Read Konyak Naga YOONGESHON 2 Bible Online

YOONGESHON 2 - Konyak Naga bible

YOONGESHON 2

¹Hangne Youngwanpawe I mongshih ngaipuwe Zion yhalalante wangnyakke büang? Israel tepu wangdang lepu müktishiwa Iye heamne tamteki. I mongshih ngaipu nyih me Ijing khümjing nehoi yeteihtüo.

²Jacob ngohjing nyoi khongküm Youngwanpawe shüpshe yenangpe mahtamteki; I mongshihpuwe Judah yhala yomteplan yeine tamteki; kahtok ngoi-e ahngching hüyange tüopa wanglamlampalan, wüokhüw tam-e Iye yeine tamteki.

³I mongshih ngaipu üyongpu phei Iye Israel wongnangpuwa paikhoih tamnang; Aope wepa peiyapeih Iye imante min jam she lan. vün kih-e khongkümpu mahtam-e Iye Jacobte shu-ngüm yangki.

⁴Wepa ja kih-e Iye yoijing lahhan-a tomante ting; aoyin toman mongmei hüyange mükke leihupu ngoh Iye khongkümpu toiyangki. Zion yhala nyenok me, I mongshih ngaiye loongpu tomante shahpei nang.

⁵Wepa kih-e, Youngwanpawe Israel mahne tamteki; Iye yha jing yomteplan hüyange ahngnoklan-a heamteiye tüoh. Iye Judah kahtalante üküm yenangpu mongmeng yahpei.

⁶Ümeken khümjing me toman-e Ite yoppe khüm Iye pü-lüp khoihtam. Youngwanpawe üjao nyih hüyange nyüonyihlan üküm ngoine tam. Ahngpa hüyange ngengpa moilanne I mongshih ngaiye kangpu shinge pei.

⁷Youngwanpawe yoi wümjong winteki hüyange yoi üjao khümjing wüngmakke linge tamteki; Iye wepate tüopa tepu jantpenyulan toitaine tamteki. Ümeken me toman-e hipak ja me mongmei puphei yoppe khüm tüoken me iman-e okpu ngepu üngwünnang.

⁸Zion jantpenyulan toi-min-ta shih she Youngwanpawe mongteki; lanshe minmeng shih she Iye tüolan-a itteshem-e shoteki. Daonok hüyange jantpenyulan sha-a jamshe heamteki.

⁹Petenlan-a longkhoih ne menge shünge tateki, tüolan wenaolan-a khoihnyaiye pai khoih teki. Ahng hüyange üyih üyonglan-a sha-a phowe teiye ngoh nang. Ngaokhüm nyüopuwa shaaji yenang, hüyange hipalan-e shaaji Youngwanpa mepu himang yetüo.

¹⁰Zion yhala lwngmeilan ngao yengaipe kahtok me shotnang. Iman shang me kahmak phei hüyange iman püm me monnye phei shot nang. Naoyha halan-e kahtokte iman shang khuh ta-nang.

¹¹Ü-müka shapyoongpuwe peakteki; ü-yaha-a towe nyai nang. Taowe ü-kahtalan mahpute mongshang mongmeng puwe eangteki. Nahalan hüyange naotak-halan chingnyu püanglamlan me nyaiye ta-ngoh nang.

¹²Iman-e yoinyulante inang, “Wuwüngti hei an ümme ngohnangki?” Iman mayah yangpu kih-e iman püanglamlan me toitawe ngoh nang Hüyange yoinyulan yak me paiyange iman nyüo nyüoshe li nang.

¹³O Jerusalem yhalalan, Taowe hanghe ilak shi? Taowe hangke nang toloimeiye tamlak? Aowe-o hükih-e shangpu jeje mannge. Nang limahpuwa yengching shinne jamloi she ngohnang; monghümme oklak hango yenang.

¹⁴Nangjing hipalan-e nangte iye tamlak hango yenang, hüpoi tahleih ilak hei ngohnang. Nang ünu aope-o ngaiye yetampe iman-e konnyüopuwe nanga lowelamme tamnang. Nang monglüplak wongpong ne üjeja she iman-e nangte teihne tamnang.

¹⁵Chingnyu linne taipu kahtalan-e nangte yaoweleye leinang. Iman-e imanjing ngüm sheangnang hüyange Jerusalem heampute nyiye tamnang. “Leihukeipu chingnyuwa hatüo a?” “Kahtoknyuwe yihnoonpuwa hatüo a?”

¹⁶Nangjing wepalan üsheiye nangte phoinang hüyange nangte nupu phei fa ngao nang. Iman-e imanjing jupen ho-yange hüyange fa ngaowe i, “Tüopa-a toman-e mahtam yangki! Tüopa nyih jingne toman-e tanne ngoh yangki!”

¹⁷Üküm ne Youngwanpawe Iye hanghe linglak jingne nyamshao, lingyangki. Üshongwante Iye numante deingao phapu kih-e shüpshe yenangpe Iye mahtam. Iye numan wepalante okpupa pha, numan yeitapu me imante mongmei pha.

¹⁸O Zion yhala, nangjing jantpenyulan-e Youngwanpate üngwünne tamtüoh! Nangjing mükphi-a yengyin kih-e wangnyak wangngai yünne tamtüoh; Nangnying nyingke shapyoongpu hei mongmenge o ne tamtüoh!

¹⁹Wangnyak phapan Youngwanpate üngwünlak jingne sha-a sha-a lüotüoh; Youngwanpa sheshao me yeng kih-e nang mongjang okke phatüoh hüyange nangjing nahalante shüpshelak jingne Ite yak hongyange yoppe tongtüoh; Püanglam ünuk phe me lilak ne nahalan seanyaonang!

²⁰Leihuyah, O Youngwanpa! Aoyinte nange toiteinang leihuyah! Shekolan-e iman-e kenpu nahalan mei hahnang! Ngengpalan hüyange hipalan khümjing memuh toi nang!

²¹Lwngmei hüyange naha moilan püanglamlan me ümang me lamyange; Ü-naoshelan hüyange ü-naoyhalan wepalan yanglow me toita. Nang mongshih ngaipu nyih shüpshe yenangpe nange iman lange tam.

²²Nange ü-wepalante ü-neikon-e yawinmongpaipu motappu ngohlak jingne nyik, Hüyange nang mongshih ngaipu tüopa nyih me aowe-o yinne ye-ok. Iman-e ü-hayim, aoyin taowe tamme ang hüyange ken toiyangki.