Read Konyak Naga JEREMIA 29 Bible Online

JEREMIA 29 - Konyak Naga bible

JEREMIA 29

¹Tüolan-a Jeremia hipawe ngengpalan, hipalan, kahtalan woipalan hüyange ülaolan khongkümpu aoyin Nebuchadnezzarwe Jerusalem mepu Babilonte phowe tei tüolan tangte nyanpu lai ngoh nang.

²Tüopa-a Ahngpa Jehoiachin, Inyu, ahngnok woipalan, Judah hüyange Jerusalem woipalan, yak aijonpalan, hüyange okkeshange toi lingpalan phowe teiyangphei me nyan.

³Jeremia nyanpu lai-a Shaphan üha Elasah hüyange Hilkiah üha Gemariah, aoyin Judah Ahngpa Zedekiah-e Babilon Ahngpa Nebuchadnezzar tangte shonne tei tüolan me pha. Hatüo me hüke i:

⁴“Israel Kahwang, Ütahpa Youngwanpawe, aoyin kahtalan Jerusalem mepu Babilonte phowe teilak jingne Nebuchadnezzar te Iye tampu üsheite inang:

⁵‘Noklan wetüoh hüyange chingnyoi tüoh. Pesha hamtüoh hüyange tüopa mepu hanghe ngai hahtüoh.

⁶Sheko yahtüoh hüyange hayimlan puhpaitüoh. Numan hayimlan-o mata tongnüngne tamtüoh, hüyange imane-o ha-nao ngohlak. Numan mah-yetape shangtoi me jaalunlak yang.

⁷Hüpoi ümeken me taowe numan phowe teipalan-e linge tam tüopa chingnyu meilak jingne toi lingtüoh. Iman nanleiye üte yoptüoh, hangjingne iman jaalunma-a, numan-o jaalunlak,

⁸Tao, Youngwanpa, Israel Kahwange hipalan aoyin numan yo me ngoh yejema-a ülaolan aoyinne ngoikülak juwan iman-e itpu oklakei she inang imante numan nying nyingke lowelamne tahtam she Taowe deingao phanang. Iman-e mangpu mangte mongtah pha.

⁹Iman-e numante ü-min me tahleih inang. Taowe iman yeshontam. Tao, Youngwanpawe ngaoyangki.’

¹⁰“Youngwanpawe inang, ‘Aope Babilonlan jing wangpeng denyit linlakei, Taowe ümong hahpu numante hüolak hüyange numan nokte yah yelak jingne janpu ütahte ngaitamlak.

¹¹Numan jingne Taowe tümpuwa ü-shahawe shingnang, numante mahtamlakpa yeje hüpoi jaalunne tümpu, ngoikülak jingne numan-e monghümpu jeng yahpeilak tümpu.

¹²Hüwante numan-e üte nyiklak. Numan peilak hüyange üte yoplak, hüyange Taowe numante janlak.

¹³Numan-e Tao yamlak, hüyange numan-e Tao tüolak hangjingne ima-a numan-e Taowa numan mongjang üsheiye yamlak.

¹⁴Üting, Taowe inang, numan-e Tao tüolak, hüyange Taowe numan-a numan kahmük me angtamlak. Taowe numan kahmük lili mepu hüyange üken phe mepu ümeken me Taowe numan yanne tam; hüyange hanghepa kahmük mepu Taowe numan phowe teine tam tüopa kahmükte numan yahyene tamlak. Tao, Youngwanpawe ngaoyangki.’

¹⁵“Hangjingne Youngwanpawe Babilon me numante hipalan phayangki she numan-e i.

¹⁶David-e wanglam lampu ahngchingme aohipa ahnge wanglam lam hüyange tüopa chingnyu mepu kahtalan jeng, hatüowa numan pheipulan aoyin numan phei jamme phowe yetei tüolan jeng Youngwanpawe hanghe i jaitüoh.

¹⁷Ütahpa Youngwanpawe inang, ‘Taowe wehok, seanyao yengle, hüyange daktin iman tangme yah peinang, hüyange Taowe iman-a hahlak jingne jamloi yemeipe yüm-e mahtepu phuklick kih-e linge tamlak.

¹⁸Taowe imante wehokke, seanyao yengleye, hüyange daktin phei janglak, hüyange kahtoknyu jatlan khongkümpuwe iman-e hanghe nge tüopate yashanyali nyamlak. Üken phe me Taowe iman yanne tam, kahtalan yashanlak hüyange imante hanghe ngai tüopate nyamlak. Kahtalan-e imante yaowelelak hüyange iman min phoiwümpu ja ne jonlak.

¹⁹Tüolan-a imante ngailak hangjingne ü-shaoshanpalan hipalan Taowe imante yelakpe shonpu ngaolante iman yejai. Iman-e minjai she lan.

²⁰Hüpoi sha-a numan khongküm aoyin Taowe Jerusalem mepu Babilonte phowe tei, Tao Youngwanpawe, hanghe i, jaitüoh.’

²¹“Israel Kahwang, Ütahpa Youngwanpawe Kolaiah üha Zedekiah aoyinne Imin me numante tahleih ngaoyangki imanjeng ngaoyangki. Iye iyangki hüke Iye iman-a Babilon Ahngpa Nebuchadnezzar yak me phünne phalak, aowe numan sheshao me iman li ne tamlak.

²²Aope kahtalan aoyin Jerusalem mepu Babilonte phowe tei iman-e ütam jate phoiwümpu yahpeihuwante, iman-e ilak, ‘Youngwanpawe numan Zedekiah hei Ahab kih-e jonne tamshih, aoyin Babilon ahngpawe üyin me vün me yangne tam!’

²³Hatüowa iman yatuhshao ne menglak hangjingne iman-a nyam nyamshepu ünulan püohyangki, iman-e yoi yupi shekolan phei phwngngam yangki hüyange Youngwanpa min me tahleih ngaoyangki. Hatüowa Youngwanpawe mongpu phei tüi-e yongpu; iman-e hanghe lingyangki Iye shingnang, hüyange iman jingne I-a saki ja. Youngwanpawe ngaoyangki.”

²⁴Israel Kahwang Ütahpa Youngwanpawe Nehelamlan Shemaiah jingne üte ngaolan ja pha;

²⁵aowe yoi min me Jerusalem kahtalan khongkümpute hüyange Maaseiah üha Zephania ngengpate hüyange ülao ngengpalan khongkümpute nyanpulai shon. Tüopa nyanpulai me Shemaiah-e Zephaniate hüke nyan:

²⁶“Youngwanpawe Jehoiada nanleiye ngengpa ne nang menge tamnang, hüyange sha-a nanga khümjing me ütahpa woipa. Ngapa kahta lili aoyinne hipa ja ne linge hüonang yanne shalak hüyange yankeileiye I üng neikonne yükke tamlak linglaka nang toishao ngohnang.

²⁷Hangne nange hatüokih-e Anathothlan Jeremiate aowe hipa ja ne lingyange kahtalante ngaonang yelingpu?

²⁸I lakne tamlak yang hangjingne Iye Babilon me kahtalante iyangki hüke iman tüoken me hipak laowe phowe teiye anglak hüyange noklan welak, chingnyoilak, pesha hamlak, hüyange iman-e hanghe deiye ngai hahlak.”

²⁹Nyanpulai-a Zephania-e Jeremia jaiye iye hüo;

³⁰hüwante Youngwanpa ngao Jeremia te pei i:

³¹“Phowe teipu khongkümpute shontüoh, hüyange itüoh, Nehelamlan Shemaiah jeng Youngwanpawe hüke inang: hangjingne Taowe yeshontampute Shemaiahwe numante hipa ja ne itpu pha, hüyange numan ngaoleihte ütinglakne tam;

³²tüokhei hüke Youngwanpawe inang, leihuyah, Nehelamlan Shemaiah hüyange I me jalunpulan Taowe shaoshine tamlak, Taowe ü-kahtalante ümei linglak ne ngohpu-a tüopa kahtalan yo me ngelak üne sheja nehoi I jingne üyin yengohlak she Youngwanpawe inang, hangjingne Iye Youngwanpa phei hokkewelak jingne ngaoyangki. Tao, Youngwanpawe ngaoyangki.”