mengpu phei jamshe Youngwanpa ngao Jeremiate pei,

²Youngwanpawe hüke i: meisho kakyange hüyange pesho yah-e wenaone sha-e nang nying nyingke sheam lingyange hatüowa nang üngme paitüoh.

³Tüophei me Youngwanpawe aoyin lampulan Ahngpa Zedekiah phei hüolak jingne Jerusalemte peinang iman te Edom, Moab, Ammon, Tyre, hüyange Sidon ahngpalante ngaolan shonlak jingne i.

⁴Israel Kahwang, Ütahpa Youngwanpawe iman ahngpalante Youngwanpawe hüke inang she itüoh she ngaokeng pha:

⁵“Ü-üngan ülong hüyange konhei wong üyongpuwe Taowe kahtoknyu, kahtanyuha, hüyange kahtok me ngohpu yinmoknyuha khongküm lingengai; hüyange Taowe tüolan-a aoyin Taowe leyangki imante pha.

⁶Tüolan jatlan khongkümpu ü-shaoshanpa Babilonia Ahngpa Nebuchadnezzar wong phangme aowe angne tamyapeih hatüowa Tao ngohnang, hüyange taowe phao yinmoklan-e nehoi I shaoshanne linge tam.

⁷Jatlan khongkümpuwe I shaoshanlak, hüyange I yoi jatli yeilak hipak manngoi manngoi iman-e Iha hüyange Ihulan shaoshanlak. Tüophei me I jat-e wongnangpu jatlan hüyange ahng üyonglan shaoshanlak.”

⁸“Hüpoi jat ütam yejema-a ahngching ütamme Nebuchadnezzar tüopa Babilon wanglam lampa phangte yepeima-a, hüma-a tüopa jat te Taowe wehok, seanyao yengle, hüyange daktin phei Taowe Nebuchadnezzarte lanshe menge winne tamshao me shaoshiyateng ne tamlak.

⁹Numan yomepu hipalan yejema-a ütamja aowe ngoikülak jeng iye ittengaopu oklakei she, mang me yejema-a litepulan yahate nyikyange yejema-a nyien-nyenge she ilakei tüopate tahjai. Iman khongkümpuwe Babilon ahngpa phangte numan ye-onglak jingne numante iphalak.

¹⁰Iman-e numan lowelamne tamnang hüyange numan kahmük mepu üjaite yahteine tampu ngaiphalak. Taowe numante janglak, hüyange numan mahtamlak.

¹¹Hüpoi jat ütamme Babilon ahngpa phangte peima-a hüyange I shaoshanma-a, hüma-a Taowe tüopa-a yoi kahmük me ngohne muh, tüopa hamne hüyange tüoken me nyoine tamlak. Tao, Youngwanpawe ngaoyangki.”

¹²Judah Ahngpa Zedekiah te-o Taowe jakihpu muh ngaoyangki, “Babilon ahngpa phangte ongtüoh. I hüyange I kahtalan shaoshantüoh, hüyange numan üyin ngohlak.

¹³Hangne numan hüyange numan kahtalan wehok me yejema-a seanyaoyengleye yejema-a daktin phei lilak shi? Aoyin jat-e Babilon ahngpa phangte yeonglakei Youngwanpawe hanghe iyangki tüopa ngailak.

¹⁴Hipalan aoyinne numante Babilon Ahngpa phangte tah ong she iyapeih imante tahjai. Iman-e numan lowelamne tamnang.

¹⁵Youngwanpa Iye yoi nying nyingke iman-a yeshontam hüyange iman-e I min me numante ngaoleih inang she iyangki. Tüojingne Iye numan jange teilak, hüyange numan-a toilak, numan hüyange hipalan aoyinne numante tüopa ngaoleih ngaowe tamnang.”

¹⁶Hüwante ngengpalan hüyange kahtalante Youngwanpawe hüke inang she taowe ngaowetam: “Hipalan aoyinne khümjing tük-hei-sheng Babilon mepu mamshe yah-e yelak she inang imante tahjai. Iman-e numante tahleih inang.

¹⁷Iman ngaote tahjai! Babilon ahngpa phangte peitüoh hüyange numan üyin ngohlak! Hangne tüopa chingnyu jant kih-e phonge heamlakshi?

¹⁸Iman ütingpa hipalan ne mengma-a hüyange iman me ü-ngaolan ngohpu ne mengma-a, iman-a khümjing me ngohpu tük-heisheng yahteine yetamlak jingne hüyange Babilon ahngnokte yah yeteitamlak jingne, iman-e ütahpa Youngwanpa, Üte tongne tamtüoh.”

¹⁹Hangjingne hüke ngangpupa Youngwanpawe inang, shongnyulan, shakphanyan yengnung, yonglaklan hüyange khümjing tük-shenglan hangheyin tüopa chingnyu me ngohyangki,

²⁰tüolan-a Babilonte ahngpa Nebuchadnezzarwe yah yeteipe tüoh; hüpoi Iye Jerusalem mepu Babilonte chingtaipalan-e, Judah ahngpa Jehoiakim üha Jehoiachin (Jeconiah), hüyange Judah hei Jerusalem mepu üyih üyonglanpa-a yah teiyangki.

²¹“Tao, Ütahpa Youngwanpa, Israel Kahwange hanghe khümjing me tüohpu tükshenglan hüyange Jerusalem ahngnok me tüohpu jeng i tüopa te jaitüoh:

²²Tüolan-a Babilonte yah teilak hüyange Taowe imante leih manlei manlei tüoken me ngohlak. Tüophei me Taowe iman yah yelak hüyange tüopa nyoime tüolan-a angtamlak. Tao, Youngwanpawe ngaoyangki.”