Read Konyak Naga JEREMIA 30 Bible Online

JEREMIA 30 - Konyak Naga bible

JEREMIA 30

¹Youngwanpa mepu Jeremia tangte peipu ngao:

²Youngwanpa, Israel Kahwange hüke inang: “Taowe, nangte ngaoyangpu lili laitep ja me nyantüoh,

³hangjingne hipak-a peiküki, aope Taowe Israel hüyange Judah ü-kahtalan lingeyelak! Taowe iman pajeiyonglante phapu kahmükte Taowe iman yah yelak, hüyange iman-e tüopa mepu moth nishe tüolak. Tao, Youngwanpawe ngaoyangki.”

⁴Youngwanpawe Israel hei Judah kahtalan jingne ngaopu hatüo:

⁵Youngwanpawe hanghe i hatüo: “Yawinmongpaipu üngwünpu ja Taowe jainang, chingmei yeje hüpoi nyampuwe üngwünpu.

⁶Sha-a laktüoh hüyange teihtüoh! Netan jawe nao puhlak a? Hümma-a hangne netan lili moipai wantepu sheko kih-e yoi yoi yak sea me yimyange Taowe ngepu? Hangne moilan teshinne sheta kuiye mahpu?

⁷Fajümlihpu nyih ja peiküki; tüopa phei ülao nyih hango phinne ye-ok, ü-kahtalan jingne shangpu hipak ja, hüpoi iman tüopa mepu yangpu oklak.”

⁸Ütahpa Youngwanpawe inang: “Aope tüopa nyih peilakeih, imanjing üng me neikonne ngohpu sheam Taowe mengwinlak, hüyange imante shapu yankeilei lantamlak, hüyange iman shaaji ülao jatlan rhalan ne yengohlak.

⁹Hüleima, iman-e imanjing Kahwang Youngwanpa, hüyange David iman ahngpa, ao Taowe ahngpa shotjing me ahngne shot tamlakei, shaoshanlak.”

¹⁰“Tüokhei, O Jacob ü-kahtalan, nyamme tahngoh; Israel kahtalan, yawinmongpaiye tahteih; Tüopa kahmük üjai mepu Taowe numan yinlak, ümeken me numan phowe teiye ngohyapeih tüopa kahmük mepu! Numan nokte leih yepu oklak hüyange chingmei me nyoilak; numan yinpu okke ngohlak, hüyange aowe-o numan nyamne yetamlak.

¹¹Tao numan tangte peilak hüyange numan yintam lak. Taowe jatlan khongkümpu mahtamlak, ümeken me Taowe numan yanne tam; hüpoi Taowe numan-a mahne yetamlak. Shaoshiyateng yephatampe Taowe numan taine yetamlak; hüpoi aope Taowe numante shaoshiyateng phalakei, Taowe meiye jonlak. Tao, Youngwanpawe ngaoyangki.”

¹²Youngwanpawe yoi kahtalante inang, “Numan maakolan-a meine ye-oklakpa, numan mayahpulan-a meine ye-ok.

¹³Numante paowe tüklak sheja nehoi yenang, numan maa meilak ülam yenang, numan meiye oklak monghümlak hango yenang.

¹⁴Numante nyakkenpalan khongkümpuwe numan pemahteki; iman-e shaaji numan jingne paowe tükpu yenang. Taowe numante wepa ja leye shümyangki; numante shaoshiyateng phapuwa shüpshe yenangpe hangjingne numan ünuwa jamloi hüyange numan yejaoyeshapuwa yeonge yong.

¹⁵Numan mayahpulan jingne shaaji ngao tahngai; numan jingne meilak yenang. Taowe numante hüke shaoshi ne tam hangjingne numan ünuwa jamloi hüyange numan yejao yeshapu-a yeonge yong.

¹⁶Hüpoi sha-a, aowe numan lüngetai khongkümpu lüngetai tamlak, hüyange numan jing wepalan khongkümpu phowe teikümlak. Aowe numante yemeipe kon khongkümpute yemeipe konlak, hüyange aowe numante nyieyahne tam khongkümpute nyieyahne tamlak.

¹⁷Taowe numan nishe meiye lingtamlak, Taowe numan makolan meiye tamlak; numan wepalan-e hüke, ‘Zion-a ye-i-yeshepu jat, yha jingne paowetükpu ao-o yenang!’ she iyapoi. Tao, Youngwanpawe ngaoyangki.”

¹⁸Youngwanpawe inang, “Taowe ü-kahtalan iman kahmükte lünge yetamlak, hüyange noksalan lilite shüpshepu ngohlak; Jerusalem linge welak, hüyange tüopatepu ahngnok lingyelak.

¹⁹Kahtalan aoyin tüoken me nyoilakei yihlupu loklak; mongmeipuwe iman-e üngwünlak. Ü-moiman kaiye iman shangtoi jaalunlak; Ü-moimanne imante yihnoonpu yahpeilak.

²⁰Üshongwantepu ünganwong jat jingne Taowe linge yelak, hüyange üjüngmonge nishe nyoine tamlak; aoyinne imante yemeipe kon khongkümpute Taowe shaoshiyateng ne tamlak.

²¹Imanjing wanglam lampalan-a iman yoi jat mepu, imanjing ahngpa-a iman yoi kahtalan mepu ngailak. Aope Taowe Ite nanphenglakei I ü-shongte peilak, hangjingne nanyepheng pute peilak ne ao mongyonge ngohlak? Tao Youngwanpawe ngaoyangki.”

²²Numan-a ü-kahtalan ne menglak, hüyange Taowa numanjing Kahwangne menglak.

²³Youngwanpa mongshih ngaipuwa waishihwangkhahpu ja leye, nyamlakpa wangyang tüopawe ümenglan shangtang me shokke tamnang.

²⁴Iye lingne teihyangpu khongküm manling shopute Youngwanpa mongshih ngaipu tüopa-a lakne ye-ok. Ngoikülak nyih hipak me I kahtalan-e tüopa-a meimei-e shinge oklak.