Read Konyak Naga EZEKIEL 14 Bible Online

EZEKIEL 14 - Konyak Naga bible

EZEKIEL 14

¹Israel woipalan ütam ü-tangte pei hüyange ü-sheshao me shot.

²Hüwante Youngwanpawe ü-phei ngao.

³“Hangko kahta, tüolan kahtawe iman jing mongjanga peshaolante pha hüyange yashah hüone tampu peshaolan-e iman ünute woi. Imante Taowe jankülak she iman-e teihnang kü a?”

⁴“Sha-a imante ngaotüoh hüyange Tao Okkeshangpu Youngwanpawe imante hanghe inang itamtüoh: Israel kahta lili aoyinne yoi mongjang peshaote phayapeih hüyange tüolan-e I ünute woine tam hüyange tüophei me hipa phei üpong yamlak jingne ao pei, iman-e ü-mepu janpu tüolak-janpuwa I jing peshaolan üngang ngohpuke tüolak ülamme shuwe tüolak!

⁵Tüolan peshao khongkümpuwe Israellan ü-mepu lüppe taine tam, hüpoi Taowe janne yepu kaiye iman monghah tampuwa Taowe okpu ngelak.”

⁶“Sha-a hüma-a, Tao, Okkeshangpu Youngwanpawe hanghe inang Israellante itamtüoh: Leih yetüoh hüyange numan jing nulakpa peshaolan tüotüoh.”

⁷“Hangkih tingme Israellan yo me ja yejema-a kahhenglan yo me ja aowe Israel ükhong yo me nyoiyange ü-mepu lüppe yemahlakei hüyange peshaolante yoppe khümlakei, hüyange tüophei me hipa tangte üpong tüolak tongne tainang, Tao, Youngwanpawe Ite janpu phalak!

⁸Taowe iman phei tüi-e yonglak. Taowe Ite leppu ja ne linge tamlak. Taowe ü-kahtalan yo me I yahteilak, hümme nakshih numan-e Taowa Youngwanpa she shinglak.”

⁹“Ngaoleih janpu phayange hipa ja lowetampu ne mengma-a hatüowa Tao, Youngwanpawe I lowetampu ne ngohnang. Taowe I-a Israel kahtalan mepu yahteilak.

¹⁰Hipa hüyange Ite üpong yamme peipupa moiniye ja kihpu shaoshiyatengpu tüolak.

¹¹Israellan Tao tüohyange tailak mepu hüyange imanjing ünuwe iman nying nyingke nulak mepu tüklak jingne Taowe tüopa linglak. Iman-a ü-kahtalan ne menglak, hüyange Taowa imanjing Kahwangne menglak.” Okkeshangpu Youngwanpawe ngaoyangki.

¹²Youngwanpa ngao üte pei.

¹³“Hangko kahta, kahmük jawe ünu om ma-a hüyange üte ütingyelakma-a, Taowe ü-yak nolak hüyange tüopate hahying peipu Taowe menge tamlak. Taowe seanyao yenglepu shonlak, hüyange kahta hei yinmok khongkümpu toilak.

¹⁴Noah, Daniel , hüyange Job tüolan kahta shelüm tüoken me nyoi ngohyapeyoi, iman meipuwe-a iman jing üyin hei yinlak.” Okkeshangpu Youngwanpawe ngaoyangki.

¹⁵“Yejema-a kahtalan toilak jingne phao yinmoklan Taowe shonne ok, kahmük-a loishe wengtuh ne hüke tüopa kaiye aowe-o kemme yongne ye-oklak ne linge tamlak;

¹⁶hüyange tüolan kahta lüm tüoken me nyoi ngohyapeyoi, hüke Tao, Okkeshangpu Youngwanpa Tao üyin Kahwang ütingpa me ngohtepuwe, iman-e imanjing hayimlan nehoi yinne ye-oklak. Iman-e imanjing yoi üyin hei yinlak, hüyange kahmük-a wanwüngjeng ne menge mahlak.”

¹⁷“Yejema-a Taowe tüopa kahmükte wehok yah peine ok hüyange kahtalan hei yinmoklan moini jange teilak mahtam lakpa yonglah shonne ok;

¹⁸hüyange tüolan kahta lüm tüoken me nyoi ngohyapeyoi, Tao, Okkeshangpupa Youngwanpa, Taowa üyin Kahwangne ütingpa me ngohtepuwe, iman-e iman hayim nehoi yinne ye-oklak, hüpoi iman üyin shaha yinlak.”

¹⁹“Taowe tüopa kahmükte daktin shonküma-a hüyange ü-mongshihpuwe kahtalan hei yinmoklan toiye üyin üngang yahma-a,

²⁰Noah, Daniel, hüyange Job tüokenme nyoiyapoi Tao, Okkeshangpupa Youngwanpa Tao Üyin Kahwangne mengtepuwe iman-e iman jing yoi hayimlan nehoi yintampu ye-oklak. Iman meimayahpuwe-a iman yoi üyinlan hei yinlak.”

²¹Okkeshangpu Youngwanpawe hanghe i hatüo ngohnang: “Taowe Jerusalemte ü-mepu shemengpupa shaoshiyateng ülam peli wehok, seanyaoyengle, phao yinmoklan, hüyange daktin; kahta hüyange yinmoklan moini mahtamlak jingne shonlak.

²²Ütamja yemahpe yinne hüyange yoi hayim yinpune mengma-a, aope iman numan tangte peilakeih, imante leitüoh. Iman hangshin ümengpa ne meng leiyah, hüyange Taowe Jerusalemte yahpeipu shaoshiyatenga ütingyang she shingyah;

²³hüwante Taowe lingpu sheminlamphe me ngaomük ümei ngohnangki she numan-e shinglak.” Okkeshangpu Youngwanpawe ngaoyangki.