Read Konyak Naga EZEKIEL 1 Bible Online

EZEKIEL 1 - Konyak Naga bible

EZEKIEL 1

¹Wangpeng delüm shepupa leat peli, nyih nga shepu nyih me tao, phowe teipu Jehudilan phei Babilon mepu Chebar yengyin nah me nyoi ngoh yangki. Wangdang ep, hüyange taowe Kahwang himang nge.

²Hatüowa Ahngpa Jehoiachin phowe teiyang phei me wangpeng nga shepupa ne ngohyangki.

³Babilon me Chebar yengyin nah me, Youngwanpawe Buzi üha Ezekiel ngengpa, ü-phei ngaopu taowe jai, hüyange I üngan üte peipu taowe shinge pei.

⁴Taowe nganne lei hüyange apyekao mepu waishihwangkhah peipu nge. Jeilehpu wangphom mepu wangphih langpu ngai hüyange tüopa neikonpu wangdanga minyong phapu üyong phei ngohyangki. Ümeken mepu wangphih langpu lüppe ngai, shakphan yan kihpu ülam ja hüo.

⁵Waishihwangkhah yo me kahta lepu me üyin yinmok peli kih-e ngepu taowe nge,

⁶hüpoi moilan me sheta pelili hüyange yangteng pelili nangyange ngoh.

⁷Iman jing ya-a tingkhakke, hüyange iman me mahu üponghalan me ngohpu kih-e yashok ngoh. Iman-e shitte phoyang phei shakphan yan kih-e hüo.

⁸Iman jing sheta pelili hüyange yangteng pelili tokte paowe, iman moilan me yangteng japong phang me japong pityange kahta yak peli ngohyangki.

⁹Imanjing yangteng teilette, tüo kaiye yinmoklan-a jakih-e menge tamlak jingne yinmok moilanne yangteng nipong saa. Aope iman poyapeih, iman püm lüppe üyepe moilan jamme po.

¹⁰Üyin yinmok moilan me sheta yoi yoi peli nyimyange: sheshao yekao me kahta sheta, yakjah yekao me yengkong mailang sheta, yaknya yekao me mahu üpong sheta, hüyange tokphei yekao me awlan sheta nyimyange.

¹¹Üyin yinmok moilanne yangteng nipong saayange tüokaiye japa üyin yinmok yangteng üjengte teilet, hüyange imanjing ülaopa yangteng nipongpa-a iman pümte büange in.

¹²Üyin yinmok moilan ükao peli moilan yekao me sheta meyange ngoh, tüojingne iman-a üpeken yekaote iman taihuyapeih, lüppe shüppe yengohpe iman taipu ok.

¹³Üyin yinmoklan yo me phihlangpu ayeng kih-e ngeye, yelakpe popu ülam ja ngoh. Vün-a phihlange ngoh hüyange wang phihlange wangyu ne tam.

¹⁴Üyin yinmoklan iman nying nyingke wangyupu shinne mamme taitai yeye she lünglei.

¹⁵Üyin yinmok pelite taowe leiye ngohwante, tüknei peli ja phei me ja, she kahtokte letyange taowe nge.

¹⁶Tüknei peli khongkümpu teilepu phei; moilan müklei me toinyu long kih-e, hüyange moilan me yakjah yeme lüngleiye tüknei japong hüoyange;

¹⁷tüokaiye tükneilan-a hangke taihuyapeih tüokih-e ünuk peli yekaote taipu ok.

¹⁸Tükneilan üyaju me mük shaha nangyange ngoh.

¹⁹Hangkih tingme üyin yinmoklan poyapeih, tükneilan-o iman phei po, hüyange üyin yinmok kahtok mepu yongma-a, tükneilan-o hüke muh yong.

²⁰Üpüken yekaote iman-e mongyapeih tüokente üyin yinmoklan tai, hüyange üyin yinmokke hanghe ling tüo meimei kih-e tükneilane ling, hangjingne ima-a üyin yinmok-e iman woi.

²¹Tüokhei üyin yinmok popu hipak phe me yejema-a lakwante, yejema-a wangte lüowe yongwante, tükneilane-o tüo kih-e muh ling.

²²Üyin yinmoklan shangtang me phihlangpu crystal phei lingyangpu müklei me khwngmong lepu ülam ja ngohyangki.

²³Tüoken khwngmong phang me üyin yinmoklan yong, moilanne yangteng nipong Iphin mepu yüowe saayange hüyange ülao yangteng niponge pümte büangyange ngoh.

²⁴Puwe tamwante iman yangtenge ngaiye tampu wüng taowe jai; hatüowe yengching yengmokh wüng kih-e, nyahponglan üngang wüng kih-e, Ütahpa Kahwang ngaowüng kih-e ngaiye tam. Aope iman pupu lakyapeih, iman-e iman jing yangteng khuppe tam;

²⁵hüyange iman shangtang me khwngmong ütang mepu wüng yelakpe peipu ngoh hüyange aope iman lakyapeih iman-e iman jing yakteng khuppe tam.

²⁶Khwngmong tangme leilak me sapphire lingpu ahngpa shotjing kihpu ülam ja ngoh, hüyange ahngpa shotjing me shotpupa-a leilak müklei me kahta lepu ja shotyange ngoh.

²⁷I leilak müklei me shiengshüm mepu ütokye taowe phihlangpu yan kihpu ülam ja phihlange ngohpu nge; I leilak müklei shiengshüm ümaiye taowe vün lepu me;

²⁸waikeipu nyih me wangphom me nyamlong yupu kih-e tüopa neikon-e phihlangpu nge. Hatüowa Youngwanpa omme ngohpu hüopu phihlangpu wangngai ne ngoh yangki. Aope taowe tüopa nge, taowe kahtokte ü-sheta khuhtayange lam. Hüwante taowe ngaowüng jawe ngaopu jai.