Read Konyak Naga JEREMIA 50 Bible Online

JEREMIA 50 - Konyak Naga bible

JEREMIA 50

¹Hatüowa Youngwanpawe Babilon chingnyu hüyange tüopa mepu kahtalan jingne hipa Jeremia te phapu ngaolan:

²Jatlanyo-me ngaolan shingne tam-e, pongtam tüoh! Füojai phatüoh hüyange ngaolan shingne tamtüoh! Tüopa lowe tah ang! Babilon toitateki, yha jing kahwang Marduk küppe tüohteki! Babilon jing peshaolan wüotüone tamteki, yha jing moung üjen lan-a mengetamteki!

³“Babilon chinghahlak jingne apyekao mepu jat ja peiteki, hüyange tüopa-a wanwüngjeng ne linge tamlak. Kahtalan hei yinmoklan phette yanlak, hüyange tüoken me ao-o yenyoilak.”

⁴Youngwanpawe inang, “Aope tüopa hipak peilakeih, Israel hei Judah kahtalan moini shapjang shappe, iman Kahwang Tao yamme yekülak.

⁵Iman-e Zionte tailam tonglak hüyange tüoyekaote tailak. Iman-e ü-phei jinjinte ngohlak jiengjeppu linglak hüyange tüopa-a aope-o yemenglak.”

⁶“Ü-kahtalan-a nyeeyompalan aoyinne iman kahtang yeme teiyange mahne tampu nyee kih ngohnang. Iman-a kahtang ja mepu ja ngoiye nyee kih-e waa-e kemnang, hüyange iman nok ümeken me ngoh yeshingpe iman-e pemei.

⁷Imante aoyinne iman ngeyapeih khongkümpuwe shüm. Iman jing wepalan-e i, ‘Iman-e Youngwanpa phei tüi-e ünu om, tüokhei teman-e hanghe lingnang hatüowa püohpu ne yeje. Iman jing pajeiyonglan-e Youngwanpate ütinglak, hüyange iman-o iman nying nyingke Ite ütinglakpu phei ngoh hah shepu.’

⁸“Israel kahtalan, Babilon mepu phette taitüoh! Kahmük tüotüoh! Yayongpa ükhong woipu younpong kih-e üwangpa ne mengtüoh!

⁹Taowe apyekao mepu wongnangpu jat ütam po ne tamlak hüyange imante Babilon chinghah ne tamlak. Kahmük phei tüi-e iman shapjute khüng lenglak hüyange tüopa naowe tamlak. Iman-a toilangpute wongnangpalan, hüyange tingyange keppu lahhan aope-o yeshaipulan.

¹⁰Babilon chinghah tamlak hüyange aoyinne chinghah nang iman-e yah-hupu khongküm yahteilak. Tao, Youngwanpawe ngaoyangki.”

¹¹Youngwanpawe inang, “Babilon kahtalan, numan-e ü-jat nyieyah yangki. Numan mongmei hüyange hoongli mongong, mahu-e tah noiye kempu kih-e yejema-a koipong waopu kih-e,

¹²nangnyu-a ye-onge yonge wüokhüolak; yha aowe nang puhtam wüotüolak. Yha üshei yo me jat üjoiha ne menglak; tüopa-a hango yenangpu hüyange yeng yenangpu wanwüng jeng ne menglak.

¹³Ü-mongshihpu jingne Babilon me sheja nehoi yenyoilak; tüopa-a heamteiye shüppe tüohlak, hüyange aoyin tüopa kaiye linne taiyapeih khongkümpu mokhlak hüyange yashanlak.”

¹⁴“Wenglah pheipulan, Babilon phei shapju ponglak jingne khüng lengtüoh hüyange tüopa neikon tüoh. Numan jing lahhan khongküm Babilonte keptüoh, hangjingne tüopawe Youngwanpa, Ü-phei tüi-e ünu omyangki.

¹⁵Chingnyu neikonpu khongkümpu me wehok shapju haatüoh! Sha-a Babilon neikonteki. Tüopa tepu jantpenyu lüowe mengteki hüyange jetateki. Taowe Babilon lante ü-phuh hahnang. Tüokhei numan-e imante ülaolante toiteipu kih-e imante toiteitamtüoh.

¹⁶Babilon me üli deine tahtam yejema-a tah yah ne tahtam. Tüoken me nyoipu yinpalan lili chinghahpu nyahponglante nyamlak hüyange nokte leihye kümlak.”

¹⁷Youngwanpawe inang, “Israel kahtalan-a yengkong mailanglan-e jang hüyange yanne tampu nyee kih-e. Üwangne iman-a Assyria ahngpawe shümme tam, hüyange üküm ne Babilon Ahngpa Nebuchadnezzarwe iman waan khüppe tam.

¹⁸Tüojingne, Tao, Ütahpa Youngwanpa, Israel Kahwange Assyria ahngpate shaoshiyateng ne tampu meimei kih-e, ahngpa Nebuchadnezzar hüyange I jing kahmüklante shaoshi yateng phalak.

¹⁹Taowe Israel kahtalan iman jing kahmükte yah yelak. Iman-e Carmel kahtang me hüyange Bashan yenghoi me ngaipu hahying hahlak, hüyange iman-e Ephraim hei Gilead yikenglan me ngaipu pelick wenglick iman-e hahhupu kih-e hahlak.

²⁰Aope tüopa hipak peilak, Israel me ünu hango ye-ngelak hüyange Judah me nuweshakpu yenanglak, hangjingne aoyin üyin Taowe yinne angyangki imante Taowe ümeng winlak. Tao, Youngwanpawe ngaoyangki.”

²¹Youngwanpawe inang, “Merathaim hei Pekod kahtalante shümtüoh. Toitüoh hüyange iman mahtamtüoh. Taowe nangte ngaokeng phapu lili lingtüoh. Tao, Youngwanpawe ngaoyangki.

²²Kahmük me shapju ngaowüng jainang, hüyange mahpu üyong ngohnang.

²³Babilonlan-e kahtoknyu nopute yanmee phei khoihnyaiye mette tam, hüyange sha-a tüopa yanmee-a khoihteki! Jatlan üshei tüopa kahmükte hanghe ngai tüopate mokhnang.

²⁴Babilonia, nange ü-phei tüi-e yong, hüyange tüopa nange yeshing yapeyoi Taowe nang jingne angpu tünkam me nang photeki.

²⁵Ümeken me Taowe ü-yonglah angyapeih tüopa nyoi Taowe epteki; hüyange ümong shihpu me Taowe tüolan-a yahngai, hangjingne Tao, Okkeshangpupa Ütahpa Youngwanpawe, Babiloniate linglak jingne toiling yangki.

²⁶Yha phei tüi-e üshei yekao mepu shümtüoh hüyange ümeken nyoijinglan me tah hei cee yowe angnang menge eptüoh! Tahlick phongpu shinne nyieyahpulan phongtüoh! Kahmük mahtamtüoh! Hanghe-o towe tahtüoh!

²⁷Iman jing wetaipalan khongkümpu toitüoh! Iman langtüoh! Babilon kahtalan-a mahnang! Imante shaoshiyateng phalak jingne hipak peiteki!”

²⁸Babilon mepu chingtaipalan yinne tai hüyange Zion te pei, hüyange iman-e hangke teman Kahwang Youngwanpawe Babilonte tüopa khümjingte hanghe ling tüopa jingne phuh hahpu iman-e i.

²⁹Wenglah pheipu lante Babilon chinghahlak jingne itüoh. Aoyinne hangke wenglah hei lahhan jonpu mannang moilan shontüoh. Chingnyu neikontüoh, hüyange ao-o yinne tahtam. Lingyangpu khongkümpu jingne shümme yetüoh, hüyange eihate hangke toiteiyangki tüokih-e toitei tüoh, hangjingne yhawe Israel Üjaopa te otapu phei lingyangki.

³⁰Tüokhei tüopa mepu naoshelan chingnyu püanglam me toilak, hüyange tüopa mepu wetaipalan khongküm tüopa nyih me mahtamlak. Tao, Youngwanpawe ngaoyangki.

³¹“Babilon, nanga jamloi otapuwe maanang, tüokhei Tao, Ütahpa Okkeshangpupa Youngwanpa, Taowe nang phei tüi-e yongnang! Nangte shaoshiyateng phalak jingne üte hipak ngoiteki.

³²Nang otapu jat yashah hüolak hüyange toitalak, hüyange aowe-o nangte loiye yetamlak. Taowe nangjing chingnyulante vün pahtamlak, hüyange neikonne ngohpu sheminlamphe mahtamlak.”

³³Ütahpa Youngwanpawe inang, “Israel hüyange Judah kahtalan-a shangne tam. Aoyinne iman phoyangki tüolan khongkümpuwe iman yeonge wongnange yom hüyange iman taine yetam.

³⁴Hüpoi aowe iman yinne tamlakei tüopa-a wongnange ngohnang, I min-a Ütahpa Youngwanpa I yoi nying nyingke iman hangke yahlak hüyange kahtoknyute toleimei yahpeilak, hüpoi Babilon kahtalante shaoshi peilak.”

³⁵Youngwanpawe inang, “Babilonlan phei tüi-e yanglow, hüyange Babilon me aoyin nyoingoh, tüolan phei tüi-e, hüyange tüo mepu woipa hei deitahpalan phei tüi-e!

³⁶Tahleih hipalan phei tüi-e yanglow, tüo kaiye iman ükhu ne menglak! Yhatepu naomeilan phei tüi-e yanglow, tüowe iman-a mahtam ne ok!

³⁷Yha jing koiponglan hei pongtongtoilan phei tüi-e yanglow, hüyange yha shongte nanphenge jempu wetaipalan üshei phei tüi-e, tüome nakshih iman-a sheko ne menglak! Yha jing toinyu nanha üshei phei tüi-e yanglow, tüome nakshih tüolan-a nyeileihlak!

³⁸Yhatepu yeng phei tüi-e heleipu, tüome nakshih jüpmahlak! Hangjingne hatüo-a peshao phongpu kahmük, hüyange peshaolan me iman nga-youn.

³⁹“Tüojingne Babilon me laalan hüyange ünu yahalan hüyange yejaoyeshapu awhalan nyoilak. Kahtalan tüoken me shaaji nishe yenyoilak, peikülak jin üshei me yenyoilak.

⁴⁰Aope Kahwange Sodom hei Gomorrah, hüyange tüopa neikonne ngohpu bangchinglan mahtam, tüo kih-e muh Babilon te ngailak. Tüoken me nishe aowe-o yenyoi oklak. Tao, Youngwanpawe ngaoyangki.

⁴¹“Leihuyah, kahtalan-a apyekao kahmük mepu peiküki, üjai mepu wongnangpu jat; ahngpalan maapuwe wehok jingne tümnang.

⁴²Iman-e yoijing wenglah hüyange yanglow yahteki; iman-a shüpshe yenangpe mengshi puphei. Iman-e imanjing koiponglante ongwante, iman-e yengching wüng kih-e ngao ngaitam nang. Iman-a Babilon phei shapju ponglak jingne tümteki.

⁴³Babilon ahngpawe ngaolan jai, hüyange I yak mangteiye jhot. I-a yeonge khah-e mongshangpuwe moipai wantepu sheko ja kih-e pho.”

⁴⁴“Yengkong mailang ja Jordan paowe ngohpu phaonyu jong mepu hü-üngpu heeijong kahmükte lüowe ngaipu kih-e, Tao, Youngwanpa peilak hüyange Babilon iman jing chingnyu mepu mokhshe phette taine tamlak. Tüophei me Taowe lepu woipawe jatte wanglam lamlak. Ü-phei aowe phinpu oklak? Üte shapnyiklak aowe nün oklak? Hangkihpu wanglam lampawe ü-phei hokpu oklak?

⁴⁵Tüokhei Babilon chingnyu phei tüi-e Taowe tümpu hüyange tüopa mepu kahtalante Taowe hanghe linglak jingne teih jaitüoh. Iman jing nahalan nehoi shuwe yahteilak, hüyange moilan yashanyalilak.

⁴⁶Aope Babilon toitalakei, ngaowüng ja ngohlak hüke kahtoknyu nopu polak hüyange ponge wao-eapu ülao jatlan-e jailak.”