Read Konyak Naga YOONGESHON 1 Bible Online

YOONGESHON 1 - Konyak Naga bible

YOONGESHON 1

¹Hipak ja me teshinne kahtalan-e maawe ngohyangpu Jerusalem, hangshin wüngmakke shüppe tüohpu! Hipak ja me kahtoknyuwe yihnoonne ang, sha-a yha-a wamnyu ja kih-e; Chingnyulan yo me hamme manyangpupa üphangpa te yeiteki.

²Wangnyak phapan yha shap; yha omtüo tangme, mükphi yünne ta-nang. Yha phei ngohyangpu mai ülanglan yo me, Yha toloimeiye tamlak jingne ao-o yetüoh. Yha phei teishinpulan-e yhate lowelamne tam, hüyange sha-a khongkümpuwa yhatepu wepa ne meng.

³Judah kahtalan-a yafün yenangpe rha ne, nok mepu kange taine tam. Iman ülao kahmük me, imanjing nyoi üja she nyiklak yenangpu ken me, wepalan-e neikongyange, tailak lam yenangpe nyoi.

⁴Sha-apa-a üjao nyihlan me yoppe khümlak jingne khümjingte ao-o yepei. Naoyhalan aoyin tüoken me lakke ngoh shaoshinang, hüyange ngengpalan-a shaphuleihpu me ngohnang. Chingnyu petenlan ükengme yongyange, hüyange Zion-a shangpu üyong phei.

⁵Yha tepu wepalan-e naowe tam; iman-e yha-a imanjing wonge tükke ang. Youngwanpawe yhajing ünulan maapu jingne yha shaoshine tam. Yhajing nahalan-a phoweyah hüyange yah-e teiteki.

⁶Zion müktishiwa yangpuwa lintepu toishao ja ne menge mah. Yha jing woipalan-a seanyao teiye wongyenangpu meishi kih-e, aoyin wong, meitoipalan shaote phetpuwe nyaiye mah.

⁷Sha-a I shaha heamteiye, Jerusalem me üshongwantepu yha müktishiwapu teih tüonang. Aope wepalan yakme yha yei, yhate jamlak ja nehoi yenang; Yha laanmah pute yha chinghah palan-e nyiye tamnang;

⁸Jerusalem-e yoi nying nyingke fajümlihlakpa ünuwe püohpin. Yha yihnoonpu taiteki; yha-a pümkeng me hüyange yeitampu me yeiteki. Yha shaphuleih nang hüyange wüoteiye yha sheta lonang.

⁹Yha nuweshakpuwa shiengnye me ngenang, hüpoi yhawe yoijing ngoikülak yatuhshao jingne mongshangpu hango yehüo. Yha laanmahpuwa nyamlakpa ne ngoh; aowe-o yha toloimeiye tampu ye-ok. Yha jing wepalan-e nao, hüyange yhawe Youngwanpate shüpshelak jingne üngwün.

¹⁰Yhajing wepalan-e yha jing toinyunanha khongküm kuh yah küm. Yhawe khümjing nyoite iman ongpu nge, ümeken me yinhulan ye-onglak jingne Youngwanpawe khümpu ngoh.

¹¹Iman-e hahlak ütamja jingne leiwante yha jing kahtalan shaphuleih; iman nying nyingke üyin ne ngoh oklak jingne iman-e imanjing toinyu nanha-a hahying phei teileih. Chingnyuwe üngwün, “Üte leipha, O Youngwanpa; Ü-shanghah shaoshipute üte leipha.”

¹²“Üte leiyah!” she aoyin linne tai tüolan kahta lilite yhawe üngwün. “Ü-kih-e ao-o shaoshipu jeje manngoh, shaoshipu hüke Youngwanpawe I mongshih ngaipu hipak me üte yah pei.

¹³“Iye ütang yemepu vün shon, hangheye üwaan ümongpa me shuwetam, Iye ü-jingne tüntün hüyange kahtok ngoiye tao taitam. Tüophei me Iye winne tüoh hüyange yelakpe shaoshipu me tao tüoh.”

¹⁴“Ü-ünulan khongküm Iye shinge yah hüyange tüolan khongküm ja ne sha; Iye tüolan-a ü-üng me künne tam, hüyange yihpu jingne tao wong yenangpe jong. Youngwanpawe taowa ü-wepalante pha, hüyange iman phei ponglak jingne taowa wong yenangpe pong.”

¹⁵“Youngwanpawe üjing naomeilan wong shenangpalan khongkümpute nyiye tam; Iye üjing shelalan mahtamlak jingne nyahponglan shon: Iye Judah yhashaohalan-a wuwüngti ngütjing mepu wuwünglick kih shu-ngüm-e tam.”

¹⁶“Tüojingne ü-mük me mükphi maawe yünnang. Aowe-o üte toloimeiye yetam; aowe-o üte hengpu yepha. Wepalan-e tao naowe tamteki; Ü-kahtalan me hango towe yetüoh.”

¹⁷“Zion-e yak nowehong, hüpoi aowe-o yhate jampu yenang. Youngwanpawe Jacob phei tüi-e üshei yekao mepu wepalante nyik; iman-e Jerusalemte püohpinpu toilam ja leye jonnepai.”

¹⁸“Youngwanpa-a shunang, hangjingne taowe I ngao yejaipe ling. Üken phe me ngohpu kahtalan, üte jaipha, ü-shaoshipute üte leipha. Ü-shelalan hüyange yhalalan phowe yah teiteki.”

¹⁹“Taowe ü-phei teishinpulante nyik, hüpoi iman-e üte yejamlak jingne lan. Ngengpalan hüyange woipalan chingnyu püanglamlan me, iman üyin ngohlak jingne hahying yamme li.”

²⁰“O Youngwanpa, ü-yaha mongshang mongmeng üyong phei tao shangpute leipha! Ü-ünulan jingne ümongjanga mongshange paiteki. Püanglamlan me toilangpu ngohnang; nokmongme nehoi lipulan ngohnang.”

²¹“Tao hangshin shaphuleih iman-e jaiyangki; üte toloimeiye tamlak jingne ao-o yenang. Nange ü-tangme mahtampupa peiye tampu jingne ü-wepalan mongmei nang. Nange janyangpu nyih peitam pha; ü-kih-e ü-wepalan shaoshine tamtüoh.”

²²“Imanjing ümenglan khongkümpu jingne imante yaoleye tamtüoh; Nange ü-ünu jingne üte shangne tampu kih-e imante shangne tamtüoh. Shanghah shaoshitepuwe tao shaphuleih nang, hüyange ü-mongjang me taowa dak nang.”