Read Konyak Naga JEREMIA 36 Bible Online

JEREMIA 36 - Konyak Naga bible

JEREMIA 36

¹Josiah üha Jehoiakim Judah ahngne mengpu wangpeng peli shepupa me, Youngwanpa mepu tüopa ngao Jeremiate pei,

²“Lai ütee ja yayah hüyange Taowe nangte Israel hüyange Judah jeng hüyange jatlan khongkümpu jeng iyangpu sheminlamphe tüopa me nyantüoh. Taowe nangte üwangne ngaowe wangpu hipak mepu aope Josiah ahngne meng, hüyange tüopa hipakte ngoipu mepu Taowe nangte ngaopu khongkümpu nyantüoh.

³Aoweshing aope Judah kahtalan-e Taowe iman tangte yahpeilak jingne teihpu mahtamlakpa lili aope jailakei, iman ünulam mepu iman lüppe yene ok. Hüma-a iman ünu-ümeng hüyange iman ünulan jingne Taowe ümeng winne ok.”

⁴Tüokhei Jeremiawe Neriah üha Baruch nyik-e pei hüyange Youngwanpawe Jeremiate ngaoyangpu sheminlamphe Ite nyanne tam. Hüyange Baruch-e tüopa-a laitee me khongkümpu nyan.

⁵Tüophei me Jeremiawe Baruchte tüolan nyüoweleipu pha: “Tao shaaji khümjingte tailak jingne yetam.

⁶Hüpoi taowe nanga ünepa hipak kahtalan-e nyaowelewante tüote taine tamhunang. Nange laitee-a üngwünne ilak yang, hümme nakshih iman-e Youngwanpawe üte ngaowe tamyangpu hüyange taowe nangte nyanne tamyangpu lili jailak. Ümeken me kahta lili-e Judah kahtalan aoyin iman bangchinglan mepu peiyapeih tüolan-o omme moilanne jailak ne tüopa-a lingtüoh.

⁷Aoweshing iman-e Youngwanpate yoplak hüyange iman ünulam mepu monglüplak. Hangjingne Youngwanpawe tüopa kahtalante nyamlakpa ne I mongshih ngaipu hüyange mokhlakpa ütuh-e nyamshao nang.”

⁸Tüokhei Baruch-e Youngwanpa ngaolan-a khümjing me Jeremia-e Ite linglak jingne ngaowe tampu kih-e khakshuwe iye hüo.

⁹Judah ahngne Jehoiakim mengpu wangpeng nga lekeng tu shepupa me, Youngwanpa mepu monghahpu tüolak jingne kahtalan-e nyaowelepu yah. Nyaowelepuwa Jerusalem me aoyin nyoi khongkümpuwe hüyange Judah bangchinglan mepu aoyin tüokente pei moilanne yah.

¹⁰Hüwante, aope kahta liliye jaiye ngohyapeih, Baruch-e Jeremiawe ngaowe tampu laitee mepu sheminlam phe iye hüo. Iye tüopa-a khümjing me Shaphan üha Gemariah ghonyoi yaknyanpa tüp me ling. I tüp-a ütokpa ghonyoi khümjingte ongpu ülapa Peten shong me ngohyangki.

¹¹Micaiah, Gemariah üha hüyange Shaphan ühuwe, Baruch-e laitee mepu Youngwanpawe hanghe i jaiyah.

¹²Tüophei me I ahngnokte, ghonyoi yaknyanpa tüp, ümeken me üyonglan khongküm jemme ngoh tüote wen. Ghonyoi yaknyanpa Elishama, Shemiah üha Delaiah, Acbor üha Elnathan, Shaphan üha Gemariah, Hananiah üha Zedekiah, hüyange ülao üyih-üyonglan khongkümpu tüoken me ngohyangki.

¹³Micaiahwe Baruch-e kahtalan sheshao me iye tampu Iye jaipu khongkümpu imante i.

¹⁴Hüwante ahnghalan-e Jehudi Nethaniah üha, Shelemiah ühu, hüyange Kushi-hushom Baruchte Iye kahtalan sheshao me iye hüopu laitee yahpeilak jingne shon. Baruch-e imante laitee yahpei.

¹⁵Iman-e i, “Shottüoh,” hüyange laitee-a tomante itehu. Tüokhei Baruch-e iye hüo.

¹⁶Iye tüopa iye shoyang phei me, mongpong puphei iman jawe jate teilei, hüyange Baruchte i, “Toman-e tüopa-a ahngpate ngaolan phalak.”

¹⁷Tüophei me iman-e Ite tong, “Tomante sha-a itehu, hatüolan khongkümpu nange hangke nyanpu? Jeremia-e nangte tüopa-a nyanne tampu a?”

¹⁸Baruch-e jan, “Tüopa tepu ngaokek lili Jeremia-e üte iye tam, hüyange taowe tüopa-a laitee me laiti phei nyanyangki.”

¹⁹Hüwante üyonglan-e Baruch te i, “Jeremia nangni-a taitüoh hüyange lotüoh. Nangni ümeken me ngoh ao te-o shingne tah tam.”

²⁰Üyih üyonglan-e laitee-a ghonyoi yaknyanpa Elishama tüp me ang, hüyange ahngnok ghonyoite wen, ümeken me iman-e sheminlam phe ahngpate ngaiye tam.

²¹Hüwante ahngpawe laitee yahlak jingne Jehudi shon. Iye tüopa-a Elishama tüp mepu yah hüyange tüopa-a ahngpa hüyange aoyin I neikonne yongyange ngoh tüolante iye hüo.

²²Tüohipak-a eanyu ne ngoh hüyange ahngpa-a eanyu me shotpu ahngnok vüntüp shongme ngoh, hüyange vün-o loonge jak ngoh.

²³Jehudi-e üleng lüm hei peli iye shopu phei jamshe, ahngpawe tüolan-a nyit-ha phei wettetam hüyange tüolan-a vünte shüppe tam. Laitee nopu hah-e manshu manshu Iye yelakpe tüopa-a wettetam.

²⁴Hüpoi ahngpa jeyah I shaoshanpalan ütam jeyah aoyinne tüolan kümpu jaiyangki nyamme yeteih yejema-a mongmenge teihpu füo hango yehüo.

²⁵Elnathan, Delaiah, hüyange Gemariah lan-e ahngpate laitee-a yejaklak jingne yoppe tongyapoi, Iye iman ngaote hangke-o yeteih.

²⁶Tüophei me Iye Ahnghapa Jerahmeel te Azriel üha Seraiah hüyange Abdeel üha Shelemaih woiyange ü-yaknyanpa Baruch hüyange Jeremia pholak jingne ngaokeng pha. Hüpoi Youngwanpawe iman lowe ang.

²⁷Ahngpa Jehoiakimwe Jeremiawe Baruchte nyanne tampu laitee jakyang phei me, Youngwanpawe Jeremiate,

²⁸laitee ülao ja yahyange üwangpa Ahngpawe jak winpu laitee me hangheyin ngoh khongkümpu nyanlak jingne i.

²⁹Ahngpate ilak jingne Youngwanpawe Jeremiate i, “Nange laitee-a jakyangki, hüyange nange Jeremiate tongyangki hangne Iye Babilon ahngpa peilak hüyange tüopa kahmük menge tamlak hüyange tüopa me ngohpu kahtalan hüyange yinmoklan toilak she nyanpu?

³⁰Tüokhei sha-a, Tao, Youngwanpawe nangte inang, Ahngpa Jehoiakim, nang huhayimlan mepu aowe-o David ahngching me wanglam yelamlak. Nang lipu manga ümeken me nyihning wanghete yamlak hüyange wangnyak me nyinte yamlak kente winlak.

³¹Taowe nangte, nang huhayimlante nangjing ahnghalante shaoshiyateng phalak hangjingne ima-a numan khongkümpuwe omyangpu ünu jingne. Nange jeyah Jerusalem kahtalan-e jeyah hüyange Judah ne jeyah numan aowe-o Taowe phapu deingaote mongyepha, tüojingne numan khongkümpu tangme Taowe nyam shaowe tampu mahtamlakpa peitamlak.”

³²Tüophei me Jeremiawe laitee ülao ja yah hüyange yoi yaknyanpa Baruchte pha, hüyange taowe ngaowe tampu khongkümpu Iye nyan. Üwangpa laitee me ngohyangpu khongküm Iye nyan, hüyange tüokihpu ngaolan muh taowe Ite iye tampu nyan.