Read Konyak Naga JEREMIA 6 Bible Online

JEREMIA 6 - Konyak Naga bible

JEREMIA 6

¹Benjamin kahtalan, yinlak jingne phette taitüoh! Jerusalem mepu yinne ngohyah! Tekoa me nyawong wüngtüoh hüyange Beth Hakcherem me füojai vün muktüoh. Mahtamlakpa hüyange, mengewinlakpa apyekao mepu peine oteiye ngohnang.

²Zion chingnyu shemeiyaomawe ngohpuwa taowe lange tüopa-a menge winlak.

³Nyeeyompalan yoi nyee ükhong phei yha phei tüi-e peilak. Iman-e yha neikon-e imanjing nyenok welak, hüyange ümeken me Iye leng tüoken me moilan lakjing linglak.

⁴“Jerusalem chinghahlak jingne tümtüoh! Tümme tayah! Teman-e chinga nyihning hahlak!” Hüpoi üne-o iman-e ilak, “Hatüowa jamloi shonnang, nyih-a linne tainang, hüyange ünpong yashüm shelao she laoküki.

⁵Teman-e chinga wangnyak me hahlak; teman-e meipe latyangpu chingnyuwa menge winlak.”

⁶Ütahpa Youngwanpawe; tüolan ahngpalante peelan aktüoh hüyange Jerusalem omme yahlak jingne üdon linglak ngaokeng pha. Iye iyangki, “Taowe tüopa chingnyute shangne tamlak hangjingne hatüopa me yemeipe shange tampuwe maawe ngoh nang.

⁷Yengnung jawe Imepu yeng jaosheye angpu kih-e, tüo kih-e Jerusalem me yoi mepu ümengpa jaosheye angnang. Chingnyu me yakphei lükpu hüyange mahshupu Taowe jainang; daktinpu hei makolan khongkümpu Taowe ngenang.

⁸Jerusalem kahtalan tüopa shangpuwa nangjingne deingao ne menge tamtüoh, yejema-a Taowe nang winlak; Taowe nangjing chingnyuwa wanwüng jeng, ümeken me ao-o ünyoipu nyoijing ja ne Taowe lüppe tamlak.”

⁹Ütahpa Youngwanpawe hüke inang: “Israel-a hanghepa wuwüngwu mepu wuwünglick jaosheye khaiye yah, tüokih-e jaosheye khaitamlak. Wuwünglick khaipawe lingpukih-e üquilan tangme nang yak üne-o letüoh.”

¹⁰Taowe iman phei ngaoma-a hüyange deingao phaküma-a aowe üte jaikülak shi? Iman üngei ne meng hüyange nang mepu ngaolan minjai she tienyangki; nange üte hanghe ngaowe tamlak jingne i tüopate iman-e nyiye tam.

¹¹Hüpoi iman phei tüi-e nang mongshih ngaipuwe üte-o aateki, Youngwanpa, hüyange Taowe shaaji tükke angne ye-ok. “Ü-mongshihpuwa nahalan tangme chingyang lam me, hüyange jinlalan shüppe jempu ken me shokke tamtüoh. Netanpalan hüyange shekonyulan yah-e teilak, hüyange yeonge wutepheilan nehoi tüoh ne yetamlak.

¹²Imanjing noklan, hüyange hüke muh imanjing kah hüyange imanjing shekonyulan eihate phalak,” she Youngwanpawe inang.

¹³“Moilan, üjoi hüyange üyong khongkümpuwe ngaoting ye-i-pe ngin yo ne ngang nang; hipalan hüyange ngengpalan ne nehoi kahtalante lowetam.

¹⁴Iman-e ü-kahtalan mako-a yak khinne ngoipu kih-e teih-e ling. Aope khongkümpu meiye yengoh yapeih, iman-e i, ‘Khongküm meiye ngohnang’.

¹⁵Iman-e hüke yelengpu toishaolan lingpu jingne iman wüowe teihya? Yewüo, iman lanshe yewüo; iman me sheta taak-e nehoi yengai. Tüokhei ülaolan hangke yei hüke iman yeilak; aope Taowe imante shaoshiyateng ne tamlakei, tüopa-a iman jingne üküm ne menglak. Tao, Youngwanpawe ngaoyangki.”

¹⁶Youngwanpawe yoi kahtalante i; “Lampong me yongtüoh hüyange leitüoh, üshongwantepu yalam jingne, hüyange shemeipupa lamnyuwa ümeken me ngohnangki tongtüoh. Tüopa me kemtüoh, hüyange nanga toloimei me nyoilak.” Hüpoi iman-e i, “Mint, toman yekemlak!”

¹⁷Tüophei me Youngwanpawe deingao nyawong wüngpu jailak jingne yompalan leye tam. Hüpoi iman-e i, “Toman-e yejailak.”

¹⁸Tüokhei Youngwanpawe i, “Jaiyah, numan jatlan, hüyange ü-kahtalan tangme hanghe ngaine ngoh shing yahtüoh.

¹⁹Jaiyah, kahtoknyu! Iman tümme peipu khongkümpute shaoshi yateng phapu ne tüolan kahtalan tangme Taowe heamlakpa yah peinang, hangjingne ima-a iman-e Taowe nyüopu yeyah hüyange ü-ngaolan yejai.

²⁰Sheba mepu iman-e üte yahpeipu sü jingne yejema-a kahmük üjai mepu üpeameipulan jingne Taowe hangte lahnyiklak? Iman-e dopulan Taowe yeyahlak yejema-a iman-e toidopulante Tao mongyemeilak.

²¹Tüokhei Taowe tüolan kahtalan yashah hüowe tamlak hüyange yei tamlak ne anglak. Payimlan hüyange hayimlan, hüyange hüke muh shümpa eihalan hüyange yupilan tüome lilak.”

²²Youngwanpawe inang, “Apyekao mepu kahmük ja mepu kahtalan peiküki, üjai mepu wongnangpu jat jawe wehok jingne tümnangki.

²³Iman-e yoijing wenglah hüyange yanglowlan yah teki; iman-a mengshi puphei hüyange shüpshe yenang. Iman-e imanjing koiponglan me ongyange kemtüohpute, iman wünga yengching yengmokh ngaowüng kih-e jainang. Numan phei shapju hoklak jingne iman tümteki, O Zion yhala!”

²⁴“Toman-e ngaolan jaiteki,” Jerusalem kahtalante itüoh, hüyange teman yak ümang ne menge jhotteki; moipai wante sheko ja pongpu kih-e teman-a juteih mong shangpu hei aa-e dakpuwe photeki.

²⁵Kahyengte yetalak yang yejema-a lamnyu me yekemlak yang, hangjingne ima-a teman wepalan-a yonglah phei hüyange mahtamlakpa-a teman neikonne.

²⁶Youngwanpawe yoi kahtalante i, “Monnye intüoh hüyange kahmak yo me lamtüoh. Numan-e halompa ja shinghate shapyoongpu kih-e mükphi phei khah-e shaptüoh, hangjingne ima-a numan mahtamlak jingne peipupawe mokhshe numante shümlak.

²⁷Jeremia, nange yante tokke leipu kih-e, ü-kahtalante tokke leihu, hüyange iman hanghe lenangki tüo tehu!

²⁸Iman khongkümpu üngeine menge teelapalan, shakphan yan hei yanmei shinne wanpalan ngohnang. Iman khongküm yeshupu shaha, kenphe me kemme hüyange ngaomoppe kempalan ngohnang.

²⁹Vünjüo loiye shemjakpoi yanmenglan yejupu kih-e ü-kahtalan-a üla ne jaowe juwe yelak yemei.

³⁰Iman ünu mepu yego. Iman-a jajang japu yanpakih nangpu jingne! Tao, Youngwanpawe iman-a atyangki.”