Read Konyak Naga JEREMIA 42 Bible Online

JEREMIA 42 - Konyak Naga bible

JEREMIA 42

¹Tüophei me nyahpong woipalan khongküm, Kareah üha Johanan hüyange Hoshaiah üha Azariah omme, ükhong lili mepu kahtalan omyange pei,

²hüyange Jeremiate i, “Toman-e hanghe tong chingmei lamlinge lingpha! Teman Kahwang Youngwanpate toman jingne yoppha. Aoyin yinpu okyangki tüolan khongkümpu jingne yoppha. Hipak ja me toman maawe ngohyangki; hüpoi sha-a nange ngeye okpu kih-e, toman üjingha hei towe tüohnang.

³Teman Kahwang Youngwanpawe toman ümeken me tailak lamnyu hüolak jingne hüyange toman-e hanghepake linglak hüolak jingne yop pha.”

⁴Hipa Jeremiawe jan, “Hüma-a yeonge meiteki. Numan-e hangke tong tüo kih-e taowe teman Kahwang Youngwanpate yoplak. Youngwanpawe hanghe ilakeih, Taowe numante hango lowe ye-anglak.”

⁵Hüwante iman-e Jeremiate i, “Teman Kahwang Youngwanpawe toman jingne nangte phapu ngaokenglan toman-e yejaima-a toman phei tüi-e Youngwanpa - ütingpa hüyange khakshupu saki ne mengpha.

⁶Toman jingne hatüo meiyah yemeiyah, aote nange yoplak jingne toman-e tongnang, teman Kahwang Youngwanpa ngao toman-e jailak. Toman-e I ngao jaima-a khongkümpu toman jingne meiye tailak.”

⁷Nyih pen phei me Youngwanpawe Jeremia phei ngao:

⁸Tüokhei Iye Johanan, nyahpong woipalan aoyin Iphei jamme ngoh khongküm, hüyange ülao kahtalan üjoi üyong khongküm jamshe nyik;

⁹hüyange imante i, “Israel Kahwang, Youngwanpa, ao tangte numan-e numan jingne yoppe tonglak jingne tao shon Iye i.

¹⁰‘Tüopa kahmük me numan nyoi-e ngoh huma-a, hüma-a Taowe numan loiye tamlak hüyange numan phünne yewinlak; Taowe numan shomme tamlak hüyange numan bheiye yewinlak. Numan tangme Taowe yahpeipu mahtampuwe üte mongmeng üyong ngaine tamyangki.

¹¹Babilon ahngpate nyampu mepu laktüoh. Tao numan phei ngohnang, hüyange I wong mepu Taowe numan yinne tamlak.

¹²Hangjingne Taowa yayeng shüpshe phei, numan tangme Iye shüpshe ne Taowe linge tamlak hüyange numan nokte leih yene tamlak. Tao, Youngwanpawe ngaoyangki.’

¹³“Hüpoi numan-e yelakpe numan Kahwang Youngwanpa ngao minjai she ima-a, hüyange tüopa kahmük me minngoh she ima-a,

¹⁴numan-e hüke, ‘Yeje, toman tailak hüyange Egypt me ngohlak, ümeken me toman-e shaaji wehok yehüolak yejema-a shapju nyikpu yejailak yejema-a seanyaopu yengohlak.’

¹⁵Hüma-a Israel Kahwang ütahpa Youngwanpawe inang, ‘Numan Egypt te taiye nyoiye ngohuwe mongpu ne mengma-a,

¹⁶hüma-a numan-e nyamme teihpu yanglow-e numan tangme okpu ngelak; hüyange numan-e nyamme teihpu seanyao yenglepuwe numan phei woilak, hüyange numan tüoyekao Egypt me lilak.’

¹⁷Kahta aoyin Egypt me taiye nyoihuwe teih khongkümpu wehok me yejema-a nyaoweleye yejema-a daktin phei lilak. Iman yome sheja nehoi yangpu ye-oklak, Taowe iman tangme yahpeilak mahtampupa mepu sheja nehoi yeyinlak.

¹⁸“Youngwanpa Israel Kahwange inang, ‘Jerusalem kahtalante ümong shihpu hüyange shihkhahpu shokke tampu kih-e, tüokih-e numan Egypt te taima-a ümongshihpu hüyange shihkhahpu shokke tamlak. Numan yashanyaliye mükshaowangnyakpu ngelak; kahtalan-e numante ye-i-yeshepe leilak hüyange numan min-a phoiwümme jonlak. Numan-e tüopa nyoi nishe ye-ngelak.’ ”

¹⁹Hüwante Jeremiawe yelakpe i, “Youngwanpawe numan kahtalan aoyin Judah me tüoh, Egypt te yetailak jingne inang. Tüokhei sha-a taowe numante deingao pha nang;

²⁰hüke numan-e mahlakpa ne püohnang. Numan-e üte teman Kahwang Youngwanpate numan jingne yoppha she tong, hüyange Iye numante phapu ngaokeng lili jonlak she numan-e janyangki.

²¹Hüyange sha-a taowe numante iyangki, hüpoi sha-a numan-e teman Kahwang Youngwanpawe numante ilak jingne üte ngaowe tampu lili numan-e yejai.

²²Tüokheima, tüopa teihtüoyah, numan wehok me, yejema-a seanyao yengleye, yejema-a daktin kaiye ümeken kahmük me numan taiye nyoihu nang tüoken me lilak.”