Read Konyak Naga YOONGESHON 3 Bible Online

YOONGESHON 3 - Konyak Naga bible

YOONGESHON 3

¹Kahwang mongshih ngaipu shengshaoh phang me shaoshi tüopu kahta-a tao ngohnang.

²Iye taowa wangnyakte shelu shelu she jange tei;

³Hüyange shüpshe yenangpu yakke üte leih leihye-e shetnang.

⁴Iye ü-püm-mei ühüngme lüohngai, hüyange ü-waan paitam.

⁵Iye tao mongmeng üyong hüyange mongshangpu üyong phei küpnok me küo.

⁶Lipulan shünge angpu wangnyak me tao nyoilak jingne Iye kang.

⁷Iye üte yankeileiye phünne tam; taowa yinlak jingne monghümpu yenangpu phowe angpa ja ngohnang.

⁸Jamlak yamme taowe üngwünne wao, hüpoi Iye minjai she lannang.

⁹Tao kemshihpute tao paala; ümpeyekaote tao lüplakei long jantpenyuwe üte tien nang.

¹⁰Shapnyu ja leye Iye üte tan-nang; yengkong mailang ja leye Iye ü-tangme phaonang.

¹¹Iye üte lamnyu mepu jange tei, khoih nyaiye tao hitte tam, hüyange taowa tüoh.

¹²Iye yoijing wenglah noweyah hüyange I jing lahhan tiengjing ne tao linge tam.

¹³Iye yoijing lahhan ü-pümte luwe honge tamnang.

¹⁴Kahtalan-e nyihlao hipak üte nyiye tamnang; taowa iman khongkümpu jingne wonnewangpu ja ne meng.

¹⁵Ü-üngsate ükhah yeng Iye kange taitam nang, hüyange ükhah hahyingne üte maawe tamnang.

¹⁶Iye longkhoih tangme ü-fa khaitam nang; Iye üte kahmak tangme shitte tamnang.

¹⁷Ü-kenmonge chingmei hüyange mongmei-a hanghe taowe pemahteki.

¹⁸Tüokhei taowe inang, “Ü-okkeshangpuwa yanteki,” hüyange Youngwanpate ü-monghümpuwa mahteki.

¹⁹Tao shaoshipu, tao wayounpu juteih-a soihüng ükhahne mengteki.

²⁰Taowe tüopa jeng yelakpe teih hüyange ü-yaha-a shünge taiteki.

²¹Tüoyangpoi aope taowe tüopa ja teihtüo monghümpu leih yenang.

²²Youngwanpawe yeshaipe kenpu hüyange shüpshe yelakpe woinang,

²³Wanghe ongpu yeshaipu kih-e, napning üla ngaipu kih-e,

²⁴Üme ngohpu khongkümpu ne-a “Youngwanpa ja shing,” “tüokhei taowe ümong hümpu I me angnang.”

²⁵Aoyinne Ite monghüm, aowe I yam, tüolante Youngwanpa-a meinang;

²⁶Tüokhei teman jingne-a nünne okke tanpu shemeipupa, yinne tamlak jingne Ite tanlak.

²⁷I shelawante muh tüopa nünne okpu shinge yahlak-a kahta ja jingne shemeipupa!

²⁸Aope Youngwanpawe tüopa phalakeih, yoi shaha jünge nünne shotlak yang;

²⁹I innenyaiye khuhtalak yang, hangjingne üne-o monghümlakpa ngohne ok.

³⁰Aoheye Ite leei, Ite omtüo shantamtüoh; hüyange Ite teetampuwe maa ne tamtüoh.

³¹Hangjingne Youngwanpawe jinjintepu jingne teman yewinlak.

³²Iye temante mongmeng peitam ne ok, hüpoi Iye teman jingne kenpuwa ütingpa hüyange wongnang ngoh nang.

³³Hangjingne temante mongshang mongmengpu yejema-a shangpu ngaitampute Iye lahnyikke yeteih ja.

³⁴Aope kahmük me phowe angpalan khongküm yaphang me shu-ngüm,

³⁵Aope Ütahpa sheshao me kahta te shupu toishao-a yeyahlakeih,

³⁶Aope kahta ja shuwe ngohpu yeitamlakeih, Youngwanpawe hükihpu ye-ngelak a?

³⁷Youngwanpawe yenying tamshih ma-a aowe ngaowe hüyange tüopa ngai-e peilak?

³⁸Ümengo ümei-o peipuwa, Ütahpa mepu yeje a?

³⁹Aope teman ünu jingne temante shaoshiyateng pha yapeih hangjingne teman-e ngao ngaiye ngohlak shi?

⁴⁰Teman taihümpu lamte tokke leihu hah hüyange Youngwanpa tangte leih yehah.

⁴¹Wangdang me ngohpu Kahwangte teman mongjang eptamhah hüyange yak nohah.

⁴²“Toman-e ünu om hüyange hokkewe, hüyange O Youngwanpa, nange tomante ümeng yewintam.”

⁴³“Nange tomante jang hüyange toman toitam; nang shüpshe-a nang mongshih ngaiye büang ang;

⁴⁴Yoppu tüopa kaiye yetai oklakne nange nang nying nyingke jamloi jeiye nyeihpu wangphom-e büang.

⁴⁵Nange toman-a kahtoknyu makshokke phonge winpu ne linge tam.”

⁴⁶“Tomante tomanjing wepalan khongkümpuwe teetam, hüyange phoiwüm tam.

⁴⁷Toman-a yatuhshao mengpu hüyange heampu me linnang; weangtuh hüyange nyampu me nyoinang.

⁴⁸Ü-kahtalan mahpute ü-mükphi yengyin ne menge yünnang.”

⁴⁹“Ü-mükphi-a toloi yemeipe yelakpe yünlak,

⁵⁰Youngwanpawe wangdang mepu leiye taiyange toman mannge mannge she!

⁵¹Aope taowe chingnyu mepu shekolante hanghe ngaiyapeih ngewante ümongjanga mongmeng nang.”

⁵²“Üte nulakne hango yenangpute wepalan-e taowa awhate tünpu kih-e tüntün.

⁵³Iman-e taowa üyin me kahsa te hinne tam hüyange long phei küppe tam.

⁵⁴Ü-shang tang me yenge küp, hüyange taowe teih, taowa mah nang.”

⁵⁵“Kahsa ükongpa mepu, O Youngwanpa, taowe nangte üngwün nang,

⁵⁶Nange ü-ngaowüng jainang, jamlak jingne taowe üngwünpute, nange nang na tah büang.

⁵⁷Aope taowe nangte nyik nang owe pei, hüyange nange i, ‘Nyam tahteih.’

⁵⁸“Tao yinne tamlak jingne nangpei, O Youngwanpa, hüyange ü-üyin yintam.

⁵⁹Ü-yekaote jüngshe ngaophün tampha, Youngwanpa, Üte yeshupe linge tampu nange shingnang.

⁶⁰Hangke ü-wepalan-e üte nu hüyange hangke iman-e üte konkon nange shingnang.”

⁶¹“Iman-e üte yaowelepu nange jaiyangki, O Youngwanpa; iman-e konkonpu khongküm nange shing.

⁶²Nyihlao hipak iman-e ü-jeng ngaonang hüyange ü-phei tüi-e tai tümnang.

⁶³Leihuyah, iman shohpu, hüyange iman yongpu; taowa iman hem ne meng.

⁶⁴“Iman-e hanghe lingyangki tüopa jingne imante shaoshiyateng phatüoh, O Youngwanpa;

⁶⁵Imante phoitamtüoh hüyange monghümlak yenangpuwe iman maatam tüoh!

⁶⁶Imante jangne tamtüoh hüyange Youngwanpa wangphang mepu iman mah ne tamtüoh!”