Read Konyak Naga EZEKIEL 11 Bible Online

EZEKIEL 11 - Konyak Naga bible

EZEKIEL 11

¹Hüwante Yahawe tao nowe in, hüyange heong yeme meye ngohpu Youngwanpa nok heongye petente tao yahpei. Tüoken peten shongme kahta da me nga taowe nge: iman yome Azzur üha Jaazaniah, hüyange Benaiah üha Pelatiah, kahtalantepu üjupalan taowe nge.

²Hüwante üte i, “Hangko kahta, tüolan kahtawe ümengpa taitüm nang hüyange tüopa chingnyute hengpu ümeng phanang.

³Iman-e inang, ‘noklan welak jingne hatüo hipak-a mampu ne yeje a? Hatüo chingnyuwa hoi tük, hüyange teman-a mei.’

⁴Tüokhei, hangko kahta, iman jingne itpu ngao phatüoh.”

⁵Youngwanpa yahawe taowa lanshe woi, hüyange kahtalante tüopa ngaolan phalak jingne Youngwanpawe üte i: “Israel kahtalan, numan-e hanghe i hüyange numan-e hanghe tümnang Taowe shingnang.

⁶Numan-e chingnyu hatüome kahtalan teshinne toitam, tüokaiye püanglamyin me kahta mange maateki.”

⁷“Tüokhei hatüowa Tao, Okkeshangpu Youngwanpawe numante inang. Numan-e Tüoken me wintampu manglan-a mei hüyange tüopa chingnyu-a tüknyu, hüpoi Taowe numan-a tüopa mepu jang teilak.

⁸Numan yanglowte nyamnangkü a? Numante shümlak jingne kahtalan yanglow phei Taowe peine tamlak.

⁹Taowe numan-a chingnyu mepu yah ngailak hüyange numan-a kahhenglan yakte phalak. Taowe numan litamlak jingne phateki;

¹⁰hüyange numan-a numanjing kahmük memuh shapju me toilak. Hüwante moilanne Taowa Youngwanpa she shinglak.

¹¹Tüopa chingnyu-a numan jingne hoitük ne yemenglak, hüyange tüopa mongme numan-a meine yemenglak. Taowe numante Israel yikengpong me ngaophünlak.

¹²Hüwante numan-e Taowa Youngwanpa she shinglak. Hangjingne numan-e ü-ngaokenglan me yekem, yejema-a ü-linglak ngaokhüm yejon; hüpoi numan-e neikon-e ngohpu jatlan linglak ngaokhüm kih-e jon.”

¹³Aope taowe itpu ngao iye ngohyapeih, Benaiah üha, Pelatiah toita li. Taowe ü-nying nyingke kahtok te sheta khuhta hüyange üngwün, “Yeje, Okkeshangpupa Youngwanpa! Israel me towe tüohpu moilan nange toiye kümlak a?”

¹⁴Tüophei me Youngwanpa ngao üte pei.

¹⁵“Hangko kahta,” “Kahtalan aoyin Jerusalem me nyoiyapeih iman-e inang hüyange nang pheipu Israellan aoyin phowe teiye ngohyapeih numan jeng ngaonang. Iman-e inang, ‘Phowe teipalan-a Youngwanpate yoppekhümlak jingne jamloi jaiye ngohnang. Kahmüktepu moth Iye temante phateki.’

¹⁶“Sha-a nang pheipu phowe teiye ngohpalante Taowe hanghe i itüoh. Kahmük üjai mepu jatlan phei iman nyoilak jingne iman shonne teipupa-a Tao ngohnang hüyange ülao kahmüklan me iman yanne tam.Tüoyangpoi, hipak ütenjapu jingne ümeken kahmük me iman taiye ngoh tüolan nyoi me Tao iman phei omme ngohlak.”

¹⁷“Tüokhei Tao, Okkeshangpupa Youngwanpawe hanghe inang imante itamtüoh. Ümeken me Taowe iman yanne tam, tüolan kahmüklan mepu Taowe iman shaijemlak, hüyange Israel kahmük imante leih phalak.

¹⁸Aope iman leihyelakei, iman-e püohpinpu, nunushepu peshao iman-e tüopu shaaji tüohlak.

¹⁹Taowe imante mongjang üla hüyange kenmong üla phalak. Taowe imanjing ngayounpu long mongjang yahteilak hüyange imante innyaipu mongjang phalak.

²⁰Hüwante iman-e ü-ngaokhümlan jonlak, hüyange ü-ngaokenglan khongkümpu mong phawe jaijonlak. Iman-a ü-kahtalan ne menglak, hüyange Taowa iman Kahwangne menglak.

²¹Hüpoi kahtalan aoyinne püohpinpu, nunushepu peshaolante yoppekhümlak te kenlakei, Taowe shaoshi yateng phalak. Iman-e hanghe lingyangki tüopa jingne Taowe imante shaoshiyateng phalak.” Okkeshangpu Youngwanpawe ngaoyangki.

²²Cherubim pune ükong wang, hüyange tükneilan iman phei tai. Israel Kahwang ompu phihphihlangpu wangngai-a iman tangme ngoh.

²³Hüwante phihphihlangpu wangngaiye chingnyu tüoh hüyange tüopa tepu heongye Kahtangte tai.

²⁴Himang me Kahwang yahawe tao nowe in hüyange tao Babilonte phowe leihyetam. Hüwante himanga yepeipe lakke mah,

²⁵hüyange Youngwanpawe üte hüoyangpu sheminlamphe taowe (ü-phei) phowe teiye ngohpalante iye tam.