Read Konyak Naga JEREMIA 39 Bible Online

JEREMIA 39 - Konyak Naga bible

JEREMIA 39

¹Judah me Zedekiah ahngne mengpu wangpeng tu lekeng pen shepupa me, Babilon Ahngpa Nebuchadnezzar yoijing nyahponglan lanshe yahyange pei hüyange Jerusalemte shüm.

²Zedekiah Ahngne mengpu wangpeng pen me ja lekeng peli nyih tu shepupa me, chingnyu jantpenyuwa lüowe meng.

³Aope Jerusalem ommeyah, Babilon ahngpa jing ahnghalan khongkümpu pei hüyange Peten Hotanpa me iman-e yoi nyoijing yah, tüophei jamme Nergal-sarezer, Samgar Nebo, Sarsechim, hüyange ülaopa Nergal-sarezer omme ngoh yangki.

⁴Aope Ahngpa Zedekiah hüyange Ijing wetaipalan khongkümpuwe hanghe ngai tüopa ngewante, chingnyu mepu wangnyakte lowe tailak jingne iman ngang. Iman ahngnok pesha tailam yete yayong, jantpenyu ni hüopu pong peten kaiye tai, hüyange Jordan kahjee yekaote taipu okke tai.

⁵Hüpoi Babilon nyahponglan-e imante jange tai, hüyange Jerikho ü-o üjeepong me Zedekiah pho. Tüophei me iman-e Ahngpa Nebuchadnezzar tangte I yahpeih, ao Hamath yikengpong mepu Riblah chingnyu me ngoh, hüyange tüoken me Nebuchadnezzarwe Ite ngaophünpu phatam.

⁶Riblah me Babilon ahngpawe Zedekiahwe leiye ngene tamme Zedekiah hayimlan toine ne tam, hüyange Iye Judah üyonglan li ne tam,

⁷tüophei me Iye Zedekiah mük yokke win hüyange Babiloniate yahteilak jingne yankeileiye phinne tam.

⁸Hüwante muh, Babilonlan-e ahngnok vün-e jakke tam hüyange kahtalan jing nok hüyange Jerusalem jantpenyu menge tam.

⁹Üküm ne ükhong woipa Nebuzaradan-e aoyin kahtalan chingnyu me towe tüoh, tüolan phei jamme aoyin I tangte shinne pei tüolan khongkümpu phowe Babilonte yah tai.

¹⁰Nyahpong woipa Nebuzaradan-e Judah kahmük me toiha kahtalan, aoyin me mothkat hango yenang tüolan tüoh, hüyange Iye imante wuwüngkah hüyange hamlak kah phawe tüoh.

¹¹Hüpoi Ahngpa Nebuchadnezzarwe ükhong woipa Nebuzaradan kaiye Jeremia jeng me, tüolan ngaokeng phalak jingne ngaokeng pha:

¹²“Taitüoh hüyange Jeremia yamme tüotüoh hüyange Ite meiye paowe tüktüoh. Ite yemeipe tahling, hüpoi Iye hangheyin leng linge tamtüoh.”

¹³Tüokhei Nebuzaradan woipa üyong, Nebushazban hei Nergal Sarezer hüyange Babilon ahngpa jing ülao woipalan khongkümpu phei,

¹⁴ahngnok longkon mepu Jeremia yah ngai. Iman-e Ahikam üha hüyange Shaphan ühu Gedaliah, aowe tao meiye nok ngoiye tamya leilakpa phang me paowetükke angne tam. Tüokhei Jeremia tüoken me kahtalan yo me ngoh.

¹⁵Aope Jeremia üne-o yelakpe muh ahngnok longkon me küwe angyapeih, Youngwanpawe,

¹⁶Sudanlan Ebedmelech te Ütahpa Youngwanpa, Israel Kahwange hüke i, she ilak jingne i, “Taowe hangke i hüke taowe linglak, taowe tüopa chingnyute jalunpu yeje hüpoi mahtamlakpa yahpeilak. Hüyange aope tüopa ngailakei, tüopa ngelak jingne nanga tüoken me ngohlak.

¹⁷Hüpoi tao, Youngwanpawe nanga yinne anglak, hüyange nanga tüopa jingne nang nyampu kahtalante phünne yephalak.

¹⁸Taowe nang yinne anglak, hüyange nanga li ne yetamlak. Nanga nang üyinphei yinne oklak hangjingne nange nang ütinglakpu üme angyangki. Tao, Youngwanpawe ngaoyangki.”