Read Konyak Naga JEREMIA 28 Bible Online

JEREMIA 28 - Konyak Naga bible

JEREMIA 28

¹Tüopa wangpeng memuh, Zedekiah ahngne mengpu wangpeng peli lekeng nga shepupa me, Azzur üha Hananiah, Gibeon mepu hipa jawe khümjing me üte ngao. Ngengpalan hüyange kahtalan shongme Iye üte hüke i,

²Israel Kahwang, Ütahpa Youngwanpawe hüke i: “Babilon ahngpa ünganwong Taowe menge tamteki.

³Wangpeng ni mongme Taowe tüopa nyoi me Ahngpa Nebuchadnezzarwe Babiloniate yahteipu khümjing tük-sheng khongkümpu yah yelak.

⁴Taowe üne-o Jehoiakim üha Judah ahngpa Jehoiachin, Judah kahtalan khongkümpu phei aoyin Babilonte phowe tei, yah yelak. Üting, Taowe Babilon ahngpa ünganwong menge winlak. Tao, Youngwanpawe ngaoyangki.”

⁵Hüwante ngengpalan hüyange kahtalan khongkümpu aoyin Kahwang khümjing me yongyange omme ngoh hüwante, Jeremia-e Hananiah te i:

⁶“Amen! Youngwanpawe hüke lingne tamshih! Nange itte ngaoyangpu Iye ütingpa me peine tamkülak she taowe ütingme monghüm nang hüyange Babilon mepu khümjing tük-sheng khongkümpu, hüyange kahtalan khongküm aoyin küpnok me phowetei yahyelak.

⁷Hüpoi taowe nangte hüyange kahtalante hanghe i jaitüoh.

⁸Hipalan aoyinne üshongwante muh ngao, ü-hipak hüyange nang hipak shao me, wehok, seanyaoyengle, hüyange daktin jatlan maapu tangme hüyange wongnangpu ahngchinglan tangme peilak she ittetam.

⁹Hüpoi hipa ja aowe chingmei jingne itte ngao tüopa hipawe itte ngaopu ütingme ngaiküme nakshih Youngwanpawe ao shonyangki tüopa hipa yang she shinge oklak.”

¹⁰Hüwante hipa Hananiahwe hipa Jeremia üng mepu sheam nowe yah, tüopa paiye khoih tam,

¹¹hüyange kahtalan üshei sheshao me hüke i: “Youngwanpawe iyangki jatlan üng me Ahngpa Nebuchadnezzarwe angtampu sheam hatüo kih-e Iye paitamlak; hüyange Iye hatüowa wangpeng ni mongme linglak.” Tüophei me Jeremia yoi lamte tai.

¹²Hipa Hananiah-e Jeremia hipa üng mepu sheam phakmeng phei me, üten ja ngoh yange Youngwanpa ngao Jeremia te pei.

¹³Hananiah tangte taiye tüopa ngao itüoh: “Youngwanpawe hüke iyangki nange pee phei lingpu sheam phakke winne ok, hüpoi Iye tüopa-a yan phei leijeilak.

¹⁴Israel Kahwang, Ütahpa Youngwanpawe iyangki hüke Iye tüolan jatlan khongkümpu tangme yan sheam angtamlak hüyange iman-e Babilon Ahngpa Nebuchadnezzar shaoshanlak. Youngwanpawe iyangki hüke phao yinmoklan-e nehoi Nebuchadnezzar shaoshan ne Iye linge tamlak.”

¹⁵Tüophei me hipa Jeremiawe Hananiahte tüopa i, hüyange paowetam, “Jaihuyah, Hananiah! Youngwanpawe nang yeshontam, hüyangpoi nange tahleih iye kahtalante ütinglak ne tamnang.

¹⁶Tüokhei Youngwanpa Iye iyangki Iye nanga yahteilak. Tüopa wangpeng manlin pemuh nanga lilak hangjingne Youngwanpa phei hokkewelak jingne nange kahtalante ngaowe tam.”

¹⁷Hüyange tüopa wangpeng memuh lekeng nyit shepupa me Hananiah li.