Read Konyak Naga JEREMIA 44 Bible Online

JEREMIA 44 - Konyak Naga bible

JEREMIA 44

¹Youngwanpawe Jeremiate Egypt chingnyulan Migdol, Tahpanhes, hei Memphis, hüyange kahmük heyekao me nyoi ngohpu Israellan jeng me hüke ngao.

²Ütahpa Youngwanpa, Israel Kahwange i, “Taowe Jerusalem tangme hüyange Judah chingnyu ülaolan khongkümpute yahpeipu mahtampu numan-e numan nying nyingke ngeyangki. Sha-ate ngoiye tüolan-a heamteiye ngohnang, hüyange tüolan me ao-o yenyoi;

³hangjingne imantepu kahtalan-e ünu ling hüyange Tao mongshih ngaine tam. Iman-e ülao kahwanglante toidopu pha hüyange iman yejema-a numan yejema-a numanjing pajeiyonglan-e aope-o yeyop yekhümpu ülao kahwanglan shaoshan.

⁴Taowe numante ü-shaoshanpa hipalan shonpu yelakpe ang, aowe Taowe nupu nyamnyam shepu toi yelinglak jingne numante ngao.

⁵Hüpoi numan-e yejai yejema-a mongo yepha. Numan-e ülao kahwanglante toidopu phawe ünu lingpu yetüoh.

⁶Tüokhei Taowe ümongshihpu hüyange mengshipu Judah jilalante hüyange Jerusalem püanglam lili me shokke tam; hüyange Taowe tüolan-a vün pahtam. Tüolan-a heamme kümteiye tüoh hüyange tenyih iman hangke ngoh hüke mükshao wangnyak pongpu nyoi ne meng.

⁷“Tüojingne Tao, Ütahpa Youngwanpa, Israel Kahwange, sha-a hangne numan-e hükihpu ünu toi numan nying nyingke lingnangki she tongnang. Numan-e mahtampupa netan shekolan tangme, nahalan hei naotak-halan tangme, peine tamme, tüokaiye numan kahtalan-a sheja nehoi yetüohtamhupe teihpu a?

⁸Hangne numan-e peshaolante yoppe khümpuwe, hüyange tüoken Egypt ümeken me numan nyoilak jingne pei tüoken me ülao kahwanglante toidopuwe Tao mongshih ngaine tampu? Numan-e hatüowa numan nying nyingke mahtamlak jingne, tüo kaiye kahtoknyu mepu jatlan liliye numante ye-i-yeshe yaowelelak hüyange numan min phoiwümpu phei jonlak jingne lingnang!

⁹Judah kahtok me numan pajeiyonglan-e, Judah ahnglan-e hüyange iman jing shekonyulan, hüyange numan hei numan jing shekonyulan-e lingyangpu ünu toishao lili numan-e pemahpu a?

¹⁰Hüpoi tüopa nyih ngoiye numan-e numan nying nyingke inne nyaipu yenang. Numan-e üte yihnoonpu yepha yejema-a Taowe numante hüyange numan jing pajeiyonglante phapu ngaokhümlan kih-e numan yenyoi.

¹¹“Tüojingne, Tao, Ütahpa Youngwanpa, Israel Kahwange numan Judah khongkümpu mahtamlak mongteki.

¹²Judah kahtalan aoyin tüohyangki hüyange Egypt te taiye nyoihuwe teih tüolan jingne-a, iman khongküm, mahne tamlak jingne Taowe leilak. Iman khongküm, üjoi hei üyong, wehok me jeyah yejema-a seanyao yengleye jeyah, Egypt me lilak. Mükshaowang nyakke pongpu ja ngohlak; kahtalan-e imante ye-i-yeshepe nuwe jonlak hüyange iman min-a phoiwümpu me jonlak.

¹³Taowe Jerusalemte wehok, seanyaoyengle, hüyange daktin phei shaoshi yateng ne tampu kih-e, aoyin Egypt me nyoi tüolante Taowe shaoshiyatengne tamlak.

¹⁴Judah kahtalan aoyin tüohyange Egypt te ngoilak jingne pei sheja nehoi yeyin oklak yejema-a yeyanglak. Ümeken me iman üne-o ja me nyoihunang, tüopa Judah te iman ao-o leih yeye-oklak. Chingtaipalan ütam tokte kaiye aowe-o leih yeyelak.”

¹⁵Hüwante netanlan khongküm aoyinne iman shekonyulan ne ülao kahwanglante toidopu phapu shing, hüyange shekolan khongküm aoyin tüoken me yongyange ngoh, Israellan aoyin Egypt yekao me nyoi omme khongkümpu sheiye bangha üyonge Jeremiate i,

¹⁶“Youngwanpa min me nange tomante hanghe iyangki toman-e yejailak,

¹⁷toman-e linglakeih she ipu sheminlamphe toman-e linglak. Toman-e toman jing kahwangyha, wangdang Ahngyha te toidopu phalak, hüyange toman-e yha te dopu wuwüngti shokke tamlak, toman hüyange tomanjing pajeiyonglan-e, tomanjing ahngpa hüyange tomanjing woipalan-e Judah bangchinglan me hüyange Jerusalem püanglamlan me lingpu meimei kih-e linglak. Hüke lingwante toman-e hahying üngang ngoh, toman jaalun, hüyange shangpu yenangpe ngohyangki.

¹⁸Hüpoi toman-e wangdang ahngyha te toidopu lakyangphei me peiye hüyange ahngyhate dopu wuwüngti shokke tampu lakpu me peiye, toman me hango yenang, hüyange toman kahtalan wehok me hüyange seanyao-yenglepu me linang.”

¹⁹Hüyange shekolan-e paowe i, “Aope toman-e wangdang ahngyha lepu me awkek an linge ngai, yhate toidopu pha, hüyange yhate dopu wuwüngti shokke tam, tomanjing netanlan-e toman-e hanghe lingyangki tüote meinangki she i.”

²⁰Hüwante Jeremiawe netan hüyange shekolan aoyinne Ite hatüo kih-e janne ye tüolan khongkümpute i:

²¹“Toidopu hanghepa numan hüyange numanjing pajeiyonglan-e, numan jing ahngpalan hei numan jing woipalan, hüyange kahmük mepu kahtalan-e Judah bangchinglan me hüyange Jerusalem püanglamlan me dopu - tüolan jeng Youngwanpawe yeshing she yejema-a Iye tüolan pemahpu she numan-e teihnangkü a?

²²Tüopa nyihte ngoi-e numan kahmük-a heamme toitateiye hüyange tüopa me ao-o yenyoi. Tüopa-a mükshaowangnyakke mengpu nyoi ne, hüyange kahtalan-e tüopa min-a phoiwümpu me jon hangjingne ima-a Youngwanpawe numan ümeng hüyange ünu lingpu shaaji nün-e ye-ok.

²³Tüopa sha-a ngohpu mahtampu numan tangte pei hangjingne ima-a numan-e ülao kahwanglante toidopu pha hüyange Iye phapu ngaokenglan khongkümpuwa yejonpu kaiye Youngwanpa phei tüi-e ünu om.”

²⁴Jeremiawe kahta lilite, ünyeine shekolante i, “Ütahpa Youngwanpa, Israel Kahwange Egypt me nyoipu Judah kahtalante hanghe i:

²⁵Wangdang ahngyhate nang hüyange nenok shekonyu moini ye lahnyik mongkopu phei janpu yahyangki. Numan-e janyangki hükih numan-e yhate toidopu phalak hüyange yhate dopu wuwüngti shokke tamlak, hüyange numan-e janyangpulan numan-e linglak. Hüma-a, yeonge meiteki! Numan-e janyangpulan lingtüoh! Numan-e jiengyangpu jontüoh!

²⁶Hüpoi sha-a Tao, Youngwanpawe, ü-okkeshangpupa minme Egypt me ngohpu Israel kahtalan üsheite jiengpu yahpute jaiyah: Shaaji aope-o nishe Taowe numan ao te-o ‘Taowe üyin Kahwang min me jieng nang she iye ü-min me jieng ne yetamlak!’

²⁷Numan jaalunpu yenanglak, hüpoi mahtamlak tüopate Taowe leilak. Numan khongküm numan yome sheja nehoi Taowe yetüohpe manngai manngai wehok me yejema-a daktin phei lilak.

²⁸Hüpoi numan yo mepu ütamja lilak mepu yinlak hüyange Egypt mepu Judah te leihyelak. Hüwante yelipe yangpalan-e Ü-ngao heiya iman ngao ütingpa me peiyapeih shinglak.

²⁹Tao, Youngwanpawe ütingme saki phalak hüke Taowe numante tüopa nyoi me shaoshiyatengne tamlak hüyange numan tangme mahtamlak Taowe janpu ütingpa me ngailak.

³⁰Judah Ahngpa Zedekiah Babilon Ahngpa Nebuchadnezzar ao I wepa ne ngoh hüyange I toihuwe teih tüopa te phün-e phapu meimeikih-e Taowe Egypt Ahngpa Hophra Ijing wepa aowe I toihunang Ite phünne phalak.”