Read Konyak Naga EZEKIEL 10 Bible Online

EZEKIEL 10 - Konyak Naga bible

EZEKIEL 10

¹Cherubim shangtang me ngohpu khwngmongte taowe lei hüyange tüolan tangme sapphire phei lingpu ahngpa shotjing kihpu ülam ja ngoh.

²Kahwange nye-ükhai inpu kahtate i, “Nang yak me vünoun ne maatamtüoh hüyange tüknei nipa me cherubim phangte ongtüoh. Tüophei me vünoun-a chingnyu tangme shaitam tüoh.” I taipute taowe leiye ngoh.

³Aope I ümongte ongyapeih, Cherubimlan-a khümjing heyekao me yong, hüyange longkonmong ümong yekao wangphom-e maa.

⁴Youngwanpa ompu phihphihlangpu wangngai cherubim mepu lüowe yong hüyange khümjing taten yekaote wen. Hüwante khümjinga wangphom-e maa, hüyange longkon mong-a wangngai phei phihlang.

⁵Cherubim yangteng popuwe ngaitampu wünga longkonmong ü-at yekao me nehoi jai. Tüopa-a Ütahpa Kahwang ngaowüng kih-e ngaiye tam.

⁶Aope Youngwanpawe nye-ükhai inpu kahtate cherubim phangme ngohpu tüknei nipa mepu vün ütam yahlak jingne ngaopha, kahta ümongte ong hüyange tüknei yo mepu ja shongme yong.

⁷Cherubim yo mepu cherub jawe iman yo me ngohpu vünte I yakke jon, vünoun ütam nowe yah, hüyange nye-ükhai inyange ngohpu kahtapa yak me angtam. Kahtawe vünoun yah hüyange yayonge tai.

⁸Cherubim lili yangteng phang me kahta yak lepu nyimyange taowe nge.

⁹Hüyange taowe lei, hüyange leihuyah, cherub phinme tüknei peli, japhei me ja phin me; hüyange leilak müklei me tükneilan-a phihphih lange ngohyangki.

¹⁰Hüyange leilak jingne iman-a, moilan peli-a jakih-e tüknei mongme muh tüknei ngohpu kih-e neipu nge.

¹¹Aope cherubim poyapeih, ünuk peliye ümpeyekaote iman taihuyapeih yelüp yeshüppute taipu ok. Iman khongküm jam jamshe ümpeyekaote iman taihuyapeih yelüp yeshüppute iman taipu ok.

¹²Imanjing pümme, tokpheite, yak me, yangteng me, hüyange tükneilan me ümük maayange ngoh.

¹³Tüopa tükneilan-a ü-üwangpa himang me taowe ngeyangpulan phei ja kih-e ngohyangki.

¹⁴Cherub lili me sheta pelipong nyimyange ngoh. Üwangpa-a mahu üpong sheta, nishepupa-a kahta sheta, lümshepupa-a yengkong mailang sheta, hüyange peli shepupa-a awlan sheta ngohyangki.

¹⁵Iman-a Chebar Yengyin me taowe ngeyangpu cherubim ja ne muh ngohyangki. Aope cherubim wangyete lüo,

¹⁶hüyange poyapeih, tükneilan iman phei jamme tai. Hangkihting me pulak jingne iman-e imanjing yangteng saayapeih, tükneilan yelakpe iman phei tai.

¹⁷Aope iman laklakei, tükneilan-o lak; hüyange aope iman pulakei, tükneilan-o iman phei jamme tai, hangjingne cherubim-e imante wanglamlam.

¹⁸Tüophei me Youngwanpa ompu phihphihlangpu wangngaiye khümjing taten tüoh hüyange cherubim tangmepu nyoija te ong.

¹⁹Iman-e imanjing yangteng saa hüyange aope taowe leiye ngoh kahtok mepu puwe tai, hüyange tükneilan iman phei jamme tai; Iman khümjing heongye peten me ütenja lak, hüyange Israel Kahwang phihphihlangpu wangngai-a iman tangme ngoh.

²⁰Taowe iman-a Chebar Yengyin me Israel Kahwang phangme taowe ngeyangpu cherubim tüoja muh yang she shinge ok.

²¹Iman moilan me sheta pelili, yangteng peli, hüyange moilan yangteng phangme hanghe müklei me kahta yak kih-e ngohyangki.

²²Imanjing shetalan-a müklei me Chebar Yengyin me taowe ngeyangpu shetalan meimei kih-e iman moilan yoi yoi phei khaktinge kem.