Read Konyak Naga JEREMIA 33 Bible Online

JEREMIA 33 - Konyak Naga bible

JEREMIA 33

¹Aope Jeremia üne-o ghonyoi memuh küwyange ngohyapeih, Youngwanpa mepu ngaolan nishe I tangte pei.

²Youngwanpa aowe kahtoknyu ling, aowe tüopa yaowe ngai hüyange nyoijing linge ang; Aohipa min Youngwanpa ne ngoh Iye i,

³“Üte nyikpha, hüyange Taowe nangte janlak; Taowe nangte yashanyali hüyange yashanlakpa hanghepa jeng nange hango shinge yenang ipha ning.

⁴Tao, Israel Kahwang, Youngwanpawe inang hüke Jerusalem mepu noksalan hüyange Judah ahngnok phakke-khaiye yeilak. Babilonlan-e meipe latte tukyangpu phei tüi-e hoklak jingne ü-atte ngaiye hoklaka jajang japu.

⁵Hatüowa aoyinte Taowe ümong shihpu nyam nyamshepu ngaiye shette tamyapeih tüolan kahta mangshinpu hei chingnyu maalak. Tüopa mepu kahtalan-e ünu lingpu jingne tüopa chingnyu mepu Tao lüppe taiteki.

⁶Hüpoi Taowe tüopa chingnyu hüyange tüopa mepu kahtalan meiye tamlak hüyange iman pümtangta linge yelak. Taowe imante chingmei hüyange yintampu wangmanne hüolak.

⁷Taowe Judah hüyange Israel jalunne tamlak, hüyange iman üshongwante hangke ngoh hüke Taowe nishe jünglang linge yelak.

⁸Iman-e ü-phei tüi-e ünu lingyangpu mepu Taowe iman jaowe tamlak, hüyange iman ünulan hüyange iman-e ü-phei tüi-e teela-e ngaiyangpu Taowe ümeng winlak.

⁹Jerusalem-a mongmei, yihnoonpu, hüyange üte müktishiwa-e tampu üjingne menglak; hüyange kahtoknyu jatlan, lili aope iman-e Jerusalem kahtalan jingne Taowe lingetampu toimeilam jailakei hüyange chingnyute Taowe yahpeipu jalunpu jeng jailakei nyamlak hüyange ninlak.”

¹⁰Youngwanpawe i, “Kahtalan-e inang tüopa nyoi-a wanwüng jeng ja leye, hüke tüome kahtalan yejema-a yinmoklan yenyoi. Hüke ipu iman-a shunang; Judah jilalan hüyange Jerusalem püanglamlan-a ükeng; kahtalan yejema-a yinmok yenyoi. Hüpoi tüolan nyoijinglan me numan-e nishe,

¹¹hoongli mongonge wennekapu hüyange mongmei hüyange nok yammo mopulan mongmei wüng jailak. Iman-e minyong phapu dopu ü-khümjingte yahpeiwante kahtalan-e hem lokpu numan-e jailak; iman-e ilak, “ ‘Ütahpa Youngwanpate minyong phatüoh, hangjingne I-a meinang, hüyange Iye kenpu üküm yenang.’ Taowe tüopa kahmük-a üshongwante hangke ngoh hüke jalunne tamlak. Tao, Youngwanpawe ngaoyangki.”

¹²Ütahpa Youngwanpawe i, “Tüopa kahmük wanwüng jeng kih-e ngohpu, hüyange ümeken me kahtalan yejema-a yinmoklan yenyoi, tüoken me nishe heeijong, ümeken me nyeeyompalan-e imanjing nyee yomlak ngohlak.

¹³Kahtang kahmüklan mepu bangchinglan me, kahtang shongme, hüyange Judah heyekao, Benjamin yikeng yeme, Jerusalem neikonpu chingshaolan me, hüyange Judah bangchinglan me, nyeeyompalan-e nishe imanjing nyee ipu ngohlak. Tao, Youngwanpawe ngaoyangki.”

¹⁴Youngwanpawe i, “Hipak-a peiküki aope Taowe Israel hüyange Judah kahtalante janpu ütahte Taowe ngaitamlak.

¹⁵Tüohipak me khakshupupa David nokli mepu Taowe ahngpa ne lelak. Tüopa ahngpawe kahmük nopu me hanghepa shunang hüyange ütingpa linglak.

¹⁶Judah hüyange Jerusalem kahtalan yintampu oklak hüyange ütuh yenangpe nyoilak. Chingnyute ‘Youngwanpa toman Yinyetampupa’ she nyiklak.

¹⁷Tao, Youngwanpawe jannang, hüke hipak phe me Israel ahngne menglak jingne David nokli mepu ngohlak;

¹⁸hüyange hüke muh ü-shaoshanlak jingne hüyange toidopu phalak jingne hipak phe me Levi jat mepu ngengpalan ngohlak.”

¹⁹Youngwanpawe Jeremiate i,

²⁰“Taowe nyihning phei hüyange wangnyak phei jiengjeppu yahyangki, tüome nakshih hipak phe me imante shupu hipak me khakshuwe peilak; hüyange tüopa jiengjeppuwa aope-o yemenglak.

²¹Tüopa kih-e muh Taowe ü-shaoshanpa David phei jiengjeppu ja yahyangki hüke Iye hipak phe me ahngne menglak jingne huhayimlan ngohlak, hüyange Levi jat mepu ngengpalan phei Taowe jiengjeppu ja yahyangki hüke iman-e hipak phe me ü-shaoshanlak; hüyange tüolan jiengjeppu lan-a aope-o yemenglak.

²²Taowe ü-shaoshanpa David huhayimlan shangtoi hüyange Levi jat mepu ngengpalan shangtoi jaalunne tamlak, tüokaiye imante wangdang shanhalan yejema-a yengching nah mepu pheih kek ipu wanpu shinne ipu ye-okpe ngohlak.”

²³Youngwanpa ngao Jeremiate pei,

²⁴“Hangke kahtalan-e Taowe leyangpu Israel hüyange Judah nokphong ni Taowe winteki she ipu nange tüopa shinge okya? Tüokaiye ü-kahtalante winne leinang hüyange shaaji jat ja she ye-i.

²⁵Hüpoi Tao, Youngwanpawe wangnyak wangngai jiengjeppu ngohnang, hüyange hanghepawe wangdang hüyange kahtoknyu wanglam lamme oknang tüopa ngaokhüm lingyangki.

²⁶Hüyange ütingpa me Taowe tüopa lingyangpu kih-e, tüokih-e Taowe Jacob huhayimlan phei hüyange ü-shaoshanpa David phei Taowe ü-jiengjeppu tükke anglak. Taowe David huhayimlan yo mepu sheja Abraham, Isaac, hüyange Jacob huhayimlan tangme wanglam lamne lelak. Taowe ü-kahtalante yayeng shüpshepu ngohlak hüyange iman nishe jaalunne tamlak.”