Read Konyak Naga JEREMIA 38 Bible Online

JEREMIA 38 - Konyak Naga bible

JEREMIA 38

¹Sha-a Mattan üha Shephatiah, Pashhur üha Gedaliah, Shelemiah üha Jehukal, hüyange Malchiah üha Pashhur iman-e Jeremiawe kahtalan phei hüke ngaopu jai.

²Youngwanpawe hüke inang, “Aoyin chingnyu me nyoi ngohlakei iman-a wehokpuwe yejema-a seanyao yenglepuwe yejema-a daktin phei lilak. Hüpoi aoyin ngaiye taiye Babilonlan phangte onglakeih yetoilak; I üyin mei meipa-a yinpu oklak.”

³Hüke Youngwanpawe ngaoyangki, “Taowe chingnyuwa Babilon nyahponglante phalak, hüyange iman-e tüopa-a omlak.”

⁴Hüwante ahnghalan ahngpa tangte pei hüyange i, “Tüopa kahta li ne tamlak yang. Iye hüke ngaopu kaiye chingnyu mepu wetaipalan-a iman mong yeyonglak ne linge tamnang, hüyange Iye jakihpu ngao chingnyu me towe ngohpu kahta lilite ngaowe tamnang. Iye kahtalante jamlak jingne ye-ngang; Iye iman mongjang mayah nehei tamnang.”

⁵Ahngpa Zedekiah-e jan, “Hüma-a yeonge meiteki, numan-e hanghe mong Ite lingtüoh; taowe numante tienne ye-ok.”

⁶Tüokhei iman-e Jeremia woiyah hüyange wu me phinyange ahngnok longkon me ngohpu Malchiah ahngha yengnung te hünge tai. Yengnung me yeng yenangpe shamshaha ngohyangki, hüyange Jeremia tüopa te hümme ta.

⁷Tüoyangpoi, Sudanlan Ebedmelech she minpu moiko kahta ja aowe ahngnok me toi ling Iye iman-e Jeremia yengnung te hünge taiteki she jai. Tüohipak me ahngpa-a Benjamin Peten me ngaophün-e ngohyangki.

⁸Tüokhei tüokente Ebedmelech wen hüyange ahngpate i,

⁹“Nang üyongpa, hatüo kahtalan-e hanghe lingyangki hatüowa yeshu. Iman-e Jeremia-a yengnungte hünge tamteki, ümeken me I ütingpa me lilak, hangjingne ima-a chingnyu me shaaji hahying yenang.”

¹⁰Hüwante ahngpawe Ebedmelechte Iphei kahta naoshe lüm yahyange Jeremia manlipe yengnung mepu shuwe ngailak jingne ngaokeng pha.

¹¹Tüokhei Ebedmelech kahtalan phei ahngnok toinan angpu nyoite wen hüyange nyejen ütam yah hanghepa Iye Jeremiate wu phei jamme yeitai.

¹²Ebedmelech-e Jermiahte i, nyejen-a phak phang me anglak jingne i, hümme nakshih wuwe üte yeshitlak. Taowe hüke ling,

¹³hüyange iman-e Jeremia-a yengnung mepu shuwe ngaitam. Tüophei me Jeremia-a yompalan longkon me ang.

¹⁴Ülao hipak ja me ahngpa Zedekiahwe I shongte khümjingte ongpu lüm shepupa nyoijing me Jeremia yahpei, hüyange Ahngpawe Jeremiate i, “Taowe nangte ülam ja tong phaning, hüyange nange üte hango lowe ye-angpe, üte khongkümpu ütingpa me ine tamhunang.”

¹⁵Jeremia-e Ahngpate jan, “Taowe nangte ütingpa ima-a, nange tao li ne tamphalak, hüyange taowe nangte hengpu phama-a, nange hanghete-o mong yephalak.”

¹⁶Tüokhei Ahngpa Zedekiahwe Jeremiate lowe jan, “Taowe üyin Kahwang min me jiengnang. Kahwang aowe temante üyin pha, hüke taowe nang li ne yetamlak yejema-a aowe nang toihunang tüolante nang phünne yephalak.”

¹⁷Hüwante Jeremiawe Zedekiahte i, hüke Ütahpa Youngwanpa, Israel Kahwange iyangki, “Nange Babilon ahngpa ahnghalan phangte peima-a, nang üyin-a yinlak, hüyange tüopa chingnyu-a jakke yewinlak. Nang hüyange nenok noksalan moini yinlak.

¹⁸Hüpoi nang iman phangte yeongma-a, hümma-a tüopa chingnyu-a Babilonlan yakte phünne phalak, aoyinne tüopa vün-e jakke tamlak, hüyange iman mepu nang yinpu ye-oklak.”

¹⁹Hüpoi ahngpawe janne i, “Taowe teman chingshao kahtalan aoyin Babilon tangte taiye ngohnang, imante nyamnangki. Taowa imante phünne phane ok hüyange toiteiye linglak.”

²⁰Jeremiawe i, “Nanga imante phünne yephalak. Youngwanpa ngaolante jailak jingne taowe nangte yoppe tongnang; hümma-a nang jingne khongküm meiye tailak, hüyange nang üyin-o yinlak.

²¹Hüpoi nange iman phangte yepeilak she ima-a hanghe ngailak, Youngwanpawe üte himang me hüoyangki.

²²Tüopa me taowe nge, Judah ahngnok me tüohpu shekolan khongküm Babilon ahngpa ahnghalan tangte woitei. Iman taijang taiye iman-e hanghe inangshi jaitüoh: “ ‘Ahngpa shümpa ümeilan-e I ünyongyete woi; iman-e I tangme wanglam lam. Hüyange sha-a I ya-a shamte hüngteki, I shümpalan-e I tüohyangki.’ ”

²³Tüophei me taowe paowe i, “Nangjing shekolan hüyange hayimlan khongküm Babilon tangte yahteilak, hüyange nang nying nyingke iman mepu yinpu ye-oklak. Nanga Babilonia ahngpawe phowe teilak, hüyange tüopa chingnyu-a kahtok ne menge vünte jakke tamlak.”

²⁴Zedekiahwe janne i, “Aowe-o tüopa teingaopu shingne tahtam, hüyange hüke yejema-a nang li ne ok.

²⁵Taowe nang phei ngaoyangki she ahnghalan-e jaima-a, iman peikülak hüyange tümniye hanghe ngao nangte tong phalak. Nange imante sheminlamphe ngaowe tamma-a nang li ne yetamlak she iman-e nangte janphalak.

²⁶Imante hülan hei itüoh, tao nishe tüoken me li ne Jonathan küpnokte shonne tahyetam pha she nange üte yoppe tongyangki she itüoh.”

²⁷Tüophei me ahnghalan khongkümpu pei hüyange Jeremiate tong, hüwante Iye imante ahngpawe Ite hangke ilak jingne i hüke iye tam. Iman-e linge oklak hango yenangpe ngoh, hangjingne ima-a aowe-o tomni teingaopu jaiye yenang.

²⁸Hüyange Jeremia-a Jerusalem omme yahpu nyih manngoi manngoi ahngnok longkon me angyangki.