Read Konyak Naga JEREMIA 52 Bible Online

JEREMIA 52 - Konyak Naga bible

JEREMIA 52

¹Aope Zedekiah ahngne mengyapeih wangpeng da me ja lwngmei ne ngoh, hüyange Iye Jerusalem me wangpeng pen me ja wanglam lam. Inyu min-a Hamutal, Jeremia yhala ao Libnah chingnyu me nyoi.

²Ahngpa Jehoiakim-e lingpu mei mei kih-e, Ahngpa Zedekiahwe Youngwanpa sheshao me ünu om.

³Jerusalem hüyange Judah kahtalan tangme Youngwanpa yeonge mongshih ngai, tüokeiye Iye iman-a I shong mepu jange win. Zedekiahwe Babilon ahngpa Nebuchadnezzar phei tüi-e hokke yong.

⁴Tüojingne Nebuchadnezzar Ijing nyahponglan khongküm puphei pei hüyange Zedekiah wanglam lampu wangpeng tu lekeng pen nyih pen shepupa me Jerusalem chinghah. Iman-e chingnyu ü-at yeme lakjing ling, tüopa neikonne tukke yahpu jantpenyu ling,

⁵hüyange Zedekiah wangpeng pen me ja manngoi manngoi tüopa-a tukyange ang.

⁶Tüopa wangpeng memuh lekeng peli nyih tu shepupa me, aope seanyao yenglepu jamloi yemeipe kahtalan-e hahlak hango yenangpe ngai,

⁷chingnyu jantpenyulan lüowe meng. Babilonlan-e chingnyuwa neikonyange ngohyahpoi, wetaipalan khongkümpu wangnyak me taiye küm. Iman ahngnok pesha tailam yekao me tai, jantpenyu ni hüojingke petenlam kaiye tai, hüyange Jordan kahjee yekaote phette tai.

⁸Hüpoi Babilonlan nyahponglan-e Ahngpa Zedekiahte jang, Jerikho kahjee ü-o me Ite pho, hüwante Ipheipu wetaipalan khongkümpu I tüoh.

⁹Zedekiah-a Ahngpa Nebuchadnezzar ao Hamath yikengpong mepu Riblah chingnyu me ngoh, tüopa tangte yah pei, hüyange tüoken me Nebuchadnezzarwe Ite ngaophünpu pha.

¹⁰Riblah me Babilon ahngpawe Zedekiah ühalan Iye leiye angyange, toine tam hüyange üne-o Judah üyonglan-o toine tam.

¹¹Tüophei me Iye Zedekiah mük yokke win hüyange yanne khüp hüyange Babilonte yahtei. I lipu nyih manngoi manngoi Zedekiah-a Babilon küpnok me ngohyangki.

¹²Babilon ahngpa wangpeng pen me tu lekeng nga nyih pen shepupa me, Nebuzaradan, ahngpa yakjongpa hüyange nyahponglan woipa, Jerusalemte ong.

¹³Iye khümjing, ahngnok hüyange Jerusalem me ngohpu üyonglan nok khongküm jakke win;

¹⁴hüyange I jing nyahponglan-e chingnyu jantpenyu khongküm khüw menge tam.

¹⁵Tüophei me Nebuzaradan-e kahtalan aoyin chingnyu me tüoh, manneyange toiling okpu towe tüohpu kahtalan, hüyange aoyin ye-ok yeshangpalan Babilonlante tüoh, khongkümpu Babilonte yahtei.

¹⁶Hüpoi Nebuzaradan-e toiha kahtalan ütam, aoyin me mothkat hango yenang, Judah me tüoh; hüyange Iye iman-a wuwüngkah hüyange kah hamlak jingne tüoh.

¹⁷Babilonlan-e shakphan yan shongnyulan khoihnyaiye menge hüyange khümjing me ngohpu tongtoilan, shakphan yan yengnung shekhaopupa-o omme menge tam, hüyange iman-e shakphan yan khongküm Babilonte yahtei.

¹⁸Iman-e üne-o kahhoklak hüyange wümjong jaolak jingne jonpu jeplak, vüntük yonglak jingne jonpu toinan, toidopu iy shanlak jingne jonpu yankhong, hüyange khümjing me khümme wümwante jonpu ülao toinan khongküm yahtei.

¹⁹Iman-e hon hei khümme lingpu khongküm yahtei. Yankhong üjoiha, vünhan jonpu tükkokha, toidopu iy shanpu yankhonglan, jeplak, vüntük yonglak, sünyet jakke jonpu yankhongha, hüyange wuwüngti dopu phawante shokpu yankhonglan khongküm.

²⁰Shakphan yan toinan ahngpa Solomon-e khümjing jingne lingpulan shongnyu ni, tongtoilan, shekhaopu yengnung, hüyange tüopate shengpu mahu üpong penme ni tüolan-a nopailak jingne jamloi yih ngohyangki.

²¹Shongnyu ni-a jakih-e: daopute yakkong pen metet, khaopute yakkong penme ni hüyange tüopa jeipuwa yaklan peli shümme, hüyange tüopa-a khupyange ngohyangki.

²²Moini üju me shakphan yan yajenth daopute yakkong nga, hüyange tüopa neikonne chamuk lingyange, tüolan khongküm shakphan yan shaha phei lingyange ngoh.

²³Shongnyu linge ngaipu neikonpu me chamuk khongkümpu gho ja, hüyange tüoyo mepu detu me wok-a kahtok mepu ngepu okke ngohyangki.

²⁴Tüo tokte paowe, Nebuzaradan woipa ütahpawe, Ütahpa Ngengpa Seraiah, nishepupa ngengpa Zephania, hüyange khümjing woipa ütahlan lüm ngoiye phowe yah-e tei.

²⁵Iye chingnyu mepu ükhong woipa ne ao ngoh tüopa, ahngpa shaoshanpalan nyit ngoiye aoyin chingnyu me ngoh, nyahponglan yaknyanpa ne mengpu nishepupa woipa ütah, hüyange ülao wongpongne mengpu kahtalan dewok ngoiye yahtei.

²⁶Nebuzaradan-e iman-a Babilon ahngpa, ao Riblah chingnyu me, Hamath yikeng pong me ngoh, I tangte yah tai.

²⁷Tüoken me ahngpawe iman-a toiteiye lingyange li ne tam. Tüokhei Judah kahtalan-a phowe yah-e teiyangki.

²⁸Hatüowa Nebuchadnezzarwe kahtalan phowe teipu nyanne angpu ngohnang: I ahngne mengpu wangpeng nyit shepupa me Iye Judea kahtalan haja lüm phei me da me lüm yahtei;

²⁹I wangpeng pen me tet shepupa me Jerusalem mepu ghotet delüm me ni;

³⁰hüyange Nebuchadnezzar wanglam lampu wangpeng da me lüm shepupa wangpeng me wetaipalan woipa Nebuzaradan-e gho nyit deli me nga yahtei. Khongkümpu sheiye, kahtalan haja peli gho wok yahtei.

³¹I Babilon me ahngne mengpu wangpeng me Evilmerodach-e Judah ahngpa Jehoiachinte yayeng shüpshe hüowe I küpnok mepu lanne tam. Tüopa-a Jehoiachin küpnokte phowe teipu wangpeng delüm me nyit lekeng pen me ni nyih da me nga shepupa me ngaiyangki.

³²Evilmerodach-e Ite yayeng shüpshe pu phei jon, hüyange aoyin ahngpalan I phei jamme Babilonte phowe tei tüolan üshei phei Ite yihnoonpu shotjing sheyong she pha.

³³Tüokhei Jehoiachinte I küpnok me yahpu inkheklan jeileilak jingne tam hüyange towe ngohpu I üyin jin kümme ahngpa khao me jamme shotyange hahne tam.

³⁴Nyih jeih she I üyin me ngohpu hipak mongme, I wongpong jingne nanmee yelakpe phapu ngohyangki.