Read Konyak Naga JEREMIA 7 Bible Online

JEREMIA 7 - Konyak Naga bible

JEREMIA 7

¹Youngwanpa mepu ngaolan Jeremiate pei:

²“Youngwanpa nok peten shongme yongtüoh, hüyange tüoken me tüolan ngao pongtamtüoh, hüyange itüoh, numan Judah kahtalan khongküm aoyinne Youngwanpate yoppe khümlak jingne tüopa peten mongte ong, Youngwanpa ngao jaiyah.

³Youngwanpa ngangpupa, Israel Kahwange inang, numan kempu lamnyu hüyange numan-e linghümpu toishao mepu monglüp tüoh, hüwante Taowe numan-a tüopa nyoime ngohne tamlak.”

⁴Teman yinne ngohnang! “Hatüowa Youngwanpa khümjing, hatüowa Youngwanpa khümjing, hatüowa Youngwanpa khümjing!” she lüppe lopu ngaote ütinglakpu laktüoh!

⁵“Numan nyoipu nyoingoh wanglam jeilei-e hüyange numan-e lingpu toishaolan lingpu lakma-a; jawe jate paowetükpu meiye lingma-a;

⁶ülaolante, khahalante, hüyange wamnyulante yemeipe lingpu mepu lakma-a; tüopa kahmük me ümeng yenangpu kahtalan toipu lakma-a; ülao kahwanglante yoppe khümpu lakma-a;

⁷numan jeileima-a, Taowe hanghepa numan pajeiyonglante jinte ngohlak moth ne phapu kahmük ngohnang tüopa me Taowe numan nyoi ngohne tamlak.”

⁸“Leitüoh, lowelampu ngaote numan-e numan ütinglakpu angnang.

⁹Numan-e kuhnang, toinang, phwngngampu toi lingnang, jiengjeppu yahjang yah-e tahleih inang, Baalte toidopu phanang, hüyange üshongwante numan-e yeshingpe ngohpu kahwanglante yoppe khümnang.

¹⁰Taowe nupu tüolan numan-e lingnang, hüyange numan peinang hüyange ü-yoi Khümjing ümeken me Tao ngohnang tüoken me yongnang, hüyange inang, ‘Toman yinne ngohnang!’

¹¹Ü-khümjinga kuhleihpalan lojing nyoi she numan-e teihpu a? Numan-e hanghe ling Taowe ngeyangki.

¹²Üwangpa nyoijing ümeken me yoppe khümlak jingne Taowe le, tüopa Shilohte taitüoh, hüyange ü-kahtalan Israel, ünu jingne Taowe hanghe lingtam leitüoh.

¹³Numan-e tüolan ünulan khongkümpu omyangki, hüyange Taowe numante lakjing yenangpe ngaoyapeyoi, numan-e minjai she lanne tam. Aope Taowe nyikyapeih numan-e yejan.

¹⁴Tüokhei, tüopa ü-khümjing, hanghe me numan-e ütinglak nang, hatüo nyoijing Taowe numan pajeiyonglan hüyange numante pha, Taowe Shilohte hanghe ling tüopa ja muh tüopa nyoite Taowe linglak.

¹⁵Taowe numan pheipulan, Ephraim kahtalan jange teipu kih-e Taowe numan ü-phin mepu jange teilak. Tao, Youngwanpawe ngaoyangki.”

¹⁶Youngwanpawe i, “Jeremia, tüolan kahtalan jingne tahyop. Iman nanleiye üng tahwün yejema-a tah yop; ü-phei hango yoppe tongpu tah ngoh, hangjingne ima-a Taowe nangte yejailak.

¹⁷Judah chingnyulan me hüyange Jerusalem chingkeng lamnyulan me iman-e hanghe ling nange ngeya?

¹⁸Nahalan ne han moinang, lwngmeilan ne vün jak nang, hüyange iman-e wangdang ahngyha she nyikpu kahwang yha jingne shekolan-e awkek an ne linglak jingne anhüng nyüt nang. Iman-e üne-o üte mayah-e tamlak nanjingne ülao kahwanglante dopu wuwüngti shokke tam nang.

¹⁹Hüpoi iman-e ütingpa me mayah-e tampuwa Tao ne manglak a? Yeje, iman-e yoi nying nyingke mayah nang hüyange iman nying nyingke wüokhüwpu yah peinang.

²⁰Tüojing ne, Okkeshangpu Youngwanpa, Taowe tüopa khümjing tang me nyam nyamshepu ü-mongshihpu shokke tamlak. Tüopa-a Taowe kahtalan hüyange yinmoklan tangme, hüyange pee hei weang hüyange pelick weanglicklan tangme nehoi shokke tamlak. Ümong shihpuwa aowe-o meine ye-okpu vün kih-e ngohlak.

²¹“Ü-kahtalan, toidopu ütam-a numan-e wümjong tangme lanshe jakke shu ne tamnang, hüyange ütam-a numan-e hahne-o tamnang. Hüpoi Tao, Youngwanpawe hang ipu hatüowa tüo: Numan-e khongkhang küm hahtamlak yang.

²²Aope Taowe iman Egypt mepu yah-e ngaiyapei, hüwante Taowe numan pajeiyonglan te jakke dolak yejema-a ülaopa lamme toidopu jeng ngaokeng hango yepha.

²³Hüpoi iman-e ü-ngao jaitamlak jingne Taowe ngaokeng pha, hümme nakshih Taowa iman Kahwangne hüyange iman-a ü-kahtalan ne menglak. Hüyange iman jingne lamphe li meiye tailak nanjingne, Taowe hangke imante ngaopha hüke nyoilak jingne Taowe imante ngaowetam.”

²⁴Hüpoi iman-e yejai yejema-a mongo yepha. Tüo nanleiye iman üngeipa ne mengpu hüyange ünupa mongjange hanghe linglak jingne imante ngao iman-e tüolan ling, hüyange shemeihah shepu nanleiye iman shemeng she meng.

²⁵Numan pajeiyonglan Egypt mepu lüowe ngaipu nyih mepu sha-apu tüopa nyih ngoiye, Taowe ü-shaoshanpalan, hipalan numante yelakpe shonne ngoh.

²⁶Tüoyangpoi sheja nehoi yejai yejema-a mong yepha. Tüo nanleiye, numan pajeiyonglan phei shenyei she numan ünyei üngeipalan ne hüyange teelapalan ne meng.

²⁷“Tüokhei, Jeremia, nange tüolan ngao khongkümpu ü-kahtalante ngaolak, hüpoi iman-e nangte yejai phalak; nange imante nyiklak, hüpoi iman-e nangte yejan phalak.

²⁸Iman jat hei liye iman Kahwang, Youngwanpa üte yejai yejema-a iman shaoshi yatengpu me shinge yeyah she nange imante ilak. Ütingpa-a liteki. Tüopa jeng-a shaaji ngao nehoi yengao.”

²⁹“Numan shang lintüoh hüyange tüopa wintüoh. Kahmüoh ütangpa me mang lünge taipu hem loktüoh, hangjingne ima-a Youngwanpa Tao, mongshih ngaiteki, hüyange ü-kahtalan atteki.”

³⁰“Judah kahtalan-e ünu toi lingteki. Taowe hanghepate nu, iman-e tüopa peshaolan ü-khümjing me angetam hüyange tüopa nuweshakke tam.

³¹Hinnom kahjee me iman-e Topheth she nyikpu wümjong ling, tüoken me iman-e yoi shelalan hei yhalan vün me toidopu oklak. Hatüo kih linglak jingne Taowe imante yengaotam, ümong jang me hatüo teih-e nehoi yepei.

³²Tüojingne hipak ja peikülak shaaji tüopate Topheth yejema-a Hinnom kahjee she yenyiklak, hüpoi toilangpu kahjee she nyiklak. Iman-e kahtalan tüoken me mulak; hangjingne iman mulak nyoijing shaaji ümeken me-o yenanglak.

³³Kahta manga wang awhalan hüyange phao yinmoklan hahying ne menglak, hüyange iman jange teilak jingne ao-o yenanglak.

³⁴Kahmük-a wanwüngjeng ne menglak. Judah chingnyulan me hüyange Jerusalem chingkeng lamnyu üshei me hoongli mong ongpu hüyange mongmeipu hüyange nokyam mo mongmeipu ngaowünglan Taowe üküm ngoine tamlak.”