Read Konyak Naga JEREMIA 34 Bible Online

JEREMIA 34 - Konyak Naga bible

JEREMIA 34

¹Aope Babilon ahngpa Nebuchadnezzar hüyange Ijing nyahponglan, jatlan üshei mepu wetaipalan hüyange jatlilan aoyin I phangte yuyange ngoh khongkümpuwe jamyange, iman-e Jerusalem hüyange tüopa shongmepu bangchinglan chinghah-e ngohwante Youngwanpawe Jeremiate ngao.

²Youngwanpa, Israel Kahwange üte taiye Judah ahngpa Zedekiahte ngaolak jingne i, “Tao, Youngwanpawe tüopa chingnyuwa Babilon ahngpate phünne phalak, hüyange Iye tüopa-a jakke tamlak.

³Nanga I yak mepu yeyin oklak; nanga pholak hüyange Ite phünne phalak. Nange I sheta hei sheta teihüowe ngelak hüyange Iphei küpnok me mük tei nge-e ngaolak; tüophei me nanga Babilonte tailak.

⁴Tüoyangpoi Youngwanpa ngao jaitüoh, O Judah ahngpa Zedekiah! Youngwanpawe nang jeng hüke inang, ‘Nanga yanglow pheipa-a ülilak.’

⁵Nang chingmei me lilak, hüyange aope iman-e nangjing pajeiyonglan muyapeih hüwante sünyet jakpu kih-e, aoyin nang shaome ahngne ngoh, tüokih-e muh iman-e nang jingne sünyet jaklak. Iman-e nangjingne shapyoonglak hüyange ilak, ‘Toman ahngpa-a liteki!’ Tao, Youngwanpawe ngaoyangki.”

⁶Hüwante hipa Jeremia-e Judah Ahngpa Zedekiahte Jerusalem me tüolan khongkümpu,

⁷aope Babilon ahngpa nyahponglan-e chingnyuwa shümme ngohyapeih tüopa ngaolan pha. Nyahponglan-e üne-o Judah me tüolan shaha meipe latyangphei towe ngohpu Lachish hei Azekah chingnyulan shümme ngohyangki.

⁸Zedekiah Ahngpawe, Jerusalem me ngohpu khongküm puphei, imante lanne tampu ponge tamlak teiyangpu lingyang phei me, Youngwanpa mepu Jeremia tangte ngao peipuwa;

⁹iman pheipu Hebrew rhalan, sheko hei netan moini lanne tamlak teijanpu ja ling, tüome nakshih aowe-o yoipheipu Israel ja rha ne ye anglak.

¹⁰Kahta khongkümpu hüyange woipalan-e iman jing rhalan lanne tamlak jingne mong hüyange nishe iman aope-o rha ne ye-anglak she tüm. Iman-e lanne nehoi teine tamyangki.

¹¹Hüpoi phei me iman juteih jeilei, rhanyu hei rhapalan iman yah muh ye, hüyange nishe muh rha ne menglak jingne kang.

¹²Hüwante Youngwanpa ngao Jeremiate pei,

¹³Israel Kahwange kahtalante ngaowe tamlak jingne üte i: “Aope Taowe iman Egypt mepu yinne tam hüyange rha yatuhshao mepu lanne tam hüwante Taowe numan jing pajeiyonglan phei jiengjeppu ja ling. Taowe imante i,

¹⁴hüke ‘Wangpeng nyit ngoipu lep iye iman-e Hebrew rhalan aoyinne iman wangpeng wok shaoshan yangki lanne teilak.’ Hüpoi numan jing pajeiyonglan-e üte mong yepha yejema-a Taowe hanghe i tüopate yejai.

¹⁵Nyih ütenja hei taiteki numan-e numan kenmong lüpyangki hüyange üte hanghe mei tüopa lingyangki. Numan khongkümpuwe numan pheipu Israellan lanne teine tamlak jingne mong, hüyange numan-e ü-sheshao me khümjing ümeken me üte yoppe khüm tüoken me jiengjeppu yah yangki.

¹⁶Tüoyangpoi numan-e numan kenmong jeilei hüyange üte ye-i-yeshepu ling. Iman-e lengpu kih-e aoyin rhalan numan-e lanne teine tam, numan khongkümpuwe üne-o yahye, hüyange numan-e nishe rhane menge tam.

¹⁷Tüokhei sha-a, Tao Youngwanpawe inang, numan-e üte ngao yejaipu lingyangki. Numan-e numan pheipu Israellan te lantampu yepha. Yeonge meiteki, hümma-a Taowe numante lantampu yahpha ning: wehokke litamlak, daktin-e, hüyange seanyao yenglepuwe lilak lantampu! Taowe kahtoknyu jatlan lili Taowe numante hanghe lingtam tüopate yashanyalilak Taowe linglak.

¹⁸Hüpoi iman-e jiengjeppu meng hüyange tüopa tümme angpu kih-e yejon. Tüokhei iman-e mahu üpong te hanghe ling tüopa Taowe tüolan kahtalante linglak.

¹⁹Judah woipalan hüyange Jerusalem lwngmeilan, ahngnok yompalan, ngengpalan, hüyange woipalan khongkümpu phei jamme iman-e tangyange angpu mahu üpong nipa me kemme ü-phei jiengjeppu yah.

²⁰Taowe iman-a aoyinne iman toihuwe teihnang, tüolan imantepu wepalante phünne phalak, hüyange iman lipu manga awhalan hüyange phao yinmoklan-e hahlak.

²¹Taowe üne-a Judah Ahngpa Zedekiah hüyange I shaoshanpalan aoyinne iman toihuwe teihnang imante phünne phalak. Taowe iman-a Babilonlan nyahpongte phünne phalak, aoyinne numante shümpu mepu lak;

²²Taowe ngaokeng phalak, hüyange iman tüopa chingnyute leihyelak. Iman-e tüopa-a shümlak, tüopa omlak, hüyange tüopa-a jakke tamlak. Taowe Judah bangchinglan-a ao-o yenyoipu wanwüngjeng kih-e linge tamlak. Tao, Youngwanpawe ngaoyangki.”