Read Konyak Naga YOONGESHON 4 Bible Online

YOONGESHON 4 - Konyak Naga bible

YOONGESHON 4

¹Hangke hon-a hase mahpu! Hangke jaoshepu hon jeileipu! Khümjing tepu üjao longyin-a püanglamlan me tee-shaiteki.

²Zion naoshelan-a teman jingne hon shinne toinyu ne ngohyangki; hüpoi shaapa-a iman-a kümptükte jonne paipu kih-e jonnang.

³Sholan-e (hiyan) nehoi yoi ühalante uhying nang, hüpoi ü-kahtalan-a iman jing ühalante mengshipu yengwüm awnyu kih-e ngohnang.

⁴Yenglepu jingne naotak-halan yi-a tapdao me neakteki; nahalan-e hahying yuyainang, hüpoi aohe-o imante yephatam.

⁵Aoyin kahtalan hipak ja me shemeipupa hahying hah-e ngoh, püanglamtok me nyaoweleye linang; aoyin ütahpa me jongyangki hahying yamme makshok jingme loinang.

⁶Ü-kahtalante Sodom me nyoipalan phei shenyei she shaoshiyateng ne tam, hangheye Kahwang yak me mokh she yeitapu hüo.

⁷Yhajing ahnghalan-a yenuyeshakpe hüyange yi shinne jaowe, düamyeng phei she heng she üyinpüm me okkeshange hüyange wongnange, minyong phapuwe maawe ngohnang.

⁸Sha-a iman püanglampongme yeshingpe lamyange, imanjing sheta-a nyaakke liteiye; imanjing üshowa, hansho kih-e wanteiye imanjing waan me neakteki.

⁹Seanyaoyengle-e lipu phei-a, yanglow-e aoyin toi shemeipupa, seanyaowe kuimah-e, kah mepu pelick weanglick yengepe, iman phoonge teinang.

¹⁰Ü-kahtalante mokh she mahtampupa peipuwe fajümlihpu yahpei; yayeng shüpshe pheipu nyuyonglan-e hahyingne yoi hayimlan yangkang nang.

¹¹Youngwanpawe I mongshih ngaipu khongkümpu shokke tamteki; Iye Zion me vün pahtamteki tüowe kahtok ngoiye hahtam teki.

¹²Ümeken me-o aowe-o kahtoknyute wanglam lampu ahngpalan-e nehoi, Jerusalem petenlan kaiye chinghahpalan ongpu oklak she ütinglakpu yengoh;

¹³Hüpoi tüopakih ngai hangjingne ima-a yha hipalan-e ünu om hüyange yha jing ngengpalan-e ümeng yenangpu kahtalan li ne tam-e püohpu ngohyangki.

¹⁴Yha jing woipalan mükmüopalan kih-e püanglamtok me linne kaiye, aowe-o imante letpu ye-oklak ne iy lüp phoyange lünglei nang.

¹⁵Kahtalan-e üngwün, “Yanne taitüoh!” “Numan nuweshakteki! Üte tahlet pha!” Tüokhei aowe-o iman yeyahpe jat ja mepu jat jate iman waakem. Kahtalan-e jatlan yo me ngao, “Shaaji iman teman phei ngohne yetamlak.”

¹⁶Youngwanpawe, shaaji iman jingne teihpu hango yenang; Iye teman jing ngengpalan hei woipalan jingne wangshüm hüopu hango yenang.

¹⁷Toman-e jajang japu me jamphalak she tanwante, toman mükke yeshang ok; Yintam ne ye-okpu jat ja jingnepahi toman-e monghümme tanyangki.

¹⁸Wepawe toman jingne yomme ngohyangki; toman püanglam tok me nehoi kempu ye-ok. Toman jing nyih-a linteki, üküm peingoi teki.

¹⁹Wangmepu awlan shokketapu phei shephet she, iman-e tomante jange tai. Iman-e tomante kahtang ngoiye jange tei; iman-e phaonyu jongme mokh she toman yahnang.

²⁰Iman-e tomanjing üyin wujüng photeki, Youngwanpawe leyangpu ahngpa, Chinghah-e peipulan lili mepu toman yintamkülak she toman-e ütinglakke teih.

²¹Mongmei shei-e ngohtüoh, Edom hüyange Uz kahtalan; nange ok wante mongmeiye ngohtüoh. Nangjingne-o mokhshe mahtamlakpa peiküpu; nango pümkeng me wüotüone shuiteilak.

²²Zion yhalate yoi ünu jingne ümee leih phateki; Youngwanpawe shaaji numan-a phowe teiye ye-anglak. Hüpoi Edom, Youngwanpawe nangte shaoshi yateng phalak; Iye nang ünuwa ngaiye tamlak.