Read Konyak Naga JEREMIA 5 Bible Online

JEREMIA 5 - Konyak Naga bible

JEREMIA 5

¹Jerusalem kahtalan, nangjing chingkeng lamnyute kemme nyüohu! Leiye pongtüoh! Nange ngeya shene leitüoh! Hatleih nyoilan me yamtüoh! Aowe hanghe ütingpa linge okpu hüyange Kahwangte ütinglakne ngangpu kahta ja nehoi nange tüoning ya? Nange tüowe okma-a, Youngwanpawe Jerusalemte ümeng winlak.

²Nange Youngwanpate yoppe khümnangki she iyapeyoi, nange hanghe i tüopa kih-e nang yeje.

³O Youngwanpa, nang mük-a ngaotingpa tangme lei ngohpu ne yeje a? Nange imante heap, hüpoi iman-e mongte dak-e yeteih; nange iman mahne tam, hüpoi iman-e shing yah ne ye-ngang. Iman-e iman sheta long phei nehoi shewan she lingtam; iman-e leih minye she lan.

⁴Hüwante taowe i, “Tüolan-a toinanpa hüyange hango üshingpulan. Iman-e ngayoun-e hüo; iman Kahwange hanghe yahhu, Youngwanpawe imante hanghe lingne tamhu, iman-e yeshing.

⁵Tüokhei tao woipalan tangte tailak, hüyange iman phei ngaolak. Iman Kahwange hanghe yahhu, Youngwanpawe imante hanghe lingne tamhu, ütingme iman-e shingnang.” Hüpoi iman khongkümpuwe Youngwanpa üngan wong yeyah hüyange I minyah she lan.

⁶Tüojingne phao mepu yengkong mailanglan-e iman toilak; wanwüng jeng mepu sholan-e iman-a phünne khoih tamlak. Hüyange shengtüpshah lan hahlak yamme iman bangching lili me jünge kemlak; tüolan kahta ngaiye taima-a, iman-a phünne yoi yoine khoihlak; hangjingne ima-a iman ünu jamloi hüyange hipak phe me iman Kahwang mepu iman lüppe tai.

⁷Youngwanpawe i, “Hangne ü-kahtalan ünu Taowe winlak shi? Iman-e Tao winne tüoh hüyange ütingpa ne yejepu kahwanglante yoppe khüm. Iman manyeiwante Taowe ü-kahtalan uhying, hüpoi iman-e phwngngampu toi ling, hüyange nushakpu me iman hipak win.

⁸Iman-a meimei-e uhyinge angpu lahnyikke hei ngohpu koiponglan kih, moilan-e yoi yupinok shekonyute lahnyik mongko.

⁹Imante Taowe hükihpu toishaolan jingne shangne yetamlak a? she Youngwanpawe inang. Hüyange hükihpu jingne jat ja tangme phuh yehahlak a?

¹⁰“Numan yha jing wuwüngkahte ongtüoh, hüyange mengtamtüoh; hüpoi iman lanshe shümnepa tahtamtüoh. Üquilan lange yahtüoh; hangjingne tüolan üquilan-a üjingne yeje.

¹¹Israel hüyange Judah kahtalan-e üte meimei-e lowelamne tamteki. Tao, Youngwanpawe ngaoyangki.

¹²Iman-e Youngwanpate ngaoleih i hüyange hüke i, ‘Iye ütingme hango yeling külak; teman-e hipak ümeng ye-ngelak; teman me wehok yejema-a seanyao yengle yengohlak.

¹³Iman-e hipalan-a hangne-o yejeja hüpoi ühak yekohpu ngao ngaopalan hüyange iman me Kahwang mepu ngaolan yenangja she iyangki.’ ”

¹⁴Tüokhei, Ütahpa Kahwang Youngwanpawe üte i: “Jeremia, tüolan kahtawe hükihpu ngao ngaoyangpu nanjingne, Taowe nang ju me ü-ngaowa vün kih-e linge tamlak. Kahtalan-a han kih-e ngohlak, hüyange vünne iman-a hah shulak.”

¹⁵O Israel nokphong, numan phei tüi-e taowe jat ja, üjai mepu yahpeilak she Youngwanpawe inang. Tüopa jat wongnangpu phei, tüopa-a üshongwante ngohpu jat, hanghepa ngao nange yeshing yejema-a iman-e hanghe inang yeshing oklak.

¹⁶Iman jing lahhan khok-a epyange ngohpu mangkoksa ngohnang; iman khongküm wongnangpu naomeilan.

¹⁷Iman-e numanjing ülicklan hüyange numanjing hahying hahlak; iman-e numan jing hala yhalalan toilak. Iman-e numan jing nyee ükhong hüyange mahu ükhong langlak hüyange numan jing wuwüngkah hei phukpeelan menge winlak. Meipe latyangphei chingnyulan hanghepa me numan-e monghüm nang iman nyahponglan-e menge winlak.

¹⁸Youngwanpawe inang, “Tüoyangpoi tüolan nyih hipak me nehoi Taowe ü-kahtalan lanshe mahne yetamlak.

¹⁹Aope iman-e hangne tüolan khongkümpuwa Taowe lingpu she tongma-a, Jeremia, imante itüoh, iman-e ü-mepu lüppe taiyange ülao jatlan kahwanglan iman yoi kahmük me shaoshanpu kih-e, tüokih-e iman jingne üjepu kahmükme iman-e yinpalan shaoshanlak.”

²⁰Youngwanpawe inang, Jacob huhayimlante pongtamtüoh, Judah kahtalante itüoh:

²¹“Numan üngapa hüyange woopu kahtalan, mongpha yah; numan mük ngohnang, hüpoi ye-nge ok, hüyange na ngohnang, hüpoi yejai ok.

²²Taowa Youngwanpa ngoh nang; hangne numan-e üte yenyampu? Hangne ü-sheshao me numan yeninpu? Yengching yikeng ne Taowe pheih ange tam, tüopa yekai oklak, jinte ngohlak yikeng. Yengching leihkheih ne ok, hüpoi tüopa kaiye yünne taipu ye-oklak; yengyungpuwa wünneka ne ok, hüpoi tüopa kaiye taipu ye-oklak.

²³Hüpoi tüo kahtalan üngei ne meng hüyange hokkewe; iman lüppe tai hüyange taowa tüoh.

²⁴Iman-e iman mongjang me tüo ye-i, ‘Youngwanpa teman Kahwangte teman-e nyamhah kei, aoheye temante laojee wai hüyange lümlei wai shonne wangpeng lep iye tah yahlak juwan imante phanang!’

²⁵Tüo nanleiye, numan ünu kaiye tüolan shemeipulan numan mepu tienteki.

²⁶Ümeng kahtalan ü-kahtalan yo me nyoinang; kahta aowe awha pholak jingne shaan saayange ngohnang, tüokih-e iman lamyange tanne ngohnang, hüpoi iman-e imanjing tün-a kahta pholak jingne ang.

²⁷Awha kepne taipu kahtawe awhawe ükhok maapu kih-e, iman-e iman noksalan-a nyieye yahyepu toinanne maanang. Tüojingne iman-a wongnang nang hüyange hak nang;

²⁸hangne iman nüt hüyange meiye uhyingpu! Iman-e toi meng lingpu me ityange yenang. Iman-e khahalante iman meitam yepha yejema-a shanghah shaoshipalante ütingpa yehüo.

²⁹Hüpoi Tao, Youngwanpawe, tüolan toishao jingne imante shangne tamlak; tüopa jat tangme Taowe phuh hahlak.”

³⁰Nyam nyamshepu hüyange mokhlak toilam ja kahmük me ngaiteki.

³¹Hipalan-e hango yengao hüpoi tahleih shaha; ngengpalan-e hipalan-e hangke i, hüke wanglam lam, hüyange ü-kahtalan-e ümeng hango yepha. Hüpoi tüolan khongküm aope üküm ngoiye peilakeih iman-e hanghe linglak?