Read Konyak Naga JEREMIA 37 Bible Online

JEREMIA 37 - Konyak Naga bible

JEREMIA 37

¹Babilon Ahngpa Nebuchadnezzarwe Jehoiakim üha Jehoiachin nanleiye Judah ahngpa ne Josiah üha Zedekiah mengetam.

²Hüpoi Zedekiahwe jeyah yejema-a I shaoshanpalan ne jeyah yejema-a kahtalan-e jeyah Youngwanpawe Jeremiate phapu ngaolante yejai.

³Ahngpa Zedekiahwe Shelemiah üha Jehukal hüyange Maaseiah üha Zephania ngengpa jat jingne toman Kahwang Youngwanpate yoplak Jeremiate tonglak jingne shon.

⁴Jeremia-a küpnokte man angtampe kahtalan yo me tienpu yenangpe lüngleipu hipak ne ngohyangki.

⁵Babilon nyahponglan-e Jerusalemte shümme ngohyangki, hüpoi aope iman-e Egypt nyahponglan-e Egypt yikeng kaiteki she jaiyapeih iman tokpheite shinne yeyangki.

⁶Hüwante Youngwanpa ngao Jeremia hipa tangte pei:

⁷“Youngwanpa Israel Kahwange hüke inang, Judah ahngpa aoheye numan ü-mepu tonglak jingne shon Ite numan-e hüke itüoh; ‘Leihuyah, Pharaoh aowe ükhong nangte jamlak jingne peinang, yoi kahtok Egypt te leihye ning she ngohnang.

⁸Hüwante Babilonlan leih yekülak, chingnyute shümlak, tüopa omme yahlak; hüyange tüopa vün-e jakke tamlak.

⁹Tao, Youngwanpawe nangte Babilonlan leih yeyekülak she teihyange nang nying nyingke lowelamne tahtam she deingao pha nang, hangjingne iman yekülak.

¹⁰Nange Babilon nyahponglan khongkümpu naowe tamyapoi, tüokaiye mayah yangpulan shaha iman nyenok me lamyange ngohyapoi, tüolan kahtalan yelakpe muh lüolak hüyange tüopa chingnyuwa kahtokne menge vün me jakke tamlak.’ ”

¹¹Babilon lan nyahpong Jerusalem mepu shinne ye hangjingne ima-a Egypt nyahponglan owe peiteiye ngoh.

¹²Tüokhei Jeremiawe Jerusalem tüohyange Benjamin yikeng yekao me noksa moth mepu Ijing meitam yahlak jingne yayonge tai.

¹³Hüpoi aope Jeremiawe Benjamin Peten ngoi, tüoken me weyomme yongpu woipa kahta ja Irijah she minpu Shelemiah üha hüyange Hananiah ühuwe Jeremia lakne tam hüyange i, “Nanga Babilonlan tangte tainang!”

¹⁴Jeremiawe janne i, “Tüokihpu ne yeje! Tao taipu ne yeje.” Hüpoi Irijah-e Ite yejai. Tüo nanleiye Iye Jeremia pho, hüyange woipalan tangte Jeremia yahtei.

¹⁵Iman-e Jeremiate mongshih ngai hüyange Ite shette tamlak jingne ngaokeng pha, hüyange ghonyoi yaknyanpa Jonathan nok me küppe ang, ao nok küpnok ne lingyange ngoh.

¹⁶Jeremia-a kahmongsa nyoi me ang hüyange tüoken me hipak laowe ang.

¹⁷Phei me Ahngpa Zedekiahwe Jeremia yahne shon, hüyange tüoye ahngnok me Iye Jeremiate lowe tong, “Youngwanpa mepu ngaolan ütam ngohyah?” “Ngohnangkuja,” she Jeremiawe jan, hüyange hüke paowe i, “Nanga Babilon ahngpate phünne phalak.”

¹⁸Tüophei me Jeremiawe tong. “Hanghe püohpu, taowe nang yejema-a nang shaoshanpalan yejema-a tüolan kahtalan te nange tao küpnok me anglak ne lingyangpu shi?

¹⁹Aoyinne nangte Babilon ahngpawe nang yejema-a kahmük ching minhah ja she ipu nangjing hipalante hanghe ngaitüohpu?

²⁰Hüyange sha-a, nang üyongpa, taowe nang te yoppe towe ü-ngaote jailak jingne hüyange taowe hanghe tong linglak jingne tongnang. Chingmei lamlinge Jonathan nok mepu küpnokte tao shonne yene tahtam pha. Nange tao shonne yema-a, tao ütingpa me tüoken me lilak.”

²¹Tüokhei Ahngpa Zedekiahwe ahngnok ghonyoi me Jeremia küppe anglak jingne ngaokeng pha. Tüokhei Jeremia tüoken me ngoh, hüyange nyih jeih she üte chingnyu mepu an kümme manyüo manyüo she anbung ja ja pha.