Read Konyak Naga YOONGESHON 5 Bible Online

YOONGESHON 5 - Konyak Naga bible

YOONGESHON 5

¹O Youngwanpa, tomante hanghe ngaiya peih teihtüopha. Tomante leitüoh, hüyange toman wüotüopute leipha.

²Tomanjing moth-a yinpalan yak me; tomanjing nok me ülao jatlan nyoinang.

³Toman-a khah-ha, hüyange üpa yenangpalan toman ünyulan-a wümnyu.

⁴Toman-e yingpu yeng jingne toman-e ümee phane ngainang, toman-e jaklak han wongpongne ngaipu han toman-e shaknang.

⁵Toman üng me wongnangpu sheam phei ki tamnang, toman towe nyainang, hüpoi toloimeine yetam.

⁶Üyin ngohne wangmanne hahying tüolak jingne, Egypt hüyange Assyriate toman hahyune tai.

⁷Tomanjing pajeiyonglan-e ünu om, hüpoi sha-a iman yenang; hüyange iman ünu jingne toman shaoshiyateng nang.

⁸Rhapalan-e toman tangme wanglam lamnang; hüyange iman wong mepu aowe-o toman yintam ne ye-ok.

⁹Phaoheikah lili me kahta toipalan wa-e kemnang; Toman-e hahying yamwante toman üyin mahnang.

¹⁰Seanyao loipuwe toman jing üsho vünjüo shinne dakne ngaiye shemme tamnang.

¹¹Toman jing shekolan-a Zion kahtang memuh kange jonne tam; Judah chingshao phe me toman jing yhashaohalante ümeng me kang.

¹²Woipalan-a yahtei hüyange jhotne tam; toman jing wupalante wangshüm hüopu yenang.

¹³Naoshelante rhapalan kih-e tah ngütte noine kangetam; nahalan-a hangki üyih phangme paala nang.

¹⁴Puyonglan shaaji chingnyu peten me yeshot, hüyange naoyha naoshelan-e shaaji hem lokpu yenang.

¹⁵Toman üyin mepu mongmei shaaji taiteki; toman mongmeiye polokpu nyoi me mongmenge omteki.

¹⁶Toman shang mepu Ahngpa shaoshaoh tüohteki; toman jingne onyukei; hangjingne toman-e ünu omyangki.

¹⁷Tüojingne, tomanjing mongjang shelupupa me daknang, hüyange toman jing mükphi kaiye hango yengetam;

¹⁸hangjingne Zion kahtanga wüngmakke hüyange I shaha shüpyange, hüyange tüopa heamtepu nyoime phao hiyanlan lünglei nang.

¹⁹Hüpoi, O Youngwanpa, nanga jinjintepu ahngpa, hüyange üküm hipak ngoiye wanglam lamlak.

²⁰Hangne nange toman-a teshinne hipak laowe winpu? Nange üne-o toman yeteih tüolak a?

²¹Nang tangte toman leih ye ne tampha, Youngwanpa! Toman leih yene tampha! Üshongwantepu tomanjing müktishiwa peitam pha.

²²Yejema-a nange toman-a jinjintepu jingne wintam. Nang mongshih ngaipu yelak ok.