Read Konyak Naga JEREMIA 43 Bible Online

JEREMIA 43 - Konyak Naga bible

JEREMIA 43

¹Aope iman Kahwang Youngwanpawe imante ngaowe tamlak jingne Jeremia shonne tampu ngao lili kahtalante ngaowe sho;

²hüwante Hoshaiah üha Azariah hüyange Kareah üha Johanan hüyange jamloipu ülao kahtalan khongkümpuwe Jeremiate i, “Nange tahleih inang. Toman Kahwang Youngwanpawe toman yetailak hüyange Egypt me yenyoilak ngaowe tamne toman tangte nang yeshon ja.

³Neriah üha Baruch-e toman phei tüi-e nangte henge tam; tüokaiye toman tangme Babilonlan-e wong tüolak hüyange toman toine ok yejema-a Babilonte toman yahteilak.”

⁴Tüokhei Johanan jeyah yejema-a nyahpong woipalan ütamne jeyah yejema-a kahtalan ütam me nehoi Youngwanpa ngao jaiye Judah kahmük me ngohlak yemong.

⁵Tüophei me Johanan hüyange nyahpong woipalan khongkümpuwe Judah me tüopu kahta lili Egypt te yahtei, ümeken jat-hei-li me iman yanne angpu leiyeyapeih kahta lili jamshe yahtei:

⁶netanlan, shekolan, nahalan, hüyange ahngyhalan khongküm. Aoyin Nebuzaradan woipa ütahpawe Gedaliah paowetükke anglak jingne tüoyapeih, Baruch hüyange Jeremia omme iman-e moilan yahtei.

⁷Iman-e Youngwanpa ngaokeng yejai hüyange Tahpanhes chingnyute ngoiye Egypt te tai.

⁸Hüwante Tahpanhes me Youngwanpa ngao Jeremia tangte pei.

⁹“Nang yak me long üyonglan jonyah, hüyange Tahpanhes me pharaoh ahngnokte ongpu lam me, Israel kahtalan khongkümpu sheshao me jaklong (tange lingpu long) phei lingpu longkook me tüolan-a jüowe tamtüoh.

¹⁰Tüophei me imante hüke itüoh hüke Tao, Ütahpa Youngwanpa, Israel Kahwange ü-shaoshanpa Babilon Ahngpa Nebuchadnezzar tüopa nyoijingte yahpeilak, hüyange Iye ahngching nange jüowe tampu tüopa long tangme linglak, hüyange iman tangme ahngching nyenok yüoh tamlak.

¹¹Nebuchadnezzar peilak hüyange Egypt naolak. Kahtalan aoyin daktin phei mahtamlak ne ngoh iman-a daktin phei lilak, aoyin phowe teiye mahtamlak ne ngoh, iman-a phowe teilak, hüyange aoyin yanglow-e mahtamlak ne ngoh iman-a yanglow-e mahtamlak.

¹²Taowe Egypt kahwanglan khümjing te vün pahtamlak, hüyange Babilon ahngpawe iman jing kahwanglan-a jakke tamne ok, yejema-a kiye taine ok. Nyeeyompawe yoi inkhek mepu shük konge winpu kih-e, tüokih-e Babilon ahngpawe Egypt kahmük-a jaoshe-e konge tüohlak hüyange okpu ngeye tailak.

¹³Iye Egypt Heliopolis mepu toinyu long shongnyulan-a menge winlak hüyange Egypt kahwanglan khümjing lan-a vünme jakke tamlak.”