Read Konyak Naga EZEKIEL 17 Bible Online

EZEKIEL 17 - Konyak Naga bible

EZEKIEL 17

¹Youngwanpa ngao üte pei:

²“Hangko kahta, Israellante leppu ja itüoh;

³Tao, Youngwanpa Kahwange imante hanghe i iman-e shinglak jingne: Hipak ja me shemei yaomapu üyang pheipu awlan üyong ja ngoh, hüyange yangteng üyong yeonge khaowe lanne saa. I Lebanon kahtangte pu hüyange cedar pee üshaoh phakke yahtai;

⁴hanghepa Iye pheei leihpu kahmük ja me ang, hüyange pheeinyuleihpalan chingnyu ja me tüoh.

⁵Tüophei me Iye Israel kahmük mepu üphao ha ja yah hüyange tüopa-a üyao ngohpu kah ja me dei, ümeken me tüopa jongpu manlak ne hipak phe me yeng ngoh.

⁶Tüopa üphao jongne wang hüyange phehküneh-e, panne yanpu wuwüngwu ne ngai. Üquilan-a awlan yekaote jonge ong, hüyange yalah shelushe jonge ta; Üwu-a üqui hüyange üyaklan-e maayange ngohyangki.”

⁷“Üne-o ülao awlan üyongja yeonge yongpu yangteng phei hüyange ümin jeileh-e nyimyang phei ngoh. Hüyange sha-a üwu-e I yekaote üya yunetam hüyange tüopa tepu üyaklan I yekaote lüpnang, ümeken pesha me tüopa jonge ngohyapeih tüopa mepu phei shenyei she Iye yeng phakülak she monghümpu phei shonnang.

⁸Hüpoi tüopa üwu-a üyao pheipu kahtok, yeng wangmanne ngaijing kahmük me tüo kaiye üyak jonglak hüyange wuwünglick licklak hüyange wangngoipu üwu ne menglak jingne deiyange ngoh yangki.”

⁹“Tüokhei, Tao Youngwanpa Kahwange tong; Tüopa wu üyin me ngoh-e jonglak a? Üwangpa awlan ne tüopa yalah me bheiye, wuwünglick khaiye, hüyange üquilan phakne tamme hüyange tüolan kuiye yetamlak a? Tüopawe hipak yonge yeyahlak yejema-a tüopa bheiye winlak jingne wongnangpu jat yahlak ne yeje.

¹⁰Üting, hatüowa deiyangki, hüpoi tüopa üyin me ngoh-e jonglak a? Aope heongye wangyange tüopate heaplakei tüopa yekuilak a? Ümeken me tüopa jongnang tüoken me yekuilak a?”

¹¹Tüophei me Youngwanpa ngao üte pei:

¹²Tüolan hokkewepalante leppute minpuwa hanghe iman-e shingya shi tongtüoh. Imante itüoh hüke Babilon ahngpa Jerusalemte pei hüyange ahngpa hei I shaoshanpalan yahyange Babilonte yahye nang.

¹³Iye ahngnok phong mepu ja yah, Iphei teishinpu yah, hüyange I phangte ngohlak jingne Ite jiengjeppu ja yah ne tam. Iye wongpong ne mengpu kahtalan,

¹⁴jat teelawe ngailak mepu tüklak jingne hüyange teishinpu yahpuwa ütingpa me ange oklakei she iye oklak jingne aiye yah.

¹⁵Hüpoi Judah ahngpawe hokkeweye ngai hüyange koiponglan hei nyahponglan üngang yahlak jingne namnopalan Egypt te shon. Iye okpu nge a? Tüopa phei taipu ok a? Iye teishinpuwa mengne ye-ok hüyange shaoshiyateng yephape yengoh ok!

¹⁶“Üting tingha me Tao üyin Kahwangne mengtepuwe she, Youngwanpa Kahwange inang,” “Tüopa ahngpa-a Babilon me lilak hangjingne Iye jampu; hüyange aowe I ahngpa shotjing me angne tam tüopa Babilon ahngpa phei yahpu teishinpu Iye meng.

¹⁷Aope Babilonlan-e kahtok toi linge hüyange kahtalan üngang toilak jingne jhom shaolakei, wongnangpu Egypt ahngpa nyahponglan-e nehoi hoklak jingne Ite yejam oklak.

¹⁸Iye jamyangpu hüyange teishinpu yahyangpu Iye meng. Iye tüolan khongkümpu ling, hüyange sha-a I yinpu ye-oklak.”

¹⁹Youngwanpa Kahwange inang, “Üting tingha me Tao üyin Kahwang ne ngohtepuwe, Iye hanghepa tükke anglak she ü-min me jiengpu yahpu teishinpu mengpu jingne Taowe Ite shaoshiyateng phalak.

²⁰Taowe toilangpa shaan shaitamlak hüyange I tüopa me pholak. Taowe I Babilonte yahteilak hüyange Ite tüoken me shaoshiyateng phalak, hangjingne Iye üte üting yelakpe tüi-e yong.

²¹Ijing shemeipupa wetaipalan-a shapju me toilak, hüyange yinne tüopulan-a üken phe te yanne tamlak. Hüwante nange Tao, Youngwanpawe ngaoyangki she shinglak.”

²²Hatüowa Youngwanpa Kahwange hanghe i tüo ngohnang: “Taowe cedar peshaoh-a yahlak; tüopa üqui üjoi üshaoh mepu taowe üyoi-a yahlak; Taowe tüopa-a shedaopu kahtang shemeiyaoma me deilak.

²³Israel jing shedaopupa kahtangme Taowe deilak. Tüopa-a üquilan phei jonglak hüyange ülick lickke ngailak, hüyange wang ngoipu cedar ja ne menglak. Awha ülam lili tüopa me nyoilak hüyange tüopa shümphang me nyoilak nyoi tüolak.

²⁴Kahmük me ngohpu pee ülam liliye Taowa Youngwanpa she shinglak. Shedaopu peelan Taowe akke tam, hüyange shephehpu peelan Taowe jongne tam. Hü-ünge ngohpu peelan Taowe kuine tam hüyange kuiye mahtepu peelan hü-ünge linge tam. Tao Youngwanpawe ngaoyangki. Taowe hanghe linglak she iyangki, Taowe linglak.”