Read Konyak Naga JEREMIA 31 Bible Online

JEREMIA 31 - Konyak Naga bible

JEREMIA 31

¹Youngwanpawe inang, “Tüopa hipak me Israel nokphonglan khongkümpu jingne Taowa Kahwangne menglak, hüyange iman ü-kahtalan ne menglak.

²Youngwanpawe hatüo inang: Phaonyu jong me aoyin kahtalan lilak mepu yinne ok tüolante Taowe shüpshe hüo. Aope Israel kahtalan-e toloimei jingne yoonge teih,

³üjai me Youngwanpa iman sheshao me ngaiye hüo. Israel kahtalan, Taowe numante hipak phe me kennang, tüokhei Taowe numante ümonghümpu yelakpe hüonang.

⁴Nishe Taowe numan linge yelak, hüyange numan lingeye-e ngohlak, O Israel yhashaoha! Nishe numan-e numan jing pheamkao jonlak hüyange hoongli mongongpu phei poloklak.

⁵Nishe numan-e Samaria kahtanglan me wuwüngwu shomlak, hüyange aoyinne tüolan shomyapeih tüolan-e wuwüngwu-e hanghe lickke tam tüopa hahlak.

⁶Üting, hipak ja peiküki, aope weyompalan-e Ephraim kahtanglante nyik-e ilak, ‘Teman Kahwang Youngwanpa Zion tangte onghah.’ ”

⁷Youngwanpawe inang, “Israel jingne mongong monglepu phei hem loktüoh, jatlantepu sheyongpupa. Numan-e minyong phapu hem lok tüoh, ‘Youngwanpawe yoi kahtalan yinne tamyangki; aoyin towe tüoh khongkümpu Iye yinteki.’

⁸Leihuyah, Taowe iman apyekao mepu yahpeilak, hüyange kahtoknyu üküm yekao mepu iman shaijemlak. Iman phei jamme mükmüopa hüyange yafaipalan, püm yekengpu shekolan hüyange aoyinne shaaji nao wangngai ngetamlak jingne oteiye ngoh peilak! Iman jatnyu ja ne leih yelak.

⁹Ü-kahtalan shapjang shappe hüke Taowe iman leih yah yewante yopjang yoppe leih yelak. Taowe iman yengpheipu yengyin kaiye, nyelehpu lamnyu ümeken me iman yashah yehüolak kaiye woilak. Taowa Israel tepu üpa kih-e hüyange Ephraim-a Ü-hashongha.”

¹⁰Youngwanpawe inang, “Jatlan, üte jaiyah, hüyange yengnah üjai yekaote ü-ngaolan pongtamtüoh. Taowe ü-kahtalan yanne tam, hüpoi, Taowe iman jemnetamlak hüyange nyeeyompawe yoi nyee ükhong yompu kih-e yomlak.

¹¹Youngwanpawe Israel kahtalante lantampu phateki, hüyange wongnangpu jat mepu iman yintamteki.

¹²Iman peilak hüyange Zion kahtang me mongmei puwe hem loklak, hüyange ü-hünghaolan phei müktishiwa ne tamlak, pelick weanglick hüyange wuwüngti hüyange olive minnga hünghaolan, mahu hüyange nyee hünghaolan phei. Iman-a meimei-e yeng shokke tampu pesha kih-e, iman-e wongpongne mengpu khongküm iman-e tüolak.

¹³Hüwante naoyhalan-e poloklak hüyange mongmeilak, hüyange kahtalan, lwngmei hei naha mongonglak. Taowe iman monghahne tamlak hüyange iman shapyoongpuwa mongmeine, iman mongmenga mongong mongle ne linge tamlak.

¹⁴Taowe ngengpalan-a hahying üngang phei maatamlak, hüyange ü-kahtalan wongpong lili wangngoiye tamlak. Tao, Youngwanpawe ngaoyangki.”

¹⁵Youngwanpawe inang, “Ramah me ngaowüng ja jai, khah-e shappu ngaowüng ja. Yha hayimlan jingne Rachel shapnang; iman yenang, hüyange yhawe toloi yemeihu.

¹⁶Youngwanpawe inang: Nang shappu laktüoh hüyange nang mükphi phutte wintüoh. Nang hayimlan jingne nange lingyangpu khongkümpute khintak yetüope yengohlak; iman wepalan kahmük mepu leih yekülak.

¹⁷Nangjingne ngoikülak hipak me monghümlak ngohnang; nang hayimlan nokte leih yekülak. Tao, Youngwanpawe ngaoyangki.”

¹⁸“Ephraim kahtalan-e mongshang mongmeng puphei ipu taowe jainang, ‘Youngwanpa, toman-a yetampu yinmok ja leye ngohnang, hüyangpoi ngao jailak jingne nange tomante nyüoyangki. Toman leih yene tampha; toman Kahwang Youngwanpa nang tangte leih yelak jingne toman tümyange ngohnang.

¹⁹Toman nang mepu lüppe taiyangki, hüpoi mamshe muh toman leih-e yehunang. Nange tomante shaoshiyateng ne tamyang phei me, toman-e mongshang mongmengpu phei toman ngüm phan. Toman wüotüowe hüyange mongshange ngohyangki, hangjingne aope toman naha ne ngoh toman-e ünu omyangki.’

²⁰“Ephraim, nanga ü-mongkenpu halom, Taowe shemeishe kenpupa naha. Hangkih tingme Taowe nang phei tüi-e ngaolakei, Taowe nangte-a kenpu phei teih nang. Ümongjanga nangme pha nang; Taowe shüpshelak, she Youngwanpawe ngaoyangki.

²¹Yepinlakpa ja yongtüoh hüyange lamnyu ümee hüotüoh; hangheye nang tüohyangki tüopa tailam nishe tüoyah. Leih yekei, Israel kahtalan, nange tüohyangpu jila nokte leihyekei.

²²Hangshin laowe numan nüngneilak, üting yelakpu yhalalan? Hangjingne Youngwanpawe üla ülamja hüyange yoi yoi lingteki, yoiyoi-a sheko jawe netanja jongwan okpu kihpu.”

²³Israel Kahwang, Ütahpa Youngwanpawe inang, “Aope taowe kahtalan iman kahmükte ngohne tamlakei, iman-e nishe Judah kahmük hüyange tüopa tepu jilalante ilak, “ ‘Youngwanpawe Jerusalem üjao kahtang, Üjaopa nyoi ümeken me I nyoi moiman pha.’

²⁴Judah hüyange tüopa mepu jilalan khongkümpu me kahtalan nyoilak, hüyange kahhampalan, hüyange nyeeyompalan iman nyeekhong phei ngohlak.

²⁵Aoyin mongshang nang Taowe monghah tamlak hüyange aoyin seanyaopuwe wong yenangpe ngohnang, moilan hahying phei mohne tamlak.

²⁶Tüome nakshih, kahtalan-e ilak, ‘Tao shiyeta hüyange menghapu phei shinlüo.’

²⁷“Tao, Youngwanpawe inang hüke aope Taowe Israel hüyange Judah kahmük kahtalan hüyange yinmoklan ne maatamlak hipak peiküki.

²⁸Hüyange Taowe iman bheiwinlak jingne, shuwe yeilak jingne, nowe winlak jingne, mahtamlak jingne, hüyange shümme tamlak jingne shom-aipu kih-e, tüokih-e muh Taowe iman shomme tamlak jingne hüyange iman linge yelak jingne paowe tüklak.

²⁹Aope tüopa hipak peilakeih, kahtalan-e shaaji hüke ye-ilak. “ ‘Nyupalan-e wuwünglick üshi hah, hüyange hayimlan-e fa me üshi pong;’

³⁰Hüleima, aoyinne wuwünglick üshi hahyalakei iman yoi fajümlak; hüyange yoi ünu jingne moilan lilak.”

³¹Youngwanpawe inang, “Aope Taowe Israel kahtalan phei hüyange Judah kahtalan phei jiengjeppu üla linglak hipak ja peiküki.

³²Hatüowa Taowe iman pajeiyonglan phei lingpu jiengjeppu ülangpa, aope, Taowe üyakke iman yahtei hüyange Egypt mepu taine tam tüopa kih yejelak. Imantepu netanpa kih Tao ngohyapeyoi, iman-e tüopa jiengjeppu ye-ang.

³³Ülapa jiengjeppu Taowe Israel kahtalan phei linglaka hatüo kih ngohlak; Taowe ü-ngaokhüm iman me anglak hüyange tüopa-a iman mongjang me nyanlak. Tao iman Kahwang ne menglak, hüyange iman-a ü-kahtalan ne menglak.

³⁴Iman yo me aowe-o yoi chingshao kahtalante Youngwanpa shinglak jingne teinyüopu yengohlak; hangjingne moilanne, üjoipa mepu üyongpa te ngoiye Tao shinglak. Taowe iman ünulan wintamlak hüyange Taowe shaaji iman-e püohpinpu yeteih tüolak. Tao, Youngwanpawe ngaoyangki.”

³⁵Youngwanpawe inang; aowe nyihning wangngai jingne wanghe phatam nang, wangnyak me teelak jingne linnyu shanhalan. Iye yengchinga leihkheih tamnang hüyange tüopawe yengmokh ngaone tamnang; I min-a Ütahpa Youngwanpa.

³⁶Iye hüke janpu ja pha, sheminlam phe hüke muh ngohpute ngoiye, teshinne laowe Israel jat ja ne muh ngohlak.

³⁷Youngwanpawe hatüo inang: Nyih ja me wangdang itteshempu oklak ne mengma-a, hüyange kahtoknyu nokjing linge ngai oklakne mengma-a, hümme nakshih Taowe Israel kahtalan-a winne ok; iman-e lingyangpu khongkümpu jingne, Youngwanpawe ngaoyangki.

³⁸“Hipak-a peiküki,” Youngwanpawe inang, “Aope Jerusalem khongkümpu chingnyu ne henyip yekao Hananel daonok, mepu ünuk peten ngoiye linge yelak.

³⁹Hüyange yikeng lepuwa tüopa mepu yelakpe henyip yekao me Gareb kahtang hüyange Goah neikonne ngoiye ngohlak.

⁴⁰Kahjee nopu, ümeken me lipalan munang hüyange kahmak winnang, hüyange Kidron shaoyin ütokye kah khongküm heong yeme koipong Peten ngoiye, tüolan-a üjingne üjao ne menglak. Chingnyu shaaji nishe bheiye yewinlak yejema-a mahtampu yenanglak.”