Read Konyak Naga EZEKIEL 2 Bible Online

EZEKIEL 2 - Konyak Naga bible

EZEKIEL 2

¹Iye üte i, “Hangko kahta, nang ya phei yongtüoh. Taowe nang phei ngaohu nangki.”

²Aope ngaowünga ngaowe ngohyapeih, Kahwangpa yaha üte ong hüyange ü-ya phei tao yongne tam, hüyange ngao wünga taowe yelakpe jai;

³Iye üte i, “Hangko kahta, taowe nanga Israel kahtalan tangte shonnang. Iman ü-phei tüi-e hokkewe hüyange lüppe ye mah, hüyange imanjing pajeiyonglan meimei kih-e yelakpe ü-phei tüi-e hokke we nang.

⁴Iman ngayoun nang hüyange üte wangshüm yehüo, tüokhei Taowe nanga Tao, Okkeshangpupa Youngwanpawe, imante hanghe inang ngaowe tamlak jingne shonnang.

⁵Tüolan hokke wepalan-e nang ngaote jaiyah yejaiyah, iman yo me hipa ja ngohnang she iman-e shinglak.

⁶“Hüpoi nang, hangko kahta, imante nang ye-nyamlak yejema-a iman-e hanghe ilakei ye-nyamlak yang. Iman-e nangte nuwe hüyange ye-i-yeshepe tamphalak; toshitolao yo me nyoipu kih nangte nang phalak. Tüoyangpoi, aoyinne hokke we nang yejema-a iman-e hangheyin ilakei nyamme tahteih, hangjingne iman-a hokke wepu noksalan ngohnang.

⁷Iman-e yejaiyah jaiyah Taowe nangte hangheyin imante ilak jingne inang, nange ngaowe tamlak. Iman-a hangke hokke wepalan ne meng teih tüoyah.”

⁸“Hüpoi nang, hangko kahta, Taowe nangte hanghe inang jaiyah. Iman kih-e tahhok tahwe. Nang ju ka yah hüyange Taowe nangte hanghe phanang hahtüoh.”

⁹Taowe lei, hüyange yak ja-e ü-tangte nowe tam; hüyange nyanyangpu laitee jonyange ngoh.

¹⁰Laitee-a yakke lan hüyange moini yekao me nyanyange ngohpu taowe nge, mongshang mongmengpu ngaowüng, hüyange mangshappu hei wao eapulan nyanyange ngoh.