Read Konyak Naga JEREMIA 41 Bible Online

JEREMIA 41 - Konyak Naga bible

JEREMIA 41

¹Tüopa wangpeng lekeng nyit shepupa me, Ishmael, Nethaniah üha hüyange Elishama ühu, ahngnok kahta hüyange ahngpa shaoshanpalan yo me ütahpa ja, kahta pen yahyange Gedaliah phei hüolak jingne Mizpahte pei. Aope iman khongkümpu jamme nük hah-e ngoh,

²Ishmael hüyange I pheipu kahtalan naoshe pen ne jamshe imanjing yanglow tekke ngai hüyange Gedaliah toitam, hangjingne Babilon Ahngpawe I-a kahmük tepu governor ne letam.

³Ishmael-e üne-o Mizpah me Gedaliah phei Israellan aoyin ngoh khongkümpu hüyange Babilon wetaipalan aoyin tüome ngoh-e shu khongkümpu toi.

⁴Üne nyih, Gedaliah mahtampu jeng aowe-o manshingpe ngohwante,

⁵kahtalan detet ngoiye Shekhem, Shiloh hüyange Samaria mepu peingoi. Iman-e imanjing jumin len, imanjing inkhek hit, hüyange iman nying nyingke luwe üko sa. Iman-e hahying hüyange sünyet dopu yah-e Youngwanpa khümjingte peiyangki.

⁶Tüokhei iman phei hüolak jingne Mizpah mepu Ishmael shapjang shappe yu. Aope iman shongte I ngoi, Iye i, “Gedaliahte leine chingmei lamlinge ongkei.”

⁷Iman chingnyu mongte ongpu phei jamshe, Ishmael hüyange I kahtalan-e iman toitam hüyange iman manga yengnung ja me shüppe tam.

⁸Hüpoi ükhong yo me kahta pen ngohyangki aoyinne Ishmael te hüke i, “Chingmei lamlinge toman tahtoi pha! Toman-e wheat, barley, olive minnga, hüyange zahtai jelo kah me lowe angnang.” Tüokhei Iye iman yinne tam.

⁹Yengnung hanghepa me Ishmael-e Iye toipu kahtalan mang shüppe tam, tüopa-a Ahngpa Asawe aope Israel ahngpa Baashawe Ite shümyapeih hüwante shaopu shekhaopupa ne ngohyangki. Ishmael-e yengnunga mange maawe shünge tamyangki.

¹⁰Tüophei me Iye ahngyhalan hüyange Mizpah me ngohpu kahtalan khongküm, aoyin Nebuzaradan woipa ütahpawe Gedaliah phangme paowetükke angne tam lanshe küpnok me ange tam. Ishmael-e iman-a pho hüyange Ammon yikeng yekaote yah-e woitei.

¹¹Hüpoi aope Johanan hüyange Iphei ngohpu nyahponglan woipalan-e Ishmael-e lingpu ümeng ngaolan jai.

¹²Tüokhei iman kahtalan woiyange I pheite iman woi hüyange iman-e Gibeon yengtung üyongpa shongme iman-e I kem yüo.

¹³Aope Ishmael-e phowe teipalan-e Johanan hüyange nyahpong woipalan Iphei woiyange nge, iman mongmei.

¹⁴Tüokhei kahta khongküm aoyin Ishmael-e Mizpah mepu lüppe woitei leihye-e hüyange leihye hüyange Kareah üha Johanan tangte tai.

¹⁵Hüpoi Ishmael hüyange Iphei pu kahtalan tet ngoiye Johanan mepu lüowe taipu ok hüyange Ammon kahmükte yinpu okke tai.

¹⁶Hüwante Kareah üha Johanan hüyange I phei nyahponglan woipalan üsheiye Nethaniah üha Ishmael-e, Ahikam üha Gedaliah toiyang phei me topu nyahponglan aoyin Ishmael-e Mizpah mepu woi teiye ngoh, nyahponglan, shekolan, nahalan, hüyange moikolan Gibeon mepu yahye, khongküm yah.

¹⁷Tüokhei iman Babilonlan mepu yinlak jingne Egypt te yayong. Tailam me, iman Bethlehem ü-o mepu Chimham me lakyangki.

¹⁸Iman Babilonte nyam, hangjingne ima-a Ishmael-e Gedaliah, ao Babilon ahngpawe kahmüktepu governor ne linge tam tüopa toitam.