Read Konyak Naga JEREMIA 48 Bible Online

JEREMIA 48 - Konyak Naga bible

JEREMIA 48

¹Hatüowa Ütahpa Youngwanpawe Moab jeng hanghe i tüopa ngohnang: “Nebo onyukei, hatüo-a menge tamteki! Kiriathaim, wongnange lat yangphei meipe lan-a lüowe tamteki, hüyange kahtalan wüotüone tamteki.

²Moab müktishiwapu-a taiteki. Wepalan-e Heshbon omteki hüyange Moab jat mahtamlak jingne konkonteki. Kei, yha jat ja ne yemengtamlak teman-e yha langwinhah! Ngatepu lan wünge tamlak; tüopa phei tüi-e nyahponglan yayonglak.

³Horonaim kahtalan-e shappe üngwünpu jaiyah, ‘Yakphei lükpu! Mahtampu!’

⁴“Moab mahtam; nahalan shappu te jaitüoh.

⁵Luhith te ongpu lam paowe iman ünghuh leiye shappu jaitüoh, Horonaim te laipu tailam me mongmenge shappe yoongpu jaitüoh.

⁶‘Hehtüoh, numan üyin jingne phettüoh!’ she iman-e i. ‘Pheih kahtok mepu phao gado kih-e phettüoh!’

⁷“Moab, nange nangjing wongte hüyange moth te monghüm, hüpoi nang nehoi naowe tamlak; nangjing kahwang Chemosh yoijing ahnghalan hüyange ngengpalan phei phowe teilak.

⁸Mahtamlakpa-a bangching lilite peilak, Bangching ja nehoi mahlak mepu yeyin oklak; kahjee hüyange kahko moini mahlak; Tao, Youngwanpawe ngaoyangki.

⁹Moab te hüm phutüoh hangjingne yha heam tüohlak; tüopa mepu bangchinglan-a yenangpu ne lingtamlak, tüoken me ao-o yenyoilak.”

¹⁰Aowe I mongjang üsheiye Youngwanpa toi yeling, tüopa kahta phoiwümtüoh! Hüyange aowe yoi yanglow iy shailak mepu yah-ye-nang, Ite phoiwümpu shahtüoh.

¹¹Youngwanpawe i, “Moab jinte ütuh yenangpe nyoi hüyange aope-o phowe teipu yengoh. Moab-a aope-o leihkheih ne yetampe jünge angpu wuwüngti kih-e hüyange aope-o shengtak ja mepu shengtak jate yeshok tam. Tüopa tepu üwünga aope-o yemah, hüyange tüopa wüngpuwa jin jinte jakih-e.”

¹²Tüokhei sha-a, hipak peiküki aope Taowe wuwüngti kih-e Moab shoklak jingne kahtalan shonlak. Iman-e tüopa tepu wuwüngti shengtak menge ükengne menge tamlak hüyange tüolan khoihpailak.

¹³Hüwante Moablan-e imanjing kahwang Chemosh phei, Israellan-e Bethel phei püoh-e teihpu kih-e, kahwang aote iman-e ütinglakke ngoh, püoh-e teihpu ngohlak.

¹⁴“Toman-a wongnangpu kahtalan, hüyange wehok jingne naomeilan she, hangke numan-e ipu?

¹⁵Moab hüyange tüopa mepu chingnyulan-a mahtam teki; tüomepu shemeipupa shelalan lange kümteki. Taowa ahngpa, Ütahpa Youngwanpa, hüyange Taowe ngaoyangki.

¹⁶Moab mahlak owe peinang, tüopa heamme tamlaka mamshe peinang.”

¹⁷“Tüopa jat jingne mangshaptüoh, numan tüopa shongme owe nyoipalan, tüopa dehepu shingpu numan khongküm. Itüoh, ‘Tüopa me wongnange wanglamlampu mengteki; tüopa müktishiwapu hüyange wongnangpalan-a shaaji yenang.’

¹⁸Dibon me nyoipu numan, yihnoonpu nang nyoijing mepu yukei, hüyange kahmak yome kahtok te shottüoh. Moab menge tampupa tüome ngohnang hüyange tüopa mepu meipe latyangpuwa heamme tam.

¹⁹Aroar me nyoipu numan, lam nah me yongtüoh hüyange tantüoh; aoyin phette tainang tüolante tongtüoh, hanghe ngai iman mepu shinge yahtüoh.

²⁰‘Moab lanteki,’ iman-e janlak, ‘tüopa jingne shaptüoh, tüopa wüotüone tamteki. Arnon Yengyin paowe Moab mahne tamteki she shingne tamtüoh!’

²¹“Kahtang kahjee chingnyulan tangme ngaophünpu peiteki: Holon, Jahzah, Mephaath,

²²Dibon, Nebo, Beth Diblathaim,

²³Kiriathaim, Bethgamul, Bethmeon.

²⁴Kerioth, hüyange Bozrah tangme, üjai me hüyange ü-o me ngohpu Moab chingnyulan üshei tangme ngaophünpuwa peiteki.

²⁵Moab üwonga lange tamteki; tüopa tepu ünganwonga mahne tamteki; Tao, Youngwanpawe ngaoyangki.”

²⁶Youngwanpawe i, “Moab jokne tamtüoh, hangjingne Iye Ü-phei tüi-e hokke weyangki. Moab I yoiye faipu tangme lüpshüplak, hüyange kahtalan-e nyilak.

²⁷Moab, Israel kahtalante nange hangke nyiyaiye tam teihtüoyah? Nange imante iman-a kuhleih-e phopu lan ja leye toiteiyangki.”

²⁸Numan kahtalan aoyin Moab me nyoi, numan jing jila tüotüoh! Taitüoh hüyange longwaklan me nyoitüoh! Kahsho ükook yekao me nyoijing ülüp lingpu awshu kih-e ngohtüoh.

²⁹Moab yeonge ota-nang! Hangshin ota, jamloi, hüyange yoi shaha ne teihpu kahtalan, iman jingne iman-e hangshin teih, toman-e jaiyangki.

³⁰Tao, Youngwanpawe iman jamloipu-a shingnang. Iman yongelüopuwe hangne-o yemenglak, hüyange iman-e lingpu toishaowa jin yelaolak.

³¹Tüokhei Moab me ngohpu moilan jingne Tao yoongeshon hüyange Kir-heres kahtalan jingne Tao shapyoonglak.

³²Jazer kahtalan jingne shappu phei nehoi shenyei she, Sibmah kahtalan jingne Taowe üngwünlak. Zibmah chingnyu, nange wuwüngwu kih-e hanghepa üquilan lipu yengching nyoiye hüyange Jazer nyoiye taiye ok. Hüpoi sha-a nangjing jüo ülicklan hüyange nangjing wuwünglick lan-a menge tamteki.

³³Mongong monglepu hüyange mongmei, üyao pheipu Moab kahmük mepu yahteiteki. Wuwüngti ngütjing mepu wuwüngti yünlak mepu Taowe lakne tamteki; wuwüngti linglak hüyange mongmeipuwe üngwünlak ao-o yenang.

³⁴Heshbon hüyange Elealeh kahtalan üngwün nang, hüyange iman üngwünpuwa Jahaz ngoiye nehoi jainang; tüopa-a Zoar mepu kahtalan-e jaipu oknang, hüyange tüopa-a Horonaim hei Eglath Shelishiyah ngoiye jainang. Nimrim shaoyinlan nehoi eamahteki.

³⁵Taowe Moab kahtalan iman-e yopkhümpu nyoijinglan me jakke dopu hüyange imanjing kahwanglan jingne toidopu lakne tamlak. Tao, Youngwanpawe ngaoyangki.

³⁶Tüokhei ümongjanga Moab jingne mangshapnang hüyange Kir-heres kahtalan jingne, ütamjawe vewo me manglüng hem lokpu kih-e, mangshapnang; hangjingne ima-a iman me nangpu khongküm mahteki.

³⁷Iman khongkümpuwe iman jing shang len hüyange iman jing jumin len. Iman khongkümpuwe iman yak luwe ko ne tam, hüyange moilan-e monnye in.

³⁸Moab noktoklan khongkümpume hüyange ükhong jemjing nyoi lili me ülao hango yenang hüpoi mang shappu shaha, hangjingne ima-a ao-o yelengpu shengtak kih-e Taowe Moab paitam.

³⁹Moab paikhoih tamteki! Üngwün tüoh! Moab wüotüone tamteki! Hatüowa heam tainang, hüyange neikonne ngohpu jatlan-e tüopate nyiyaitam nang. Tao, Youngwanpawe ngaoyangki.

⁴⁰Youngwanpawe janyangki hüke awlanne yoi yangteng saayange lükke tapu kih-e jat jawe Moab tangme lüklak.

⁴¹Bangchinglan hei meipe lat yangpu lan-a omme yahlak. Tüopa nyih me Moab wetaipalan-a sheko ja moipaiwante nyampu kih-e nyamlak.

⁴²Moab mahtamlak hüyange shaaji jat ja ne yengoh oklak, hangjingne ima-a tüopawe Youngwanpa phei tüi-e hokke weyangki.

⁴³Yawinmongpaipu, jhomsalan, hüyange tünkamlan-e Moab kahtalante tün nang. Youngwanpawe ngaoyangki.

⁴⁴Aoyinne yawinmongpaipu mepu yinlak jingne nganglakkeih, jhomsa te yeilak, hüyange aoyin jhomsa mepu ngaine ngang lakkeih tünkam me pholak, Moab mahlak jingne Youngwanpawe hipak ityangki.

⁴⁵Yayengpapu chingtaipalan hipak ja me Ahngpa Sihon wanglam lampu chingnyu Heshbon me jongwanne ngohlak jingne ngang, hüpoi tüopa me vünloong ngai. Üshang yekao hüyange wehok te kenpu Moab kahtalan kahmüoh kahtang vünne hahtam.

⁴⁶Moab kahtalan shüpshelakpa! Kahtalan aoyinne Chemosh te yoppekhüm mahtamteki, hüyange iman jing hala yhala lan phowe yahteiteki.

⁴⁷Hüpoi ngoikülak hipak me Youngwanpawe Moab nishe jaalunne tamlak. Tüolan khongkümpu hanghepa Youngwanpawe ngaoyangki Moab te ngailak.