Read Konyak Naga JEREMIA 32 Bible Online

JEREMIA 32 - Konyak Naga bible

JEREMIA 32

¹Judah me Zedekiah ahngne mengpu wangpeng pen shepupa hanghepa Babilon Ahngpa Nebuchadnezzar jingne-o wangpeng pen me tet shepupa ne ngohwante, Youngwanpawe Jeremia phei ngaoyangki.

²Tüohipak me Babilon ahngpa nyahponglan-e Jerusalem shümme ngoh, hüyange hipa Jeremia-a Judah ahngnok ghonyoi me küpyange ang.

³Zedekiah Ahngpawe tüoken me I-a phowe ang hüyange Youngwanpawe hüke ngaoyangki she ipu jingne Ite ümeng pha: “Babilon ahngpate taowe tüopa chingnyu omne tamlak,

⁴hüyange Zedekiah Ahngpa yinpu ye-oklak. I-a Babilon ahngpate phünne phalak; Iye sheta hei sheta teihüowe I mük-e tei ngelak, hüyange püm hüoyange Iye Iphei ngaolak.

⁵Zedekiah Babilonte yahteilak, hüyange Taowe Iphei manngao manngao I tüoken me hüng ngohlak. Babilonlan phei I hokyapeyoi, Iye okpu ye-ngelak. Tao, Youngwanpawe ngaoyangki.”

⁶Jeremia-e i, Youngwanpa ngao ü-tangte pei:

⁷“hüke üpajoi Shallum üha Hanamel Benjamin yikeng pong mepu Anathoth mepu I jing kah üte shakyah she tonge peilak, hangjingne taowa Ipheipu she-o-pupa hüyange üjingne shaklak-a shunang.”

⁸Hüwante üpajoi üha Hanamel yompalan ngohpu nokte Youngwanpa ngao kih-e ü-tangte pei ngoi, hüyange üte i, “Ü-kah shakyah, she taowe nangte yoptongnang; hatüowa Anathoth me ngohnang, hanghepa Benjamin kahmük me ngohnang; hangjingne yahlak hüyange mothleilak ne-a nang hei ngohnang; nang jingne hatüo shaktüoh.” Hüwante tüopa-a Kahwang ngao ne ngoh she taowe shing.

⁹Taowe Hanamel mepu kah shak hüyange Ite ngin iye pha; tüopatepu ümee khüm ükhüw penme nyit ne ngohyangki.

¹⁰Tümyangpu me taowe nyan hüyange füosange tüp, tüopate saki wangeyah, hüyange toklak me ngin tokke tam.

¹¹Tüophei me taowe shakke tümpu-füosang yangpu hüyange tüopa yafün hüyange phawe ngailakpa üpha, moini taowe yah,

¹²hüyange Mahseiah ühu hüyange Neriah üha Baruchte tüolan-a pha. Taowe Ite tüolan-a Hanamel shongme hüyange shakke tümme tapute aoyinne saki ne menge min nyan hüyange ghonyoi me aoyin shotte ngoh tüolan shong me pha.

¹³Iman sheshao me taowe Baruch te khongküm ngaowe tam,

¹⁴“Ütahpa Youngwanpa, Israel Kahwange nangte tüolan tümtapu, shakke nyanhe tümpu hüyange ngaiye phapupa üpha moini, hüyange tüolan-a kümp tük-sheng ja me anglak hümme nakshih wangpeng nangjange ngohlak ngaokeng pha.

¹⁵Ütahpa Youngwanpa, Israel Kahwange noksalan, kahlan, hüyange wuwüngkah nishe tüopa kahmükte yah yelak she i.”

¹⁶Shakpu teinyanpu taowe Baruchte phayang phei me, taowe Youngwanpate yop,

¹⁷“Okkeshangpupa Youngwanpa, nang ünganwong hüyange wong üyong kaiye nange kahtoknyu hüyange wangdang linge ngai; nang jingne meiyange wanpu hango yenang.

¹⁸Nange ha tokte ha te kenpu yelakpe hüo, hüyangpoi nange üne-o kahtalante iman nyupalan ünu jingne shaoshi yatengpu pha. Nang kheyongpu hüyange wongnangpu Kahwang; nanga Ütahpa Youngwanpa.

¹⁹Nange kentamongtingpu toishao tümnang hüyange wongnangpu toi lingnang; kahtalan-e lingpu khongkümpu nange ngenang, hüyange nange imante yoi toishao phei shuwe khintak phanang.

²⁰Hipak nangjange taiteki, nange Egypt me yashanyali hüyange yepinlakpa linge ngai, hüyange nange tüolan-a tenyih ngoiye yelakpe lingnang, Israel hüyange ülao jatlan khongkümpu moini sheshao me, tüokaiye sha-a nanga ükenphe me shingteki.

²¹Füo hüyange yashanyali kaiye toman wepalan nyamne tam, nang kahtalan Israel Egypt mepu ngailak jingne nange nang ünganwong hüyange okpupa jon.

²²Nange iman pajeiyonglan te janyangpu kih-e nange imante tüopa zahtai jelo hei düamyeng yünpu kahmük hüyange hakke-hepu pha.

²³Hüpoi aope iman tüopa kahmükte pei hüyange tüopa moiman yah, iman-e nang ngaokeng yejon yejema-a nange nyüowe tampu kih-e yengoh iman-e linglak jingne phapu iman-e hango yeling. Tüokhei nange iman tangme tüolan mahtampupa yahpeitam.

²⁴“Leihuyah, chingnyu neikonne tüopa shümme yahlak jingne meipe latteki, hüyange iman-e shümnang. Wehok, seanyaoyengle, hüyange daktin kaiye chingnyu-a iman yakte onglakyang. Nange hangheyin ngaoyangki khongkümpu ütingme peipu nange ngenang.

²⁵Tüoyangpoi, Okkeshangpupa Youngwanpa, chingnyuwa Babilon lan-e shümme yahshao shaowe ngohyapoi, sakipalan sheshao me kahtok shaklak jingne üte ngaokeng phapa-a nang ngohnang.”

²⁶Hüwante Youngwanpa ngao Jeremia tangte pei:

²⁷“Taowa Youngwanpa, kahtanyuha khongkümpu Kahwang, Üjingne ülamja yeonge wanpu ngohnang kü-a?

²⁸Leihuyah, Youngwanpawe hüke inang: Taowe tüopa chingnyuwa Babilon Ahngpa Nebuchadnezzar hüyange I nyahponglante phalak; iman-e tüopa-a shümme yahlak;

²⁹hüyange tüopa-a vün me jakke tamlak. Iman-e tüolan-a hanghepa noktoklan me iman-e Baalte sünyet jakke yoppekhüm hüyange ülao kahwanglante wuwüngti dopu shokke tampu linge Tao mongshih ngaine tam tüolan nokphei jamme jakke tamlak.

³⁰Hangjingne Israel hei Judah hayim-e ü-sheshao me hanghe yemeipu ngoh tüo hei iman shelawante muh lingyangki; ütingpa me Israel hayimlan-e tao mongmenge mongshih ngaitamlak ne iman yaktoi-e lingyangki, she Youngwanpawe inang.

³¹Tüopa chingnyu kahtalan-e tüopa chingnyu linge wangpu nyih memuh üte mongmeng hüyange mongshih ngailakpa ling tam. Tüopa mahtamlak jingne Taowe tümteki,

³²hangjingne ima-a Judah hüyange Jerusalem kahtalan-e khongkümpuwe iman ahngpalan hei woipalan, imanjing ngengpalan hei hipalan phei jamme ünu khongkümpu lingyangki.

³³Iman-e üte iman tokphei lüpteki; hüyange Taowe imante nyüoweleipu yelakpe ngohyapoi; iman-e yejailak hüyange shinge yeyahlak.

³⁴Üte yoppe khümlak jingne wepu khümjing me iman-e nunushepu imanjing peshao angteki hüyange iman-e tüopa nushakke tamteki.

³⁵Iman-e yoijing hayim naoyimlan Molech kahwangte toidopu phalak jingne Hinnom kahjee me Baal te wümjonglan linge tamteki. Tüopa linglak jingne Taowe imante ngaokeng yepha, hüyange iman-e hükihpu toi lingkülak she hüyange Judah kahtalante ünu omne tamkülak she ü-kenmongme nehoi teih-e yepei.”

³⁶Israel Kahwang, Youngwanpawe üte i, “Jeremia, kahtalan-e hüke tüopa chingnyu wehok, seanyaoyengle, hüyange daktin kaiye Babilon ahngpa yak me yeilak she inang. Sha-a Taowe üne-o hangheyin ngoh jaitüoh.

³⁷Ümong shihpu hüyange mongshih ngaipuwe Taowe ümeken nyoi me iman yanne tam, tüolan jatlan nyoimepu Taowe kahtalan shaijemlak; hüyange Taowe iman tüopa nyoi ngoiye yahyelak, hüyange iman tüoken me yinpu okke ngohlak.

³⁸Iman-a ü-kahta ne menglak, hüyange Taowa iman Kahwangne menglak.

³⁹Taowe imante mongjang ja hüyange tailam ja hei phalak, tüokaiye iman-e jinte üte nyamlak hüyange imante meilak hüyange imanjing huhayimlante meilak jingne ngailak.

⁴⁰Taowe iman phei üküm yenangpu jiengjeppu linglak. Iman jingne toimei lingpu Taowe aope-o yelaklak, hüyange iman mongjang üsheiye üte nyamne Taowe linge tamlak, tüokaiye iman aope-o ü-mepu lüppe yetailak.

⁴¹Iman jingne toimei lingpu me Taowe lahnyiklak, hüyange Taowe iman-a tüopa kahmük me ü-mongjang üsheiye hüyange ü-yaha üsheiye deiye jongne tamlak.”

⁴²Hangjingne Youngwanpawe hüke inang: “Tüolan kahtalan tangme Taowe mahtampupa peiye tampu meimei kih-e, tüo kih-e Taowe janyangpu toimeilam üshei Taowe imante phalak.

⁴³Tüopa kahmük-a wanwüngjeng ümeken me kahtalan jeyah yinmoklan ne jeyah yenyoi okpu nyoi ne menglak, hüyange tüopa-a Babilonlante phalak she kahtalan-e i. Hüpoi kahtalan-a tüopa kahmükte nishe yahyelak.

⁴⁴Kahtalan-e kah-a ngin phei shaklak, hüyange tümyangpulante nyanlak, yepinlakpa tüplak, hüyange saki phalak. Tüopa-a Benjamin yikeng mongme ngailak, Jerusalem neikonpu chingshaolan me, Judah me, hüyange phaotang kahmüklan mepu bangchinglan me, kahtang yashonglam me, hüyange Judah heyekao me. Taowe kahtalan-a iman kahmükte yah yetamlak. Tao, Youngwanpawe ngao yangki.”