Read Konyak Naga JEREMIA 35 Bible Online

JEREMIA 35 - Konyak Naga bible

JEREMIA 35

¹Aope Josiah üha Jehoiakim Judah tangme ahngne ngoh, Youngwanpawe Jeremiate ngao,

²“Rechabit nokphong kahtalan tangte taitüoh hüyange imante ngaotüoh. Tüophei me khümjing tüplam yo mepu ja te iman yah peitüoh hüyange imante wuwüngti ütam yingne phatüoh.”

³Tüokhei taowe Rechabit nokphong lanshe woi, Jaazaniah (ülaopa Jeremia üha, aowe Habazziniah üha ne ngoh) hüyange Ijeihei naolan hüyange hayimlan khongküm,

⁴tüophei me iman khümjingte yahpei. Taowe iman-a Igdaliah üha Hanan hipa pinlan tüpte yah in. Tüopa tüp-a Shallum üha Maaseiah khümjing me woipa yo me ja jing tüp-a ütok me ngoh, hüyange ülao woipalan tüplan ü-o me ngohyangki.

⁵Tüophei me taowe Rechabitlan sheshao me wuwüngti-e maayange yankhong hüyange wanlan angetam, hüyange taowe imante i, “Wuwüngti jeyingyah.”

⁶Hüpoi iman-e jan, “Toman-e wuwüngti yeying ja. Toman pajeiyong Rechab üha Jonadab-e tomante hüke i, toman jeyah tomanjing huhayimlan ne jeyah wuwüngti hango yeyinglak.

⁷Iye üne-o tomante nok yewelak jingne yejema-a kah yehamlak jingne, hüyange wuwüngwu yeshomlak jingne yejema-a tüolan yeshaklak jingne iyangki. Iye tomante jinte nyenok me ngohlak jingne ngaokeng pha, tüokaiye teman tüopa kahmük ümeken me toman ngohnang tüoken me yinpalan kih-e ngohlak.

⁸Jonadab-e tomante phapu nyüoweleipu khongküm toman-e jaiye peiyangki. Toman-e toman nying nyingke wuwüngti aope-o yeying, hüyange tomanjing shekolane-o yeying, toman hayimlan, yejema-a toman yhalalan ne-o yeying.

⁹Ngohlak nokne menglak jingne toman-e nok yewe, toman nyenoklan me nyoi, hüyange toman-e wuwüngkah, kahmeilan, yejema-a deihaliha yeli.

¹⁰Hüpoi toman-e lanshe toman jing pajeiyong Jonadab-e tomante phapu ngaokenglan khongkümpu jaiyangki.

¹¹Hüpoi aope Ahngpa Nebuchadnezzarwe kahmük-a hah-e peiyapeih, toman-e Babilon hei Syria nyahponglan mepu yanne ngohlak Jerusalemte talak jingne tümyangki. Tüojing üne toman Jerusalem me nyoi ngohnang.”

¹²Hüwante Youngwanpa mepu ngao Jeremiate pei:

¹³Hüke Ütahpa Youngwanpa, lsrael Kahwange taiye Judah hei Jerusalem kahtalante ngaolak jingne i, “Tao, Youngwanpawe numante tongnang hangne numan-e üte minjai she shüyange Taowe nyüoweleipu minyah she ipu?

¹⁴Jonadab huhayimlan-e Iye wuwüngti yeyinglak jingne phapu ngaokeng jon, hüyange tüopa nyihte ngoiye iman sheja nehoi yeying. Hüpoi Taowe numante yelakpe ngaowe tam, tüoyangpoi numan-e ü-ngaote yejai.

¹⁵Taowe ü-shaoshanpalan hipalan khongkümpu numante yelakpe shon, hüyange numan-e ünulam tüohlak hüyange ütingpa tüopa linglak jingne iman-e numante ngaowe tam. Numan-e ülao kahwanglante yeyoplak hüyange shaoyeshanlak, tüome nakshih Taowe numan hüyange numan jing pajeiyonglante phapu kahmük me numan nyoipu oklak jingne iman-e numante deingao pha. Hüpoi numan-e üte yejai yejema-a üte mong yepha.

¹⁶Jonadab huhayimlan-e iman pajeiyonglan-e imante phapu ngaokeng jaiye jon, hüpoi, numan kahtalan-e ü-ngaote yejai.

¹⁷Tüokhei sha-a, Tao, Ütahpa Youngwanpa, Israel Kahwang numan Judah hüyange Jerusalem kahtalan tangme Taowe janpu mahlakpa khongkümpu yah peilak. Taowe tüopa linglak hangjingne aope Taowe numan phei ngao numan-e mong yepha, hüyange aope Taowe numante nyik numan-e yejan.”

¹⁸Tüophei me Jeremiawe Rechabit nokphongte Ütahpa Youngwanpa, Israel Kahwang hüke ngaoyangki she i, “Numan pajeiyong Jonadab-e numante phapu ngaokeng numan-e jonyangki; numan-e Iye phapu nyüoweleipu khongkümpute woiyangki, hüyange Iye numante ngaokeng phawe tampu numan-e lingyangki.

¹⁹Tüokhei, Ütahpa Youngwanpa, Israel Kahwange jannang hüke Rechab üha Jonadab-e ü-shao shanlak jingne jinte netan üli ngohlak.”