Read Konyak Naga JEREMIA 49 Bible Online

JEREMIA 49 - Konyak Naga bible

JEREMIA 49

¹Hatüowa Ammon jeng Youngwanpawe inang: “Israel me netan nahalan yenangpu a? Iman nanleipalan yenangpu a? Hangne iman-e aoyinne Milcom te yoppekhüm tüolante Gad yahne tamyange tüoken me nyoi ne tampu?

²Hüpoi hipak ja peiküki aope Taowe Rabbah ahngjong chingnyu kahtalan-e shapju ngaowüng jailak linge tamlak, hüyange tüopa-a heamteiye tüohlak hüyange tüopa mepu chingshaolan-a kahtok ne menge jakke tamlak. Hüwante Israel-e aoyinne iman mepu yah tüopa kahmük leih tüolak.

³Heshbon kahtalan, üngwüntüoh! Ai mahtamteki Rabbah shekolan, mangshapne taitüoh! Monnye inyah hüyange shaptüoh. Nüngneipu phei lüngleitüoh. Numan jing kahwang Milcom-a Ijing ngengpalan hei ahnghalan phei jamme phowe teilak.

⁴Hangne numan ütingyelak okpu kahtalan yonge lüopu? Numan wonga khaiye mahnang. Hangne numan-e numan jing wongte monghümpu hüyange numante aowe-o shümne min mongja she ipu?

⁵Taowe numante üshei yekao mepu yawinmongpaipu yahpeilak, numan khongkümpu phette taikümlak. Moilan yoi yoi üyin jingne phetlak, hüyange numan ükhong nishe jamshe yah jemne ao-o yenanglak.”

⁶“Hüpoi phei me Taowe nishe Ammon jaalunne tamlak. Tao, Youngwanpawe ngaoyangki.”

⁷Edom jengme: Ngangpupa Youngwanpawe hüke inang: Teman me shaaje konjong yenangpu a? Kentamongtingpalan mepu nyüolak-a mahshümpu a? imanjing konjong a nya mahpu a?

⁸Dedan kahtalan, lüppe yetüoh hüyange phettüoh! Lotüoh! Taowe Esau huhayimlan mahtamlak, hangjingne imante shaoshiyateng phalak jingne ü-hipak peiteki.

⁹Aope kahtalan-e wuwünglick khailakei, iman-e wu me ütam tüohnang, hüyange aope wangnyak me kuhpa peiyapeih, iman-e hanghe yahhuwe teih tüo hei iman-e yahnang.

¹⁰Hüpoi Taowe Esau huhayimlan lanshe khokke tam hüyange iman lojing nyoilan yebüangpe tüoh, tüo kaiye iman shaaji lo ne ye-oklak. Edom kahtalan khongküm mahtam teki. Iman sheja nehoi yeto.

¹¹Numan jing khah-halan ü-phei tüotüoh, hüyange Taowe imante paowetüklak. Numan jing wamnyulan üme monghümne tamtüoh.”

¹²“Aoyin shaoshiyatengpu yetüohah shepu ne ngoh tüolan-e nehoi shaoshiyatenge tampu wan mepu yinglak, numan-a shaoshiyatengpu yenangpe taiye oklak she teihnangkü a? Yejelak, numan-e wan mepu yinglak wongpong!

¹³Taowe ü-nying nyingke jiengyangki hüke Bozrah chingnyuwa mükshaowangnyakpu hüyange wanwüng jeng ne menglak; kahtalan-e tüopate nyiyailak hüyange tüopa min-a phoiwümme jonlak. Neikonpu chingshaolan khongkümpu jinjintepu jingne heamlak. Tao, Youngwanpawe ngaoyangki.”

¹⁴Taowe i, “Edom, taowe Youngwanpa mepu ngaolan tüoyangki. Jatlante iman jing nyahponglan jemme tamlak ngaowe tamlak jingne hüyange nangte shümlak jingne tümtüoh she ine, Iye ngaolan kipa shonteki.

¹⁵Youngwanpawe nanga wong yenanglak linge tamlak, hüyange aowe-o nangte wangshüm hüopu yenanglak.

¹⁶Nang otapuwe nang lowetamyangki. Iman-e nangte nyam nang she nange teihyapeyoi aowe-o nangte yenyam. Nanga longwak wakkhüw me kahtang shedaopupa tangme nyoinang; hüpoi nang awlan kih-e ütangpa me ülüp lingyange nyoiyapoi, Youngwanpawe nanga shuiye yeilak. Youngwanpawe ngaoyangki.”

¹⁷Youngwanpawe i, “Edomte peilak mahtampuwa jamloi nyamlakpa ne ngohlak tüokaiye aoyin tüopa linne tailakei, iman mokhlak hüyange fajümlihlak.

¹⁸Sodom hei Gomorrah te ngaipu jakih-e muh, aope iman hüyange neikonpu bangchinglan mahtamlakei Edomte ngailak. Tüoken me nishe ao-o nyoipu ye-oklak. Tao, Youngwanpawe ngaoyangki.

¹⁹Jordan paowe ngohpu phaonyu yüngjong mepu yengkong mailang hü-üngpu hahnyoi me lüowe ngaipu kih-e, Tao peilak hüyange iman kahmük mepu Edomlan mokhsa me phette taine tamlak. Hüwante Taowe lepu woipawe jat te wanglam lamlak. Aowe ü-phei phinne leipu oklak? Aowe üte shapnyikpu nün ok oklak? Hangkihpu wanglam lampawe üte büangpu oklak?

²⁰Tüokhei Edom kahtalan phei tüi-e Taowe hanghe tümpu ngoh, hüyange Teman chingnyu kahtalante taowe hanghe linglak jingne teih jaitüoh. Iman hayimlan nehoi shuiye teilak, hüyange moilan yashanyalilak.

²¹Aope Edom toitalakei, hükihpu ngaowüng ja ngohlak hüke kahtoknyu nopu polak, hüyange ponge wennekapu ngaowünga Ütak Yengching pong ngoiye jailak.

²²Wepalan-e awlan yangteng khupyange shokke tapu kih-e Bozrahte shümlak. Tüopa nyih me Edom mepu wetaipalan-a sheko jawe moipai wantepu kih-e nyamlak.”

²³Damascus jeng me: “Hamath hei Arpad chingnyulan me ngohpu kahtalan mongshang hüyange mongtoitai hangjingne ima-a iman-e ngaolan ümeng jaiyangki. Iman nyampuwe juwe mah, yengching kih-e iman poweshang hüyange iman toloi yemei ok.

²⁴Damascus kahtalan wong yenangpe ta hüyange yawinmongpaipuwe yanmah. Iman-a aa dakpu phei hüyange moipaiwantepu sheko kih-e shaoshi.

²⁵Hoongli mongongpu phei ngohpu chingnyu ütahpa-a hangke wanwüng jengne linge tampu?

²⁶Tüopa nyih me yha mepu shelalan-a chingnyu chingyang me toilak, hüyange yhajing nyahponglan khongküm mahtamlak.

²⁷Damascus jantpenyute Taowe vün pah tamlak hüyange ahngpa Benhadad ahngnok-a jakke tamlak. Tao, Ütahpa Youngwanpawe ngaoyangki.”

²⁸Hatüowa Youngwanpawe Kedar jat jeng hanghe i hüyange Hazorwe wanglam lampu wankamlan, hanghepa Babilon Ahngpa Nebuchadnezzarwe chinghahtam tüopa ngohnang: “Kedar kahtalante shümtüoh hüyange heong yemepu jat kahtalan mahtamtüoh!

²⁹Iman jing nyenoklan hüyange imanjing yinmoklan, imanjing nyenok jhotnye hüyange imanjing nyenok me ngohpu sheminlamphe yahtüoh. Imanjing udhlan yahtüoh hüyange kahtalante itüoh, ‘Numan neikonne yawinmongpailak ngohnang!’

³⁰“Hazor kahtalan, numan üjaite phette taiye hüyange lolak jingne Tao, Youngwanpawe deingao pha nang. Babilon Ahngpa Nebuchadnezzarwe numan phei tüi-e lowetam nang, hüyange Iye hanghe i hatüo ngohnang.

³¹‘Jemyah! Teman-e wengtuh mepu yinpu okke ngoh nangshe teihpu kahtalan chinghahlak! Iman chingnyu me petenlan yejema-a latlak yenang hüyange tüopa-a lanshe tienpu yenangpe ngohnang.’

³²“Imanjing udh hei imanjing mahulan khongküm yahtüoh! Kahtalan aoyinne iman shang shoh-e linnang Taowe üken phe me yanne tamlak, hüyange Taowe iman tangme üshei yekao mepu mahtampupa yah peilak.

³³Hazor jintepu jingne wanwüng jeng, ümeken me hiyan shaha nyoi tüopa nyoi ne linge tamlak. Tüoken me aowe-o aope-o nishe nyoipu ye-oklak. Tao, Youngwanpawe ngaoyangki.”

³⁴Judah ahngne Zedekiah mengpu phei jamshe, Ütahpa Youngwanpawe Elam kahmük jeng hipa Jeremia phei ngao.

³⁵Youngwanpawe hüke i, “Wenglah pheipu kahtalan aoyinne Elam teshinne wongnangne tam, khongkümpu Taowe toilak.

³⁶Elam te üshei yekao mepu wangyang leilak Taowe linge tamlak, hüyange Imepu chingtaipalan kahmük lilite yanne manpong manpong Taowe tüopa mepu kahtalan üken phe me yanne tamlak.

³⁷Aoyinne iman toihunang, tüolan iman wepalante Elam kahtalan nyamne lingtamlak. Ümong shihpu üyong phei Taowe Elam kahtalan yanglow phei mahtamlak hüyange iman jange mantei mantei Taowe iman te nyahponglan shonlak.

³⁸Taowe iman jing ahnglan hüyange ahnghalan mahtamlak, hüyange tüoken me ü-ahngpa shotjing yonglak.

³⁹Hüpoi phei me Taowe Elam kahtalan nishe jaalunne tamlak. Tao, Youngwanpawe ngaoyangki.”