Read Konyak Naga JEREMIA 51 Bible Online

JEREMIA 51 - Konyak Naga bible

JEREMIA 51

¹Youngwanpawe inang, “Taowe Babilonia hüyange tüomepu kahtalan jingne menge tamlakpa yaha (wangyang) ja yah peinang.

²Taowe Babilon mahtamlak jingne tahphan winne tampu wangyang kih-e kahhenglan shonlak. Aope tüopa mahtampu nyih peilakeih, iman-e üshei yekao mepu shümlak hüyange kahmük-a ükeng me tüohlak.

³Tüopa mepu wetaipalante iman jing lahhan keplak jingne hipak tahpha, yejema-a iman jing yan-o tümne tahtam. Naoshelan yinne tahtüoh! Nyahponglan noshe mahtamtüoh!

⁴Iman mayalak hüyange imanjing chingnyu püanglamlan me lilak.

⁵Iman-e Tao, Israel Üjaopa phei tüi-e iman-e ünu omyapoi, Tao, Ütahpa Kahwang Youngwanpawe Israel hüyange Judah yewintüoh.

⁶“Babilon mepu phette taitüoh! Nang üyin jingne phettüoh! Babilonlan, ünu jingne tahtoi tam. Sha-a Taowe ü-phuh hahnang hüyange Iye yampu kih-e shaoshiyatengpu pha nang.

⁷Babilon-a ü-yak me hon wan kih-e, kahtoknyu nopu jokne tamme ngohyangki. Jatlan-e tüopa mepu wuwüngti ying hüyange iman kenmong pomme mah.

⁸Babilon mokhshe toita hüyange tüopa paitam! Tüopa tangme mangshap tüoh! Tüopa jing mako jingne muli yahtüoh, aowe shingpu tüopa meine ok.

⁹Tüoken me nyoipu kahhenglan-e i, ‘Toman-e Babilonte jamlak jingne ngang, hüpoi hatüowa jamloi shonteiye ngoh. Sha-a yha-a tüoh hah hüyange nokte ye mah hah. Kahwange Babilonte I wong khongkümpuwe shaoshiyateng phateki hüyange tüopa-a lanshe mahne tamteki.’ ”

¹⁰Youngwanpawe teman-a ütingpa me ngohnang she hüoteki. Teman taihah hüyange Zion me ngohpu kahtalante teman Kahwang Youngwanpawe hanghe lingyangki i tamhah.

¹¹Numan jing lahhan yetüoh! Numan jing ree tümyah! Youngwanpawe Media ahngpalan lüone tam, hangjingne ima-a Iye Babilon mahtamlak jingne mongpu ngoh. Hatüo kih-e I jing khümjing mengetam yangpu jingne Iye phuh hahlak.

¹²Babilon jantpenyute shümlak jingne yepinlakpa phatüoh. Yompu wongnang tüoh! Weyompalan angtamtüoh! Kahtalan doyu ne tümtüoh! Babilon kahtalante Iye hanghe linglakei she Iye i, Youngwanpawe tüopa lingteki.

¹³Tüopa kahmük me yengyin üngang ngohnang hüyange toinyu nanha me hakpa, hüpoi tüopa tepu hipak linteki, hüyange tüopa üyin wu langteki.

¹⁴Ütahpa Youngwanpawe yoi üyin ne jiengjeppu ja phanang hüke Iye kahtalan üngang Babilon chinghahlak jingne dukh üngang kih-e yahpeilak hüyange iman-e okyange üngwünlak.

¹⁵Youngwanpawe kahtoknyuwa I üngan wonge ling, I konjonge Iye kahtoknyu linge ngai hüyange Iye shingne okpuwe wangdanglan lanne tam.

¹⁶Aope Iye üngwün tamlakeih, wangdang ütokye me yeng khungkhak nang; Iye kahtoknyu üküm yekao mepu wangphomlan yah peinang. Iye wai yo me wanglüppe wangyu tamnang hüyange I yoiye angpu nyoi mepu wangyang shonnang.

¹⁷Tüolan shao me, kahtalan üngapa ne hüyange juteih yenangpe ngainang; aoyinne peshaolan ling iman wüotüone tam. Hangjingne ima-a iman-e lingpu kahyaklan-a üleihpa hüyange lüohepu yenang.

¹⁸Iman-a ühak yekohpulan hüyange ye-i-yeshepe linglak yang; aope iman phei ngaolak jingne Youngwanpa peilakeih iman-a mahtamlak.

¹⁹Jacob Kahwang-a iman kih-e yeje, aowe sheminlamphe ling tüopa-a I, hüyange Iye yoijing kahtalan ne menglak jingne Iye Israel leyangki. Ütahpa Youngwanpa-a I min ngohnang.

²⁰“Nanga ü-yanmee, wehoktepu ü-yonglah: Taowe jatlan hüyange ahngchinglan mahtamlak jingne nang jon;

²¹Koiponglan hei tüome shotpalan phünne khoihtamlak jingne, pongtongtoilan hei iman woipalan phünne khoihtamlak jingne,

²²sheko hei netanlan toilak jingne, wupa hei nahalan langlak jingne, naoyha hei naoshelan toilak jingne,

²³nyeeyompalan hei imanjing nyee ükhong langlak jingne, kah hokpu kahtalan hei iman jing koiponglan langlak jingne, wanglam lampalan hei woipa ütahpalan mahtamlak jingne nang jon.”

²⁴Youngwanpawe inang, “Babilon hüyange tüopa mepu kahtalante Zion te iman-e lingyangpu ünulan khongkümpu jingne Taowe leih phapu numan mük-e ngelak.

²⁵Nanga kahtoknyu nopu mahtampupa kahtang kih-e ngohnang, hüpoi Tao, Youngwanpa, Taowa nang wepa. Taowe nangte tüklak, kahtok phei sheanne nanga shünge tailak, hüyange nanga tüpla ne menge tamlak.

²⁶Heamtepu nang mepu long aope-o nishe nok welak jingne aowe-o yejonlak. Nanga jintepu jingne wanwüng jeng ne menge ngohlak. Tao, Youngwanpawe ngaoyangki.

²⁷“Chinghahlak jingne yepinlakpa phatüoh! Nyawong wüngtüoh hümme nakshih jatlan-e jailak! Babilon phei tüi-e wehoklak jingne jatlan-e tümtüoh! Chinghahlak jingne Ararat, Minni hüyange Ashkenaz ahngchinglante itüoh. Chinghahpu woilak jingne woipa letüoh. Dukh ünganglan kih-e koiponglan peitam tüoh.

²⁸I phei wehoklak jingne jatlan-e tümtüoh. Media ahngpalan, imanjing woipalan hüyange üyonglan, hüyange iman-e wanglam lampu kahmüklan tepu nyahponglan jingne shontüoh.

²⁹Kahtoknyu ninnang hüyange ponang hangjingne ima-a Youngwanpawe Babilon wanwüng jengne linge tamlak jingne Iye tümpu, ümeken me ao-o yenyoilak jonne tainang.

³⁰Babilon wetaipalan-e hokpu lakteki hüyange iman pekon mongme ngohnang. Iman-e iman lahnyikpu shaaji yenang hüyange sheko kih-e mengemah. Chingnyu petenlan-a mengteki, hüyange noklante vün pahteki.

³¹Babilon ahngpate I jing chingnyu üshei yekao mepu toitateki she ilak jingne ngaolan kipa ja phei me ja ja phei me ja she phetnang.

³²Wepalan-e yengpong omteki hüyange yomtep lili vün me jakke tamteki. Babilon wetaipalan mokh she mokhpu ngaiteki.

³³Wepalan-e iman-a mamshe akke tailak hüyange tahnoijing nyoi mepu ülick kih-e imante yawe shope tamlak. Tao, Ütahpa Youngwanpa, Israel Kahwange ngaoyangki.”

³⁴Babilon ahngpa Nebuchadnezzarwe Tao akke tai hüyange tüopa hahtam. Iye chingnyuwa shengtak kih-e ükengne menge tam; khongkhaiye lünge taipu kih-e Iye tüopa lünge tai; Iye hanghe yahhu Iye yah hüyange topulan-a winnetam.

³⁵Zion kahtalan-e ine tamtüoh, “Tomante yakphei lükke lingetampu ümenga Babilon-e kitüoh!” Jerusalem kahtalan-e ine tamtüoh “Hanghepa jingne toman shangepong nang ümengpa-a Babilon-e kitüoh!”

³⁶Tüokheima Youngwanpawe inang, “Numan heepa ne Tao menglak hüyange numan wepalante iman-e numante hanghe ling tüopa jingne Taowe shümlak. Taowe yengpeiwo eamah ne tamlak hüyange tüopa mepu yengyinlan eamah (jüpmah) ne tamlak.

³⁷Babilon-a heamme phongpu ümeken me phao yinmoklan nyoi tüone menge mahlak. Hatüowa mükshaowangnyakpu nyoi ne menglak; ao-o tüoken me yenyoilak, hüyange aoyinne tüopa nge khongkümpu nyamme mahlak.

³⁸Kahtalan yengkong mailang kih-e waolak hüyange yengkong mailang ühalan kih-e hünghanglak.

³⁹Iman ünyei hahhu yinghupu a? Taowe imante mo ja tümtamlak hüyange iman jokyange mongmeilak. Iman shilak hüyange aope-o yelüolak.

⁴⁰Taowe iman-a lange toilak nyeehalan, youn, hüyange nyeeponglan kih-e yahlak. Tao, Youngwanpawe ngaoyangki.”

⁴¹Youngwanpawe Babilon jeng inang: “Kahtoknyu nopuwe minyong phapu chingnyuwa omme yahteki! Jatlan jingne Babilon-a hangke mükshaowangnyakpu ja ne mengpu!

⁴²Babilon tangme yengchinge lüpteki hüyange tüopa tangme yengyungpu wüng üyonge phüngteki.

⁴³Bangchinglan-a mükshaowangnyakpu nyoi ne mengteki hüyange tüolan-a yeng yenangpu wanwüng jeng kih-e, ümeken me ao-o yenyoi yejema-a kem nehoi yekem.

⁴⁴Taowe Babilon kahwang, Bel te shaoshiyateng phalak, hüyange Iye kuhyahpu toinanlan tüohne tamlak; jatlan-e shaaji Ite yoppekhümpu yengohlak. Babilon jantpenyu toitateki.

⁴⁵Ü-kahtalan tüomepu phette taitüoh! Numan üyin jingne nyamlakpa ne ümongshihpu mepu phet tüoh.

⁴⁶Numan-e jaipu ngaowoong jingne mong shoiye tahteih yejema-a nyamme tahteih. Wangpeng lep iye ngaowoong lamme lamme yannang, kahmük me yakphei teilükpu hüyange ahngpa jawe japhei tei hokpu ngaowoong yannang.

⁴⁷Tüojingne Taowe Babilon peshaolan phei ngaolak hipak peiküki. Kahmük nopu wüotüone tamlak, hüyange tüopa mepu kahtalan khongkümpu toilak.

⁴⁸Kahtoknyu me ngohpu sheminlamphe hüyange wang me ngohpu lili, aope tüopa mahtamlak jingne apyekao mepu peipu kahtalan sheshao me Babilon toitapu ngelakei mongmei puwe üngwünlak.

⁴⁹Babilon-e kahtoknyu nopu tangme kahtalan li ne tamyangki, hüyange sha-a Babilon toitalak hangjingne tüopawe Israellan üngang li ne tamyangki. Tao, Youngwanpawe ngaoyangki.”

⁵⁰Youngwanpawe yoi kahtalante Babilon me inang: “Numan lilak mepu yangteki! Sha-a taitüoh! Tanne tahngoh! Numan nok mepu jaiye ngoh yahpeyoi, numan Youngwanpa Tao teih tüoyah, hüyange Jerusalem teihtüoyah.

⁵¹Numan-e iyangki, ‘Tomante wümnao ne tam hüyange wüotüone tam; toman lanshe yinlak lam yenangpe pei hangjingne ima-a kahhenglan-e khümjing mepu üjao nyoijinglan yahteiye ngoh.’

⁵²Tüojingne Youngwanpawe inang, hüke hipak peiküki Taowe Babilonlan peshaolan phei ngaolak, hüyange kahmük nopu me mayah yangpulan wao ealak.

⁵³Babilon wang ngoiye onge okyapoi hüyange tüoken me wongnangpu phei meipe latte lingyapeyoi, Taowe yelakpe muh tüopa mahtamlak jingne kahtalan shonlak. Tao, Youngwanpawe ngaoyangki.”

⁵⁴“Babilon me shappu wüng jaitüoh, kahmük me mahtampu peipu jingne mangshappu!

⁵⁵Youngwanpawe Babilon mahtam nang hüyange tüopa jünge ngohne tamnang. Nyahponglan yengyungpu wüng kih-e shiengnang, hüyange üngwünne moppe shümnang.

⁵⁶Iman-a Babilon mahtamlak jingne peinang; tüopa mepu wetaipalan-a photeki, hüyange imanjing wenglah-a mengteki. Taowa Kahwang ja aowe ünulante shaoshiyateng pha nang hüyange Iye tüone wangpu kih-e Taowe Babilonte toiteilak.

⁵⁷Taowe tüopa mepu wanglam lampalan jokne tamlak, konjong pheipu, woipalan, hüyange wetaipu kahtalan. Iman shimahlak hüyange aope-o yelüolak. Tao, Youngwanpawe ngaoyangki, Taowa Ütahpa Youngwanpa.

⁵⁸Babilon okkeshangpupa jantpenyu kahtokte shieppe tailak, hüyange tüopatepu daonok petenlan vünne hahlak. Jatlan toishaolan-a khongkümpu hangne-o yemeng; iman ngangyangpu lan-a vünloong ne menge mah. Tao, Ütahpa Youngwanpawe ngaoyangki.”

⁵⁹Ahngpa Zedekiah yakjongpane Neriah üha hüyange Mahseiah ühu Seraiah ngohyangki. Judah me Zedekiah ahngne mengpu wangpeng peli shepupa me, Seraiah I phei jamme Babilon te tai, hüyange hipa Jeremiawe Ite winneshaipu ütam pha.

⁶⁰Jeremiawe laitep ja me Babilon tangte peilak mahlakpa jeng khongkümpu nyan, tüophei jamme Babilonia jeng me ülao toishao khongkümpu nyan.

⁶¹Jeremiawe Seraiahte i, “Aope nang Babilon ngoilakei, tüopa me nyanne ngohpu sheminlamphe kahtalante üngwünne iye hüotüoh.

⁶²Tüopheime yoptüoh, ‘Youngwanpa, nange iyangki hüke nange tüopa nyoi mahtamlak, tüokaiye tüopa me yinmoknyuha hango yengohlak, kahta jeyah yinmok jeyah, hüyange tüopa-a jintepu jingne wanwüng jeng ja ne menglak.’

⁶³Seraiah, aope nange kahtalante tüopa laitep iye sholakei, hüwante long ja me tüopa laitee-a shatüoh hüyange Euphrates yengyinte tüopa shüppe tamtüoh;

⁶⁴hüyange itüoh, ‘Babilonte hatüo kih-e ngaikülak, tüopa-a hümme talak hüyange nishe aope-o yelüolak, hangjingne ima-a Youngwanpawe tüopa tangme mahtampupa yah peilak.’ ” Jeremia ngaolan tüome laknang.