Read Konyak Naga JEREMIA 40 Bible Online

JEREMIA 40 - Konyak Naga bible

JEREMIA 40

¹Nebuzaradan, woipa ütahpawe Ramah me Jeremia lanne tamyang phei me, Youngwanpawe Jeremia phei ngao. Jerusalem hüyange Judah mepu kahtalan aoyin Babilonte phowe teiyapeih tüolan phei jamme tao-o yankeileiye phinyange iman phei tüokente woitei yangki.

²Woipa ütahpawe Jeremia ü-atte woitei hüyange i, “Youngwanpa nang Kahwange tüopa kahmük mahtamlak ne nyamshao yangki,

³hüyange sha-a Iye hanghe linglakei she i, Iye lingyangki. Tüolan khongkümpu ngaiyangki hangjingne ima-a numan kahtalan-e I phei tüi-e ünu om hüyange Ite yejai.

⁴Sha-a, taowe nang yak üng mepu yankeilei lanne tamnang hüyange nang teine tamnang. Nang ü-phei Babilonte taihuma-a, nang taine oklak, hüyange taowe nangte paowetüklak. Hüpoi nang yetaihuma-a nang yetailak. Kahmük nopu nange mongpupa lelak jingne ngohnang, hüyange nang ümeken yete taihuwe teih taipu oklak.”

⁵Aope taowe yejanpe ngoh, Nebuzaradan-e i, “Ahikah üha hüyange Shaphan ühu, ao Babilon ahngpawe Judah jilalan tepu governor ne linge tam, tüopa Gedaliah tangte leih yetüoh. Nang Iphei ngoh ne ok hüyange kahtalan yo me nyoilak yejema-a nang ümeken yekaote taihuwe teih tüoyekaote nang taine ok.” Tüophei me Iye üte hünghao hüyange hahying ütam taowe yahtailak jingne pha, hüyange tao ü-lam me taine tam.

⁶Tüophei me Jeremia Mizpah me Gedaliah phei ngohlak jingne tai hüyange aoyin kahtalan kahmük me tüoh tüolan yo me tao ngoh.

⁷Aope Judea woipalan hüyange wetaipalan ütam ao phangte-o yeyupe ngoh, Babilon ahngpawe kahmük me Gedaliah governor ne menge tam hüyange kahmük me shetoipu kahtalan aoyin Babilonte yah yeteipe tüoh khongkümpute paowetüklak jingne I nokpu ne menge tam she iman-e jai.

⁸Tüokhei Nethaniah üha Ishmael, Kareah üha Johanan, Tanhumeth üha Seraiah, Netophah mepu Ephai hayimlan, hüyange Maacah mepu Jezaniah iman kahtalan yahyange Mizpah mepu Gedaliah tangte pei.

⁹Gedaliahwe imante i, “Taowe janpu numante pha nang, numan jingne nyamlak hüyange Babilonlan tangte peilak wongpongne yeje. Tüopa kahmük me nyoitüoh, Babilon ahngpa shaoshantüoh, hüyange numan jingne khongkümpu meiye tailak.

¹⁰Tao-o Mizpah me ngohlak hüyange aope Babilonlan tüoken me peikülakeih numan nanleiye taowe ngaolak. Hüpoi numan pa-a wuwüngti, pelick-wenglick, hüyange olive minnga yah yoyange jemme angtüoh, hüyange numan-e tünpu chingshaolan me ngohtüoh.”

¹¹Tüowante, Israellan aoyin Moab me, Ammon, Edom, hüyange ülao kahmüklan me ngohyapeih tüolan-e, Babilon ahngpawe Israellan ütam Judah me ngohlak jingne ang hüyange iman governor ne Gedaliah angetam she jai.

¹²Tüokhei ümeken me iman yanne ngoh, tüolan nyoi iman-e tüoh, hüyange Judah te leihye. Iman Gedaliah tangte Mizpah me pei, hüyange tüoken me iman-e wuwüngti hüyange pelick-wenglick üngang shai jem.

¹³Tüophei me, Johanan hüyange wetaipalan woipalan aoyin ao phangte-o yeyu Gedaliah tangte Mizpahte pei;

¹⁴hüyange Ite i, “Ammon Ahngpa Baalis-e nang toilak jingne Ishmael shonpu nange shingya?” Hüpoi Gedaliahwe tüopate üting yelak.

¹⁵Hüwante Johanan-e Ite lowe ngao, “Tao taishihning hüyange Ishmael toiyang küning, hüyange aowe tüopa ling aowe-o yeshinglak. Hangne Iye nang toine tamlak shi? Tüokaiye Jehudilan aoyin nang neikonne jemnang tüolan yanne mahne ngaikülak, hüyange tüowe aoyin Judah me tüoh tüolan khongkümpute mahtampu peikülak.”

¹⁶Hüpoi Gedaliahwe jan, “Tüopa kih tahling! Ishmael jeng nange hanghe inang hatüowa üting yejeja!”