Read Konyak Naga JEREMIA 3 Bible Online

JEREMIA 3 - Konyak Naga bible

JEREMIA 3

¹Youngwanpawe inang, “Kahta jawe yoi shekonyu yanne tamküma-a, hüyange yhawe I tüohma-a hüyange ülao kahta ja shekonyu ne mengma-a, Iye yha nishe yah yene ye-ok. Hatüowe kahmük lanshe nuwe tamlak. Hüpoi, Israel, nangme nangmailan üngang ngoh yangki, hüyange sha-a nang ü-tangte leih ye hunang!

²Kahmüoh ütanglante leitüoh. Ümeken me nange phwngngampu toi yelingpu nyoijing ütam ja nehoi ngohya? Wanwüng jengme mahlak jingne Arab-e tanne ngohpu kih-e, nange nangmai jingne lamnah me tanne ngohyangki. Nange kahmük-a nang phwngngampuwe nuwe tamteki.

³Tüojingne wai-a tükke lak, hüyange deidei lila me deiyangpu yengai. Tüoyangpoi nanga phwngngamnyu kih-e muh nge, nang me wüopu yenang.”

⁴“Hüyange sha-a nange üte inang, ‘Nanga üpa, hüyange tao naha ja ne ngohwante muh nange üte kenyangki.

⁵Nang hipak phe me mong tahshih; nange taowa jin jintepu jingne jiengpeiye tah ngoh Israel,’ hatüowa nange hanghe iyangki tüopa ngohnang, hüpoi nange ünu üshei nange okpu shinne, lingyangki.”

⁶Aope Josiah ahngne ngoh, Youngwanpawe üte i, “Üting yelakpu sheko kihpu, Israel-e hanghe ling nange ngeya? Yha ü-mepu lüppe yeteki, hüyange kahmüoh shedaopu lili me hüyange üyak pheipu peshüm phang lili me yhawe phwngngam nyu kih-e lingteki.

⁷Tüolan khongküm lingyang phei me, üting me yha-a ü-tangte lüppe yekülak she Taowe teih, hüpoi yha lüppe üye, hüyange üting yelak okpu yha pheipu nyanao Judah-e tüolan khongküm ngeteki.

⁸Taowe Israel yanne tamteki she hüyange yha taine tamteki hangjingne ima-a yha ü-mepu lüppe tai hüyange phwngngam nyu ne mengteki she Judahwe-o ngeteki. Hüpoi Judah, ütingyelakpu Israel nyanao-o nyamme yeteih. Yha phwngngamnyu ne meng,

⁹hüyange lanshe yewüo. Yhawe kahmük-a nuweshakke tam, hüyange yhawe long hei peelante yoppe khümpu kaiye nuweshakpu lingyangki.

¹⁰Hüyange tüolan khongkümpu phei me, Judah, ütingyelakpu Israel jing nya-nao, ü-tangte lüppe yelakei she lowelam; yha mongjang innyaipu phei yeje. Tao, Youngwanpawe ngaoyangki.”

¹¹Tüophei me Youngwanpawe üte hüke ngaowe i, I mepu Israel lüppe taiyapeyoi, ütingyelakpu Judah phei-a yha shemeipupa ne hüoyangki.

¹²Taiye Israelte ngaolak nanjingne Iye üte i, “Üting yelakpu Israel, ü-tangte leih yekei. Tao yayeng shüpshe phei hüyange mongshih yengailak; jin jintepu jingne nang phei mongshih ngaiye Tao yengohlak.

¹³Nange püohyangki hüyange Youngwanpa nang Kahwang phei tüi-e nange hokkeweyangki she hei iyah. Üyak pheipu peshüm phang lili me ülao kahwanglante nange kenpu phayangki she hüyange nange ü-ngaokenglan yejaipe ngohyangki she jantüoh. Tao, Youngwanpawe ngaoyangki.”

¹⁴“Üting yelakpu kahtalan, leih yekei; numan-a üjing ngohnang. bangching lili mepu Taowe numan japong hüyange nokphong lili mepu nipong yahlak, hüyange Taowe numan Zion Kahtangte yah yelak.

¹⁵“Aoyinne ü-ngao jai tüolan wanglam lampalan Taowe numante phalak, hüyange iman-e numan tangme konheingao hüyange üpongtüowe okpu phei wanglam lamlak.

¹⁶Tüophei me aope tüopa kahmük me okkeshange jalunlakei, kahtalan-e shaaji ü-phei jiengjeppu ghonu jeng yengaolak. Iman-e shaaji tüopa jeng yeteihtüolak yejema-a tüopa teih yepeilak; iman-e tüopa-a wongpongne-o yemenglak, yejema-a iman-e ülao üla ja linglak wongpongne yemenglak.

¹⁷Aope tüopa hipak peilakeih, Jerusalemte ‘Youngwanpa Ahngpa Shotjing’ she nyiklak; hüyange jatlan üshei üte yoppe khümlak jingne tüopa me jemlak. Iman-e shaaji iman üngei ne mengpu hüyange ümengpa mongjange imante ngaowe tampu yelinglak.

¹⁸Israel Judah phei jamlak, hüyange iman jamme phowe ngohpu apyekao kahmük mepu peilak hüyange numan pajeiyonglan te Taowe jintepu moth ne phapu kahmükte leih yelak.”

¹⁹Youngwanpawe inang, “Israel, Taowe nanga ü-ha kih-e yahhuwe teih hüyange kahyao nangpu kahmük, kahtoknyu üshei yo me shemeipupa kahmük nangte pha. Taowe nange üte opa she nyikne tamhuwe teih, hüyange shaaji nishe ü-mepu lüppe yetaitamlak she teih.

²⁰Hüpoi ütingyelak okpu shekonyu kih-e, nange üte ütingyelakpu ngoh yangki. Tao, Youngwanpawe ngaoyangki.”

²¹Kahmüoh ütang me moppu ngao jainang: hatüowa Israel kahtalan shappu hüyange tongemongpu ngoh nang; hangjingne ima-a iman ünupa üyin ne ngohyangki hüyange iman Kahwang Youngwanpa pe-mei.

²²Leihyetüoh, numan khongküm aoyin Youngwanpa mepu lüppe tai; Iye numan meiye tampha lak hüyange ütinglakke tamphalak. Numan-e inang, “Eihja, toman Youngwanpa tangte leih yenang, hangjingne I-a toman Kahwang.

²³Toman-e kahmüoh kahtanglan me ülao kahwanglante yoppe khümpu me tomante jampu hango yenang. Israel jingne jampuwa Youngwanpa toman Kahwang mepu hei peinang.

²⁴“Hüpoi wüolakpa Kahwang, Baalte yoppe khümpuwe, üshong wantemuh toman pajeiyonglan-e linge ngaiye angpu nyee-ükhong hüyange mahu ükhong, hala hei yhalalan shemin lampheye tomante khaine tam.

²⁵Wüokhüw puphei teman lamyange ngohlak yang hüyange teman tangme wüotüopuwe minyüoh yah. Teman hüyange teman pajeiyonglan-e hipak phe me teman Kahwang Youngwanpa phei tüi-e ünu omyangki; teman-e aope-o I ngaokhümlan yejai.”