Read Konyak Naga EZEKIEL 18 Bible Online

EZEKIEL 18 - Konyak Naga bible

EZEKIEL 18

¹Youngwanpa ngao üte pei

²hüyange i, “Israel kahmük me kahtalan-e yelakpe ngaohümpu hatüo detngao hanghe shi? ‘Nyupalan-e wuwünglick üshi hah; hüpoi hayimlan-e fajüm.’

³“Üting tingha me Tao üyin Kahwang ne mengtepuwe” she Youngwanpa Kahwange inang, “Israel me numan-e shaaji tüopa detngao yengaolak.

⁴Nyupalan, tüophei jamme hayimlan üyin yaha, hüyange kahta lili jing üyin yaha-a üjing. Kahta aowe ünu omlakei lilakpa-a tüopa.”

⁵“Ipuja me ütingpa me kahta ümei, khakshupu hüyange mong phapu ngohma-a;

⁶Israellan jing peshaolante Iye yoppekhümpu yenangma-a yejema-a nyüonyapu üjao khümjing me toidopu yehahma-a; Iye ülao kahta ja jing sheko ünyong yete yewoi yejema-a sheko ja yha nuweshakwante yha tangte yepeima-a;

⁷Iye ao te-o loweyetam yejema-a yekuh. Ite üsea phapupate khakshuwe yetam; Iye seanyao palante uhtam hüyange pümkeng me ngohpalante inkhek pha.

⁸Küw tüolak jingne Iye nginsea yepha. Ümeng yelinglak jingne Iye lan hüyange hanghe mopngailakei khakshuwe ngaophünpu pha.

⁹Hükihpu kahta jawe ü-ngaokhüm jonnang hüyange ü-ngaokhüm kentinge angnang. I-a ütingpa, hüyange I üyin ngohlak,” she Youngwanpa Kahwange inang.

¹⁰“Hüma-a ipu ja me tüopa kahtawe hayim ja ngoh aowe kuhleih hüyange toilang, aowe tüolan yo mepu ütam ja nehoi ling,

¹¹hanghepa yoipawe aope-o yeling; nyüonyapu üjao wümjongte toidopu Iye hah hüyange ülao kahta jing shekolan ünyong yete woi;

¹²Iye toihalante shangne tam, Iye kuhleih, nginsea phapa-e Ite hanghe pha Iye ang; eiha jat üjao wümjonglan te I tai, nunushepu peshaolante yoppekhüm,

¹³hüyange küw yamme nginsea pha; I üyin me ngohlak a? Yeje, I yengohlak. Iye tüolan nunushepu toishaolan khongkümpu ling, tüokhei I-a lilak. I iy-a Itang me ngohlak.”

¹⁴“Sha-a ipu ja me tüopa nishepupa kahtawe I haja ngoh; Ipawe linge peipu ünu toishao lili Iye nge, hüpoi Iye hüopu wanglamte yekem;

¹⁵Iye Israellan jing peshaote yoppe khümpu yepha, yejema-a nyüonyapu üjao wümjongte toidopu yehah; Iye ülao kahta ja jing sheko ünyong yete yewoitam;

¹⁶yejema-a ao te-o shangne yetam yejema-a ao jingo yekuhyeleih; ü-sea phapawe Ite hanghe pha Iye leih yenetam; seanyaopalante Iye uhying hüyange pümkeng me ngohpalante inkhek pha:

¹⁷Iye ünu yelinglak jingne lan hüyange küw yamme nginsea yepha. Iye ü-ngaokhüm tükke ang hüyange ü-ngaokenglan jon: Ipa ünulan jingne I yelilak, hüpoi I ütingpa me üyin ngohlak.

¹⁸Ipa jingne-a, Iye lowelam hüyange kuhleih hüyange kahta lilite hipak phe me ümeng ling. Tüokhei, I yoi-e lingyangpu ünulan jingne I lilak.”

¹⁹“Hüpoi numan-e tong: Ipa jing ünulan jingne hangne Iha yeshangpu? Janne yepuwa hatüo ngohnang, hüke Ihawe hanghepa üting, hüyange meinang tüopa linge Iye ü-ngaokhümlan ang hüyange tüolan pheite kentinge woi, tüokhei Iya ütingpame üyin ngohlak.

²⁰Ünu ompu üyin yaha tüopa-a lilak. Ipa ünu jingne Iha yeshanglak, ye-i-ma-a Iha ünu jingne Ipa yeshanglak; Khakshupu kahta jawe I khakshupu toishao jingne khintak tüolak, hüyange ümeng kahta ja-a I yoi ünu jingne shanglak.”

²¹“Hüpoi ünu kahta jawe Iye hanghe ünu lingyangki tüolan khongkümpu mepu lüppe yema-a, hüyange ü-ngaokenglan jonne, hanghe ütingpa hüyange meinang lingma-a, I yelilak; I ütingpa me üyin ngohlak.

²²I jing ünulan khongkümpu winne tamlak, hüyange I üyin ngohlak, hangjingne hanghepa ütingpa Iye lingyangki.

²³Ünu kahta ja lipute Taowe mongmeiye leinang she numan-e teih nangkü a?” she Youngwanpa Kahwange tong. “Yeje, hüleima taowe I-a monglüppe hüyange üyin me ngohpute leihu nang.”

²⁴“Hüpoi khakshupu kahta jawe Iye khakshupu toi lingpu mepu lakyange, ünu kahtawe lingpu nunushepu toishao khongküm ünulan lingne wangma-a, I üyin me ngohpu oklak a? Yeje! Iye lingyangpu khakshupu toishaolan hango yeteih tüolak. I üting yelak okpu hüyange I yoi ünu jingne I lilak.”

²⁵“Hüpoi numan-e inang, ‘Youngwanpawe hanghe ling tüowa yeshu.’ Üte jaiyah, numan Israellan. Taowe lingpuwa yeshu she numan-e teihnang kü a? Numan lam-a yeshupu ne mengpu a?

²⁶Aope khakshupu kahtawe toimei lingpu mepu laklakei hüyange ünu lingne wang tüophei me lima-a, Iye lingpu ünu jingne I li nang.

²⁷Aope kahta ümeng jawe ünu lingpu mepu laklakei hüyange hanghe üting hüyange shemeipupa linglakei, Iye yoi üyin yinnang.

²⁸Iye hanghe lingyapeih Iye teihtüoh hüyange ünu yelingpe lak; tüokhei I-a ütingme yelilak, hüpoi üyin me nyoilak.

²⁹Tüoyangpoi numan Israellan-e i; ‘Youngwanpawe hanghe ling tüowa yeshu.’ O Israel nokphong, üjing tailam lan-a yetingpu a? Numan tailam yetingpu ne yeje a?”

³⁰“Tüokhei, sha-a Tao, Youngwanpa Kahwang, Taowe Israellante ngaowe tamnang hüke Taowe numan lilite nange hanghe lingyangki tüopa jingne ngaophünlak. Numan-e lingpu ünu lili mepu lüppe yetüoh, hüyange nang ünuwe nang mahne tahtam.

³¹Numan-e linge ngohhümpu ünu khongkümpu tüotüoh, hüyange numan nying nyingke kenheimong hüyange mongjang üla yayah. Numan Israellan hangne lihupu?

³²Taowe ao-o li ne yetamhu,” she Youngwanpa Kahwange inang. “Numan ünu mepu monglüp tüoh hüyange üyin me ngohtüoh.”