Read Konyak Naga JEREMIA 8 Bible Online

JEREMIA 8 - Konyak Naga bible

JEREMIA 8

¹“Tüohipak me Youngwanpawe inang, Judah ahngpalan waan, hüyange üyonglan waan, tüophei jamme ngengpalan waan, hipalan hei ülao kahtalan aoyin Jerusalem me nyoi, iman waanlan iman mangjong mepu pheakke ngailak.

²Jamshe moiye shaiye muwe tamhah shepu nanleiye, iman waanlan-a jantjakpu kih-e kahtok me shüpyange ngohlak. Iman waan-a iman-e kenne hüyange shaoshanyangpu, hüyange hanghepa me iman-e teiyamme yoppekhüm, tüolan wanghe, linnyu, hüyange shanhalan sheshao me tüolan-a shaiye hekolate yamtamlak.

³Hüyange tüopa ünu jat mepu kahtalan aoyin yinlakei, ümeken nyoilan me Taowe yanne tam tüolan nyoi me aoyin nyoi, iman-e üyin me ngohlak phei-a lilakpa shelenglak. Tao, Ütahpa Youngwanpawe ngaoyangki.”

⁴Youngwanpawe yoi kahtalante ngaowe tamlak jingne üte i, “Aope ütamja haowe talakei, I lüowe yeyonglak a? Kahta ütamjawe lamnyu pienma-a, I lüppe yeyelak a?

⁵Hüma-a hangne, ü-kahtalan, ja me nehoi leih üyepe nanga ü-mepu yanne tainangki? Nange nang jing peshao te ken hüyange ü-tangte leih yelak yemong.

⁶Taowe kentinge jai ngoh nang, hüpoi numan-e ütingpa yengao. Numan yo me sheja nehoi yoi ünu jingne mongmenge yeteih; numan yo me sheja nehoi, ‘Taowe hanghe püohpu lingyangpu?’ she yetong. Shapjute phetpu koipong kih-e, moilan yoi yoi teihpu lamme kempu yelak.

⁷Aope leih yelak hipak ngoiyapeih wan-awlan-e nehoi shingnang; shulieng hei longlieng, hüyange ü-ngo lan-e nehoi lüngleilak hipak aope ngoi shingnang. Hüpoi ü-kahtalan, numan-e hanghe ngaokenge Taowe numante wanglam lam yeshing.

⁸“Numan deitahnang she, hüyange numan-e ü-ngaokhümlan shingnang she numan-e hangke ilak? Leihuyah, ngaokhümlan-a ngaoting ye-ipu nyanpalan-e jeilei yangki.

⁹Numan kentamongtingpu wüotüo ne tamteki, iman jiengpei hüyange tün me yüt. Iman-e ü-ngao yeyah; sha-a iman me hanghe konjong ngoh nangki?

¹⁰Tüokhei Taowe iman kah-a nokpu ülalante, hüyange iman jing shekonyulan-a ülao kahtalante phalak. Üjoi üyong moilan-e ngaoting ye-i-pe ngin yolak jingne ngang. Hipalan hüyange ngengpalan-e nehoi kahtalante lowelam.

¹¹Iman-e ü-kahtalan mako-a yak-khinne ngoihpu kih-e teih-e ling. Aope khongkümpu meiye yengoh yapeih, iman-e i, ‘Khongküm meiye ngohnang.’

¹²Ü-kahtalan numan-e hükihpu nulakpa toi lingpu jingne numan wüowe teih ya? Yewüopuyang, numan-a lanshe yewüo; sheta taakke nehoi hangke hüolak numan-e yeshing! Tüokhei ülaolan hangke toita tüokih-e numan toitalak; aope Taowe numante shaoshiyateng ne tamlakei tüopa-a numan jingne ükümpa ne menglak. Tao, Youngwanpawe ngaoyangki.”

¹³“Aope taowe iman shaijemhuwe teihshe, Youngwanpawe i, hüpoi iman-a wuwünglick yenangpu wuwüngwu kih-e, hüyange phuklick yenangpu phukpee kih-e; üyaklan nehoi kui mahteki. Tüokhei, kahmük-a lanshe yahteilak jingne Taowe yinpalante phayangki.”

¹⁴“Hangne teman üne-o shotte ngohpu?” Kahwangpa kahtalan-e tong. Jemkei, meipe latyangpu chingnyulante teman phethah, hüyange tüokenme lihah. Teman Kahwang Youngwanpawe teman li tamlak jingne winne tamteki. Iye temante yinglak jingne soihüng yeng phateki, hangjingne ima-a, teman-e I phei tüi-e ünu ling;

¹⁵Chingmei hüyange meitamlakpa hipak jingne teman-e monghümme teih, hüpoi hatüowa wongpong ne yengai, hüleima-a mahtamlakpa peiteki.

¹⁶“Teman wepalan-a Dan chingnyu me ngoiteki; imanjing koiponglan nakong ngaopu teman-e jainang. Aope imanjing koiponglan waopu jaiyapeih, kahmük nopu ninnang. Teman wepalan-a teman kahmük hüyange tüopa mepu sheminlamphe, teman chingnyu hüyange tüopa mepu kahtalan khongkümpu mahtamlak jingne peinang.”

¹⁷“Youngwanpawe inang, ‘Yomme ngoh yah!’ Taowe numan yo me pulan shonnang; numan-e ngeei-tamne ye-okpu soihüng pheipu pulan, hüyange tüolan-e numante, jotlak.”

¹⁸Ümong mengpuwa meilak mepu yeonge jainang; taowa mongjang me daknangki.

¹⁹Jaitehu! Kahtok nopu me taowe ü-kahtalan üngwünne ngaipu jainang, “Zion me shaaji Youngwanpa yenangpu a? Tüoken me Zion ahngpa shaaji yenangpu a?” Iman ahngpa, Youngwanpawe janne ye, “Hangne numan-e numanjing peshaolante yoppe khümpuwe hüyange numan jing jajang japu ülao kahwanglante khuhtawe khümpuwe Tao mongshih ngaine tampu?”

²⁰“Jüo hipak linteki, tahyahpu shoteki, hüpoi teman-a yinne yenang.”

²¹Ümongjanga paikhoihteki, hangjingne ima-a ü-kahtalan paikhoih; Tao shapyoong nang; taowa lanshe mahtamteki.

²²Gilead me muli yenangpu a? Tüoken me mulijonpa yenangpu a? Hüma-a, hangne ü-kahtalan-a yemei okpu?