Read Konyak Naga EZEKIEL 16 Bible Online

EZEKIEL 16 - Konyak Naga bible

EZEKIEL 16

²“Hangko kahta, yhawe hanghepa nunushepu toiling Jerusalemte yaklan toontam tüoh.

³Okkeshangpu Youngwanpawe yhate hanghe inang Jerusalemte itüoh: Nanga Kanan kahtok me puhpai yangki. Nangpa-a Amorlan hüyange nangnyuwa Hitlan ngohyangki.

⁴Aope nang puhyapeih, aowe nang jing yeam yewet yejema-a yepoitam yejema-a hüm phei yephotam yejema-a inkhek phei yeyüottam.

⁵Aowe tüolan yo me ülam ja nehoi nangte linge tamlak jingne wangmanne yayenge teihpu yenang. Aope nang puhyapeih, aowe-o nangte yeken. Nanga kahko me shüppe tüohyangki.

⁶“Hüwante Tao linne tai hüyange nang nangjing iy me lüpyange nge. Nanga iy-ye maayange, hüpoi Taowe nanga li ne yetamlak.

⁷Taowe nanga üyung meiye jongpu peephao ja leye linge tam. Nang wongnange hüyange daowe jong hüyange naoyhaha ne meng. Nangjing düam meiye ngai, hüyange nang shangmin lao, hüpoi nanga pümkeng.

⁸“Tao üne-o, linne taiwante, nang jingne kenlak hipak peipu yang she Taowe nge, nang pümkeng me ngohpute Taowe ü-phakshaoh innetam hüyange nangte kenlak jingne jan. Üting me, Taowe nang yahlak jingne khüm, hüyange nanga ü-jingne meng.” Hatüowa Okkeshangpu Youngwanpawe hanghe i tüopa ngohnang.

⁹“Tüophei me Taowe yeng yah hüyange nang mepu iy poiye jaowe tam. Taowe nang tangta sho te olive minnga phowe tam.

¹⁰Taowe nangte oleng inyangpu inkhek yahne tam, hüyange shemeipupa meisho phei lingpu yashom, shangnyeihkhek ükhai, hüyange nyemo ükhai pha.

¹¹Taowe nangme yük, wentong hüyange üngkhüp yükke tam.

¹²Taowe nangte nateang ju, shüptet hüyange shaoshaoh ümei yahlak jingne pha.

¹³Nang me juyük, hon hei khüm ngohnang, hüyange nange hipak phe me oleng inyangphei nyekhai hei nyelehpu inkhek innang. Nange shemeipupa ankhoih phei lingpu an hah, hüyange hahlak jingne zahtai hei olive minnga ngohnang. Nang naoyha meipuwa phihlang yangki, hüyange nang ahngyha ne meng.

¹⁴Nang khakshuwe wangngoiye naoyha meipu jingne jat lili yo me ütahpa ne meng, hangjingne nang hükih-e shemeiyaomawe linge tampuwa Tao ne ngohyangki.” Hatüowa Youngwanpa Kahwange hanghe i tüopa ngohnang.

¹⁵“Hüpoi nang naoyha meiyahpute nang ota hüyange aoyin kemme yongpulan peiyapeih nange shinne tamme phwngngam.

¹⁶Nange nang jing inkheklan yoppe khümpu nyoijinglan o tümlak jingne jon, hüyange phwngngam nyu meimei kih-e nange nang nying nyingke moilante pha.

¹⁷Taowe nangte phapu hon hei khüm yük nange yah, mieng-üpong (netan) linglak jingne tüolan jon, hüyange tüolan phei phwngngampu toi ling.

¹⁸Taowe nangte phapu oleng inyangphei inkheklan nange yah, hüyange tüolan-a mienglante yüoh tam, hüyange nange mienglante olive minnga hüyange Taowe nangte phapu üpe ümei dopu pha.

¹⁹Taowe nangte hahying shemeipupa ankhoih, olive minnga, hüyange zahtai pha, hüpoi nange tüopa-a peshaolan-e monghah tamlak jingne toidopu ja ne pha.” Youngwanpa Kahwange hanghe i tüopa ngoh nang.

²⁰“Tüophei me nange üte puhtampu hala yhalalan yah hüyange tüolan-a peshaolante dopu pha, Üte üting yelakpe mengpu wong kümpu!

²¹Ühayimlan yeyahpe hüyange peshaolante toidopu yephapu tüone yeje lak a?

²²Phwng-ngamnyu ja ne nulakpa nang üyin hipak me nange aope-o nang nahawan, aope nang pümkeng me ngoh, nangjing yoi iy me lüpyange ngohpu nishe yeteih tüo.”

²³Youngwanpa Kahwange inang, “Nang mahnang! Mahnang! Nange ünu khongkümpu ling, tüophei me

²⁴lamnah lili me peshaolante yoppe khümlak jingne nyoijinglan ling hüyange phwngngampu toi ling.

²⁵Nange nang naoyha meipuwa sham yo me shu ne tam. Aoyin nang shongte pei moilante nange nang nying nyingke phane tam, hüyange nange nyihjeih she ünyei phwngngam.

²⁶Nange toimeng linghuwe mupu nang yupipa Egyptlan, nang phei shinleng me shi ne tam, hüyange nange Tao mongshih ngaiye tamlak ne nang phwngngampu ling.”

²⁷“Sha-a nangte shaoshiyateng phalak hüyange Taowe moimantampu nangjing meitam yahteilak jingne ü-yak noteki. Taowe nanga Philistialan, aowe nangte nu hüyange nangjing yejao yeshapu toishaolante nuweteih tüolante phünne phayangki.”

²⁸“Eihalan-e nangte mongme huwe yetampu jingne, nang Assyrialan tokpheite phette tai. Nanga imante phwngngamne tamme ngoh, hüpoi imane-o nangte mongme hune yetam.

²⁹Nanga üne-o pheeileihpu jat Babilon lante-o phwngngam ne tam, hüpoi imane-o nangte mongme hu ne yetam.”

³⁰Hatüowa Youngwanpa Kahwange hanghe i tüo ngohnang: “Nange tüolan khongkümpu yewüopu phwngngamnyu kih-e ling.

³¹Püanglampong lili me peshaolante yoppe khümlak jingne nange nyoijing ling hüyange phwngngampu toishao ling. Hüpoi nanga ngin nanne yetaipu jingne ülao phwngngam nyulan kih-e yeje.

³²Nanga yoi netanpate kenhah shepu nanleiye peipu yinpa kahta phei phwngngampu sheko ja leye ngoh nang.

³³Phwngngamnyu ja te-a ümee phayange jonnang, hüpoi nange-a nang mailan khongküm pute hünghao pha hüyange nang phei shilak jingne iman üken phe mepu peilak jingne yakjai phawe yoh.

³⁴Nanga ülaopa kihpu phwngngam nyu. Aowe-o nangte phwngngamlak jingne yeyoh. Nangte pha ne yetam; nangepa imante pha! Tüokhei nanga eiha phei yoiyoi.”

³⁵Hüma-a sha-a, Jerusalem, nang phwngngamnyu! Youngwanpawe hanghe i jaitüoh.

³⁶Hatüowa Youngwanpa Kahwange hanghe i tüo ngohnang: “Nange nangjing inkhek khokke win hüyange phwngngamnyu kih-e, nange nang nying nyingke nang mailante, hüyange nangjing nunushepu peshaolante pha, hüyange nange nanghayim peshaolante toidopu ja ne toitam.

³⁷Tüojingne Taowe nangmai ülanglan khongkümpu, nange lenge teihpulan hüyange nange nuwe teihpulan jamshe jemne tamlak. Taowe iman-a nang neikonne yahpeilak, tüophei me Taowe nangjing inkhek khokke winlak hüyange iman-e nang pümkeng me nge ne tamlak;

³⁸Nuweshakpu hüyange toilangpu jingne Taowe nang winne tamlak, hüyange ü-mongshihpuwe hüyange mengshipuwe Taowe nanga li ne tamme shaoshiyateng ne tamlak.

³⁹Taowe nanga iman wongte phawe tamlak, hüyange iman-e ümeken nyoilan me nange phwngngampu toi ling hüyange peshaolante yoppe khüm tüolan nyoijing menge winlak. Iman-e nangjing inkheklan hüyange yük khokke yahlak hüyange nang lanshe pümkeng me tüohlak.”

⁴⁰“Nangte longe shüplak jingne iman-e ükhong henge ngailak, hüyange iman-e nanga imanjing yanglow phei khoihnyaiye tehlak.

⁴¹Iman-e nangjing noklan-a jakke winlak hüyange shekolan ükhonge nangte shaoshiyateng phapu ngene tamlak. Nang phwngngampu Taowe lak ne tamlak hüyange nange nang mailante hünghao phapu lakne tamlak.

⁴²Tüophei me ü-mongshihpuwa laklak; hüyange Tao jünge ngohlak. Tao shaaji mongshih yengailak yejema-a aohüngpu yengohlak.

⁴³Aope nang yhala ne ngohyapeih Taowe hangke nangte namno nange pemeiyangki, hüyange tüolan toi khongküm lingpuwe nange Tao mongshih ngaine tamyangki. Tüojingne tüolan khongkümpu jingne nange shümme yelak Taowe linge tam. Hangne nange lingpu nunushepu toishaolan tangme iymei lahnyikpu phwngngampu ling ei?” Youngwanpa Kahwange ngaoyangki.

⁴⁴“Leihuyah Jerusalem kahtalan, nangjingne tüopa detngao jonlak: ‘Inyu hangke, Iha-o hüke.’

⁴⁵Nanga ütingme nangnyu üha muh yang. Yhawe yoi netanpa hüyange yha jing hayimte yeonge nuwetam. Nanga nang naolan kih-e, aoyinne yoi netanpalante hüyange yoi hayimlante nu. Nang hüyange nang pheipu chingnyulan-a Hitlan nyuyong hüyange Amorlan payong ngohnang.”

⁴⁶“Apyekao me, yoijing chingshaolan phei nangnya-a Samaria. Heyekao me, yoijing chingshaolan phei nang naowa Sodom.

⁴⁷Iman yamee pheite woilak hüyange imanjing nunushepu toishao kih-e linglak nange monghah-e ngohyang a? Yeje, ütenjapu mongme hei nange iman phei-o shemeng shepu nyoingoh wanglam nange lingpu lilime ngai nang.”

⁴⁸“Taowa üting tingha me üyin Kahwangne mengtepuwe,” she Youngwanpa Kahwange inang, “Nang nao Sodom hüyange yha pheipu chingshaolan-e nang hüyange numchinglan-e lingpu shinne ünu yeling.

⁴⁹Yha hüyange yha hayimlan ota hangjingne iman me hahlak wangman-e ngoh hüyange chingmei me yemoppe nyoi, hüpoi iman-e toihalan jingne namnopu yenang hüyange paowetükpu yenang.

⁵⁰Iman ota hüyange ngayoun hüyange Taowe nupu toishaolan ling, tüokhei Taowe iman mahtam, hüke nange shinglak.”

⁵¹“Samariawe nange ompu jakih-e tampu shinne nehoi ünu ye-om. Yhawe lingyangpu phei ünyei shenyei she nunushepu toishao nange ling. Phinne leiwante nange püohpinpu kaiye nang nya-a yepüoh yepinpu kih ngenang.

⁵²Tüokhei sha-a nange nang wüotüopu nünlak wongpong. Nangnyalan phei nang ünuwa jamloi yemeipe phong, tüokaiye nang phin me iman-a yepüoh yepinpu kih-e ngenang. Sha-a wanglüm ütak ngaitüoh hüyange nang wüopu nüntüoh, hangjingne nange nangnyalan khakshuwe leiye oklakne lingne tam.”

⁵³Youngwanpawe i, “Taowe iman nishe jalunne tamlak Sodom hüyange yha jing chingshaolan hüyange Samaria hüyange yha jing chingshaolan. Hüke Taowe nango jalunne tamlak.

⁵⁴Nange nang nying nyingke wüolak, hüyange nang wüotüopu kaiye nang nya-hei-naolan hangshin meiye tainang hüone ngailak.

⁵⁵Hüwante nang nao Sodom hüyange yha jing yhalalan phei, iman üshongpe ngohyangpu yatuhshaote leihyelak, hüyange nang hüyange nangjing yhalalan numan üshongpe ngohyangpu yatuhshaote leih yelak.

⁵⁶Aope nang otapu phei ngohyapeih tüolan nyih hipak me nange Sodom jingne,

⁵⁷hüyange nange lingpu ünu ükote manngai wante wonnewange ye-i a? Sha-a nanga yha meimei kih-e Edomlante, Philistialante, hüyange aoyinne nangte nu, nang shongmepu yupilante wonne wangne tamnang.

⁵⁸Nange lingyangpu nunushepu nulakpa toishaolan jingne nanga shanglak.” Youngwanpawe ngaoyangki.

⁵⁹Youngwanpa Kahwange i, “Nange yampu kih-e Taowe nangte jonlak, hangjingne nange janyangpute nange ye-i-yeshepe ling hüyange jieng jeppu meng.

⁶⁰Hüpoi nang aope naha ne ngoh hüwante Taowe nang phei lingpu jiengjeppu teihtüolak hüyange Taowe nang phei jiengjeppu linglak tüopa-a jintepu jingne ngohlak.

⁶¹Nange hangke lingyang yapeih nange teihtüolak, hüyange aope nangnya hüyange nangnao leih yelakei tüopa jingne nang wüolak. Taowe tüopa-a nang phei ü-jiengjeppu meitam ja ne yejeyapoi iman-a nangjing yhalalan ja leye linge tamlak.

⁶²Taowe nang phei ü-jiengjeppu linge yelak, hüyange nange Taowa Youngwanpa she shinglak.

⁶³Nange püohpinyangpu khongkümpu Taowe ümeng winlak, hüpoi nange tüolan-a teihtüolak hüyange nang ju eplak ne nehoi nang loishe wüolak.” Youngwanpa Kahwange ngaoyangki.