Read Konyak Naga JEREMIA 4 Bible Online

JEREMIA 4 - Konyak Naga bible

JEREMIA 4

¹Youngwanpawe inang, “Israel kahtalan, numan lüppe yehuma-a, hümma-a ü-tangte lüppe yeyah. Taowe nupu peshao numan-e win ma-a hüyange üte ütinglakma-a,

²Youngwanpa üyin ngohtepuwe ütingpa me, ngaoting me, hüyange khakshupu lam me jiengjeplak; hüwante jatlante Iye moimanlak, hüyange I me iman müktishiwalak.”

³Tüo jingne Youngwanpawe Judah hüyange Jerusalem kahtalante inang: “Manlüohpu numan jing kah lüohtüoh; huh yo me numan jing üli tahdei.

⁴Numan nying nyingke Youngwanpa shao me üshokhüptüoh, hüyange numan mongjang ütokpa üsho khokwintüoh; numan Judah kahtalan hüyange Jerusalem me nyoipalan; hüke yejema-a, numan-e ümengpa lingtepuwe, ü-mongshih ngaipu vün kih-e ngailak, hüyange aohe-o hatüo meitampu ye-oklak ne hahshulak.”

⁵Judah me pongtamtüoh hüyange Jerusalem me shingne tamtüoh; hüyange itüoh, kahmük nopu me nyawong wüngtüoh; üngwüntüoh hüyange itüoh; shüpjemtüoh hüyange chingtuk pepeyange ngohpu chingnyulante teman onghah peikei.

⁶“Zion yete tailam hüotüoh! Yinlak jingne phettüoh! Shonne tahngoh! Youngwanpawe mahtamlakpa yah peinang hüyange apyekao mepu mahtamlakpa üyong peinang.

⁷I lojing nyoi mepu yengkong mailang peipu kih-e; Jatlan mahtampupa yayong teki. I-a Judah mahtamlak jingne peiküki. Numan chingnyulan-a heamteiye tüohlak, hüyange tüolan me ao-o yenyoilak.

⁸Tüokhei monnye inyah, hüyange shappe yoonge wao-ea tüoh hangjingne ima-a nyamnyam shepu Youngwanpa mongshih ngaipu Judah mepu lüppe yetai.”

⁹Youngwanpawe i, “Tüopa nyih me ahngpalan hüyange üyonglan iman mongyongpu mahlak; ngengpalan mokhlak hüyange hipalan yashan yalilak.”

¹⁰Hüwante taowe i, “Okkeshangpu Youngwanpa, nange lanshe Jerusalem kahtalante lowelamne tamnang! Nange iyangki ‘shaaji chingmei ngohlak,’ hüpoi yanglow-a iman üng me nünteiye ngoh nang.”

¹¹Wanwüng jeng yekao mepu wangyang üsheam iman yekaote leinangki she Jerusalem kahtalante ilak hipak peiküki. Hatüowa tahphan shaha puwe teipu nyaishümpu wangyang ne yeje,

¹²Youngwanpa ngao phayange peipu wangyanga tüopa phei jamloi she wongnanglak! Hatüowa Youngwanpa yoi nying nyingke yoi kahtalan tangme ngaophünlak pongetam nang.

¹³Leihuyah, wepalan-a wangphom kih-e peiküki. I jing wehok-pongtong toilan-a yüpnyeih leipu kih-e, hüyange I jing koiponglan-a awlan phei shephet she: teman lanteki! Teman mahteki!

¹⁴O Jerusalem, nang mongjang mepu ünu poiwintüoh, hümme nakshih nang yinpu oklak. Ünu juteihlan shaha teih-e nang hangshin laowe ngohlak?

¹⁵Dan chingnyu hüyange Ephraim kahtanglan mepu ngaolan kipawe ngaolan ümeng jaine tamnang.

¹⁶Iman-e jatlante deingao pha ne hüyange Jerusalemte wepalan üjai mepu peiküki she ilak jingne peinang. Tüolan wepalan-e Judah chingnyulan phei tüi-e wenlak,

¹⁷hüyange kahtalan-e kah yompu kih-e Jerusalem neikonlak, hangjingne ima-a tüopa mepu kahtalan-e Youngwanpa phei tüi-e hokkewe. Youngwanpawe ngaoyangki.

¹⁸Judah, “Hatüowa nang ngohpu nyoingoh kaiye nang nying nyingke, hüyange nange lingyangpu toishao kaiye yah-e peinang. Nang ünu kaiye tüopa shaoshi ngaine tam nang; hatüowe nang mongjang lüowe lokke tamnang.”

¹⁹Üte dakpu! Dakpu taowe nünpu ye-ok! Ü-mongjang! Ümongjanga lüoshoh puphei he nang! Tao jünge yengoh ok; Hangjingne taowe nyawong wüngpu hüyange shapju üngwünpu wüng jainang.

²⁰Mahtampupa ja phei me ja she woinang; kahmük nopu heamteiye tüohnang. Mokhshe toman nyenoklan-a mengtam; tüolantepu jhotnye lan-a üphin üphin me hitteki.

²¹Shapju haapu taowe hangshin me ngelak, hüyange nyawong wüngpu hangshin me jailak?

²²Youngwanpawe inang, “Ü-kahtalan-a üngapa, iman-e Tao yeshing. Iman-a wootepu hayimlan kih-e, iman me shinge yahpu hango yenang. Hanghe ümengpa tüopa linglak jingne iman yeonge okkeshang, hüpoi hanghe ümeipa tüopa-a yeling ok.”

²³Taowe kahtoknyute lei, hatüowa winne tüohpu ükeng ja ne; wangyete lei, wangngai yenangpe ngoh.

²⁴Taowe kahtanglante lei, iman-a powe ngoh, hüyange kahmüohlan-a taitai yeye she po.

²⁵Kahtalan ao-o yenangpe taowe nge; awhalan nehoi puwe taiteiye ngoh.

²⁶Üyao pheipu kahmüklan-a wanwüng jeng ne mengteiye; tüopatepu chingnyulan-a heam teiye, hangjingne ima-a nyam nyamshepu Youngwanpa mongshih ngaipuwe!

²⁷Youngwanpawe hüke i, kahtoknyu nopu phaonyu yingjongne menglak, hüpoi hatüo Taowe lanshe menge yetamlak.

²⁸Tüokhei kahtoknyu mang shaplak; wangdanga nyakke mahlak. Youngwanpawe ngaoyangki, hüyange I kenmong yejeileilak. Iye yoi ngaophünpu yahyangki hüyange leih yeyelak.

²⁹Koipong pheipulan hüyange wenglah pheipulan ngaowüngte bangching lili phette taikümlak. Ütam phaote phette tailak, ülaolan-a longnyu yo me ongne nganglak. Bangching lili ükeng me tüohlak, hüyange aowe-o tüolan me nishe yenyoilak.

³⁰O wüngmak-e tüolakpa, nang hang lingnangki? Hangne nange ütak o o-pu? Hangne nange juyük yah hüyange nang mükte phopu? Nange hangne-o üjelakte nang nying nyingke naoyha tümnang! Nang maiye nanga winteki hüyange nang toihupu yang.

³¹Nao wangngai ngewante sheko ja pongpu kih-e, Taowe üngwünpu ja jainang, sheko jawe yoiha üwangpa ngewante paalapu kih-e pongnang. Hatüowa lüoshohteiye Jerusalem üngwünpu wüng. Yha yak nowe hongyange hüyange inang, “Taowa mahnang! Iman-a tao toilak jingne peinang!”