Read Konyak Naga EZEKIEL 12 Bible Online

EZEKIEL 12 - Konyak Naga bible

EZEKIEL 12

¹Youngwanpa ngao üte pei.

²“Hangko kahta,” “Nanga hokkewepu kahtalan yo me ngohnang. Iman me mük ngohnang, hüpoi iman-e hango ye-nge; iman me na ngohnang, hüpoi iman-e hango yejai ok, hangjingne ima-a iman-a hokkewepuwe.

³“Sha-a hangko kahta, chingtaipa jawe tümpu meimei kih-e nange hangki ja sha-a tümtüoh, hüyange wangnyak shaome yayong ngai tüoh, kahtalan liliye nang taipu hüyange ülao nyoija te taipu ngene tamtüoh. Hokke wepalan-e nang taipu ngene ok.

⁴Wang mannyakpe ngohwante muh phowe teipu te tailak ne nange hangki sha-e tümtüoh, hüwante iman-e nang ngelak, hüyange ünpong me nanga phowe teipute taipu ja leye taipute iman-e nangte leine tamtüoh.

⁵Aope iman-e leiye ngohlakei, nenok jant üwo ngaiye lüotüoh, hüyange nangjing hangki-a tüopa üwo kaiye yahtüoh.

⁶Nange nangjing hangki phaktang me paipute iman-e leine hüyange nang mük büangyange wangnyakte taipute leine tamtüoh, tüokaiye nang ümekente taiyapeih nange ye-ngelak; nange hanghe ling tüopa-a Israellante deingao phapu ne menglak.”

⁷Youngwanpawe üte hanghe lingne tamyapeih taowe ling. Tüonyih chingtaipawe lingpu kih-e taowe hangki tüm, hüyange tüopa ünpong me wangnyak pu phei jam jamshe taowe, ü-yak phei jant lüowe wo hüyange yayonge tai. Aope kahta liliye leiye ngohyapeih, taowe ü-üngtok me hangki angyange yayong.

⁸Ünenap Youngwanpawe ü-phei ngao.

⁹“Hangko kahta,” Iye i, “Sha-a tüolan hokkewepu Israellan-e nange hanghe lingnangki she yetong a?

¹⁰Tao, Okkeshangpu Youngwanpawe imante hanghe inang, imante itamtüoh. Tüopa ngaolan-a Jerusalem me wanglam lampu ahngpa hüyange tüopa me aoyin nyoi khongkümpu jingne ngohnang.

¹¹Imante itamtüoh hüke nange hanghe ngailakei tüopa yepinlakpa hüopu, iman-a phowe teilak hüyange chingtaipalan ne menglak.

¹²Ahngpa aowe imante wanglam lamnang Iye wangnyak me yoi hangki phaktang me pailak hüyange iman-e Ijing ne lüopu jant üwo me phette tailak. Iye yoi mükte büanglak hüyange I ümekente tai ye-ngelak.

¹³Hüpoi taowe ü-shaan shailak hüyange I tüo me pholak. Tüophei me Taowe I-a Babilon chingnyute yahteilak; ümeken me tüopa man-ngepe I lilak.

¹⁴Taowe I ghonyoi mepu kahtalan, I yakjongpalan, hüyange I yompu kahtalan üken phe te yanne tamlak, hüyange iman toilak jingne kahtalan-e iman yamlak.

¹⁵“Aope Taowe iman jatlan yo me hüyange kahheng nyoijinglan me yanne tamlakei, hüwante iman-e Taowa Youngwanpa she shinglak.

¹⁶Taowe iman ütamja-a wehok, seanyao yengle, hüyange daktin mepu yinne tamlak, tüome nakshih jatlan yo me iman ngohwante iman-e lingyangpu toishaowa hangshin nulakpa ne ngohshihpu she teihtüolak hüyange Taowa Youngwanpa she shinge peilak.”

¹⁷Youngwanpa ngao üte pei.

¹⁸“Hangko kahta, aope nange hahlakei nintüoh, hüyange aope nange yinglakei nyampuwe potüoh.

¹⁹Jatlan nopute tüopa itüoh, hüke hatüowa Jerusalem kahtalan aoyin iman kahmük me ngohnang tüolante Okkeshangpupa Youngwanpa mepu ngaolan: Aope iman-e hahlakei iman ninlak aope iman-e yinglakei nyampuwe polak. Iman kahmük-a hitte menglak, hangjingne tüome nyoipu moilan ngaokhüm yejonpalan.

²⁰Sha-a kahta üngang ngohpu chingnyulan-a mahlak, hüyange kahmük-a wanwüng jengne linge tamlak. Hüwante iman-e Taowa Youngwanpa she shinglak.”

²¹Youngwanpa ngao üte pei;

²²“Hangko kahta, hipak linne taikhan tai, hüpoi itte angpuwa hango yengai: she hangne Israel kahtalan-e tüopa detngao leih yepu?”

²³Sha-a Tao, Okkeshangpupa Youngwanpawe tüopa jingne hang ilak, imante itamtüoh. Taowe tüopa detngao lakne tamlak. Shaaji Israel me tüopa ipu yenanglak. Tüonanleiye imante itüoh: Hipak ngoiteki, hüyange itte angpulan-a ütingme peiküki!

²⁴“Israel kahtalan yo me shaaji tahleih himanglan yejema-a ünyong yete woipu hipalan yenanglak.

²⁵Tao, Okkeshangpu Youngwanpawe iman phei ngaolak, hüyange Taowe hanghe i linglak. Shaaji shonne ngohpu hango yenanglak. Numan üyin me ngohpu hipak me numan hokkewepalan, taowe hanghe linglak she numante deingao pha Taowe linglak. Taowe ngaoyangki,” she Okkeshangpu Youngwanpawe inang.

²⁶Youngwanpa ngao üte pei;

²⁷“Hangko kahta, Israellan-e teihnang hüke nang himang hüyange itte ngaopu lan-a ngoikülak hipak nangjangpu jingne ngoh nang.”

²⁸Tüokhei imante hüke itüoh, hüke Okkeshangpupa Youngwanpawe inang: “Shaaji shonne ngohpu hango yenanglak. Taowe hanghe ngaoyangki linglak. Tao, Okkeshangpupa Youngwanpawe ngaoyangki!”