Read Konyak Naga JEREMIA 9 Bible Online

JEREMIA 9 - Konyak Naga bible

JEREMIA 9

¹Oh Ü-shanga yeng pheipu yengnungne, hüyange ü-mük-a mükphi yengpeiwo ne ngohshih phang, Ü-kahtalan aoyin toiyangki tüolan jingne, wangnyak wangngai tao shaphah peih.

²Wanwüng jeng me, ümeken me tao ü-kahtalan phei yanne ngohlak nyoijing ja tüoshihma-a taowa tüome ngoh hahpeih. Iman khongkümpu üting yelakpalan, lüppe lowe mop ngaipu phwngngampu ükhong.

³Iman-e hipak phe me tahleih ilak jingne tümnang, kahmük me ütingpa wanglam lamhah shepu nanleiye ngaoting ye-ipu ngohnang. Youngwanpawe inang, “Ü-kahtalanne ünu ja phei me ja she lingnang, hüyange iman Kahwang kih-e tao shinge yeyah.”

⁴Kahta lili yoi yoi shümpa sheshao me kentinglak, hüyange aowe-o yoi jeihei naote mong yehümlak; hangjingne ima-a jeiheinao lili-a Jacob kih-e lowelampu phei, hüyange moilanne yoi yoi shümpate yaowelelak.

⁵Iman khongkümpuwe yoi shümpalan (yupipa) ünyong yete woi, hüyange sheja nehoi ngaotingpa yengao; iman-e imanjing yi-a ngaoleih ilak jingne nyüowe shinyangki, hüyange iman-e ünu ompu-a tüohne ye-oklak.

⁶Iman-e yak phei lükpu toishao ja phei me ja she lingnang; hüyange lowelampu toishao ja phei me ja woiye lingnang. Youngwanpawe inang; yoi kahtalan-e I yeyah.

⁷Tüojingne ütahpa Youngwanpawe inang, “Yan jaowe lingpu kih-e Taowe ü-kahtalan jaoweshinne linglak, hüyange imante tokke leilak. Ü-kahtalan-e ünu lingyangki, üne-o Taowe imante hanghe linglak?

⁸Imanjing yi-a mayahlak lahhan lankih, hipak phe me iman-e tahleih inang. Moilanne yoi yupilan phei shümpa ümeikih-e ngaonang, hüpoi ütingpama-a I jingne tün tünnang.

⁹Tüolan jingne Taowe imante shaoshiyateng yepha lak a? Tüo kihpu jatte Taowe phuh yehah lak a? Tao, Youngwanpawe ngaoyangki.”

¹⁰Taowe i, “Kahtanglan jingne tao mang shaplak, hüyange heeijonglan jingne shaplak; hangjingne ima-a iman eamah, hüyange iman kaiye ao-o yekem. Shaaji mahu ükhong wünga yejai, awhalan hüyange phao yinmoklan yan, hüyange taimah.”

¹¹Youngwanpawe inang, “Taowe Jerusalem heamteiye phongyange, ümeken me hiyanlan nyoi, tüopa nyoi ne ling tamlak; Judah chingnyulan-a wanwüngjeng ümeken me ao-o yenyoi tüopa nyoi ne linge tamlak.”

¹²Taowe tong, “Youngwanpa, hangne hatüo kahmük ao-o tüopa kaiye yekemlak ne hango yenangpe hüyange wanwüngjeng shinne eamah ne tampu? Tüopa shinge üpong tüowe oklak ne kentamongtingpa ne ao ngohlak? Iye ülaolan te ngaowe tamlak ne ao te nange tüopa jeng üpong tüowe ngaotam ei?”

¹³Youngwanpawe jan, “Tüopa ngaiyangki hangjingne ü-kahtalan-e imante Taowe nyüotamyange phapu winne tüoh yangki. Iman-e ü-ngao yejai yejema-a Taowe hanghe ngaowe tam yeling.

¹⁴Tüo nanleiye iman üngeipalan ne meng hüyange iman payimlan-e hüke linglak jingne imante nyüowe tampu kih-e, Baal peshaolante yoppe khüm.

¹⁵Hüma-a, Tao, Israel Kahwang Ütahpa Youngwanpawe hanghe linglakei leitüoh: Taowe ü-kahtalante hahlak jingne pephao ükhah hüyange yinglak jingne soihüng phalak.

¹⁶Taowe iman yejema-a iman pajeiyonglan nehoi yeshingpu jatlan yo me yanne tamlak, hüyange iman lanshe mah-e mantam mantam Taowe iman phei tüi-e nyahponglan shonlak.”

¹⁷Ütahpa Youngwanpawe inang, “Hanghe ngaiyapeih tüopa jeng teih leitüoh! Peilak jingne mangshap palante, aoyinne manglüng hem lokyapeih tüolan shekolan jingne nyiktüoh.”

¹⁸“Teman jingne manglüng hem lokke, teman mük me mükphi manma manma, hüyange shappuwe teman mükshop manteam manteam lokne mamtüoh she imante itüoh.”

¹⁹Zion me üngwünne shappu wüng jaitüoh, “Teman heamme mahnang! Teman lanshe wüotüo tamnang! Teman-e teman kahmük tüohlak yang; temanjing noklan-a shaohshinne mengteki.”

²⁰“Numan shekolan, Youngwanpate jaiyah, hüyange I ngaolante mong phayah. Numanjing yhalalante hangke shappe yoonglak, hüyange numan jing shümpalante manglüng hem hangke loklak nyüotüoh.

²¹Lipupa-a teman tawolan me hüyange teman ahngnoklante onge peiteki; tüopawe chingkeng lamnyulan me nahalan hüyange hatleih nyoilan me naoshelan lange tamteki.

²²Lipu manglan-a kahko me jan jakpu kih-e üken phe me shaiyange, tah yahpalan-e tah yahyange tahyakshüp pe-tüohpu kih-e, aowe-o yenamnopu tahyakshüp kih-e ngoh nang. Hatüowa Youngwanpawe üte hanghe inetam tüopa ngohnang.”

²³Youngwanpawe i, “Kentamongtingpalan iman konjong jingne, yejema-a iman wong jingne wongnangpu kahtalan, yejema-a iman moth jingne hakpa kahtalan, kheyonge yengohlak yang.

²⁴Kahta ütamja kheyong huma-a, Iye Tao shinge okke hüyange shingteki she I kheyonglak yang; hangjingne ima-a Taowe kenpuwa üküm yenang, hüyange hanghepa üting hüyange shunang tüopa Taowe lingnang. Tüolan-e ü-mongmei ne tamnang. Tao, Youngwanpawe ngaoyangki.”

²⁵“Youngwanpawe inang, leihuyah, aope Taowe aoyin shokhüpyangki, hüpoi jiengjeppu ye-ang tüolante Taowe shaoshiyateng phalak nyih hipak peiküki-

²⁶Egypt, Judah, Edom, Ammon hayimlan, Moab hüyange wanwüngjeng me nyoipalan khongküm aoyinne iman shangshoh-e linnang: hangjingne tüolan jatli khongkümpuwe üshoyekhüp, hüyange Israel nokphong khongkümpuwe iman mongjang me üshoyekhüp.”